भगवन्ती नावाणी: सिंधी लोक गीत गायिका
TSW Citation
वसियां दिलिन में तव्हां जे सदा आहे इहा आस
जोड़े पीढ़ियिन खे मुहिंजो आवाज़
शाल करतार बणाये मुहिंजो अहिड़ो किरदार
अचो मिली करे कयूं सभु अरदास
अज़राअमर फेमस सिंधी सिंगर – सिंधी कोयल – सिंधी लाड़न जी सरताज – भगवन्ती नावांणी – जहिं पहिंजे दिल मोहीन्दड़ सोज़ भरे सुरीले ऐं शोख आवाज़ सां न सिर्फ सिंधी लोक गीत लाड़न खे घर घर पहुचायो पर आत्मा खे सुकून डियण वारे आवाज़ में सुखमनी साहिब सिंधी में गाये सिंधी घरन जी सुबूह खे सुख सां भरियो – तहिंजो जन्म 01 फरवरी 1940 ते नसरपुर सिंध में थियो हो। सिंधुअ जे किनारे इन सिंधी फिल्म में हुन पहिंजो अदाकारी जो हुनर पिण डेखारियो। 22 अक्टूबर 1986 ते सिंधी संगीत खे हर दिल अज़ीज़ जे नयें मुक़ाम ते पहुचायिण वारी भगवन्ती जो सुरगवासु थियो।
भगवन्ती नावांणी - बायोग्राफी [जीवन परिचय]
संगीत ऐं सूफ़ियत सिंधुअ जे किनारे ते रहण वारन सिंधियिन जे जीवन में केतिरे क़दुर समायल आहे इन जो अंदाजो इन गालिह मां थो अचे त अजु जे दौर में बेशुमार सिंधी घरन जे सुबूह जी शुरुआत सिंधी कोयल जो लक़ब हासिल भगवंती नावाणी जे मिठे सुरीले आवाज़ में गायल सुखमनी साहिब सां थिये थी। घटि में घटि भारत भूमी ते इहो मुमकिन न थो लगे त का सिंधी शादी थिये ऐं भगवंती नावांणी जो नालो न खन्यो वंञे। सिंधियिन जी शादी जी हिक अहमियत वारी रसम थींदी आहे लाड़ा ऐं भगवंती नावाणी उहा फेमस सिंधी सिंगर आहे जहिं लगभग सभ मशहूर सिंधी लाड़ा गाया आहिन या इहो बि चयी सघिजे थो त जेके सिंधी लाड़ा भगवन्ती नावांणी गाया आहिन उहे मशहूर थिया आहिन।
भगवंती नावांणी जो जनम नसरपुर सिंध में 01 फरवरी 1940 ते थियो हुओ। मुल्क जे विरहांङें खां पोय, भारत लड़े आयल नावाणी परिवार जी कन्या रतन भगवंती सिंधी संगीत जे सुरन सामहूं पाणु विंञाये वेठी। हुन सिंधी लोक संगीत खे घर घर पहुचायिण वासिते सिंधी भजन, दोहरा, सूफी कलाम, लोलियूं ऐं साखियूं गायिण शुरू कयूं। असुल में नंढे हूंदे खां डाडीअ खे सिंधी भजन ऐं सिंधी लोक गीत गाईन्दो बुधन्दे वडी थियिल भगवंती खे बालपणे खां ई गीत संगीत लाय चाहु पैदा थी वयो हो।
कुदरती डाति सां मालामाल भगवंती खे संगीत जी पहिरियीं रीतसर सिखिया देवघर म्यूजिक स्कूल ऐं निखिल घोष जे अरुण संगीत विद्यालय में मिली। अगते हली हुअ इंडियन पीपुल थिएटर एसोसिएशन सां जुड़ी जिते कानू घोष ऐं कानू रॉय जहिडिन संगीत जे खेतर जी नामचीन शख़्सियतुन जी रहबरी हेठि भगवंती जो संगीत वास्ते चाहु हुनर में बदिलिजी वयो। भगवंती खे रविन्द्र संगीत जी वधीक जाण ऐं सिखिया चित्रा बरुआ ऐं हेमंत कुमार डिनी।
भगवंती जो आवाज़ ऐड़ो त मिठो, सुरीलो ऐं दिलकश हो जो हुन खे सिंधी कोयल चयो वेन्दो हो। सिंधी लाडा गायिण सबब हुअ ऐतिरो मशहूर थी वयी जो हर सिंधी घर में संदस नालो घर जे भातीअ जे नाले वांगुर महसूस थियण लगो।
भगवंती मुख़तलिफ़ सामाजिक ऐं धार्मिक मोकन सां गडु सांस्कृतिक कार्यक्रमन में बि सिंधी गीत संगीत पेश करण लगी। हिक सिंधी सिंगर तौर पहिंजे अटकल 25 सालन जे पंहिजे कॅरियर दौरान भगवन्तीअ देश विदेश में 3000 (ट्रिन हज़ारन) खां बि वधीक प्रोग्राम पेश कया। अहिड़न कुझु प्रोग्रामन में त हुन प्रो. राम पंजवाणी जहिड़ी मकबूल शख्सियत सां गडु गीत गाया।
सिंधी फ़िल्मुन में प्ले बैक सिंगर तौर त संदस कामियाबी बेमिसाल आहे। 1963 खां पोय ठहियिल लगभग हर सिंधी फिल्म में भगवंती गाना गाया आहिन। कुछ सिंधी फिल्म जिन में भगवंती नावाणी जो आवाज़ शामिल आहे से आहिन झूलेलाल, लाड़ली, सिंधु जे किनारे, शल धीउर न जमन, होजमालो, कंवर राम, हलु त भजी हलूं, परदेसी प्रीतम वगैरह।
भगवंती नावांणी मशहूरीअ जूं नयूं बुलन्दियूं हासिल कयूं जडिहिं हुन परसराम जिया साहिब जी सिंधी तरजुमो कयल नितनेम जी गुरबाणी “सुखमनी साहिब” सिंधीअ में पेश कयी। लगभग 40 साल अगु भगवंती जी गायल सुखमनी साहिब अजु बि घणन ई सिंधी घरन में सुबूह जो हर रोज़ नियम सां हलायी वेन्दी आहे।
पहिंजे कॅरियर जे दौरान भगवंती जो केतिरा ई भेरा सत्कार कियो वियो ऐं हुन खे अलग अलग अवार्ड्स सां नवाज़ियो वियो पर संदस वड़े में वड़ो अवार्ड इहो आहे जो अजु बि सिंधी शादी भगवंती जे लाइन बिना अधूरी महसूस थींदी आहे।
22 अक्टूबर 1986 ते सिंधी लोक संगीत जी हिन महान पुजारिण जो सुरगवासु थियो।
भगवन्ती नावाणी - फिल्म्स ऐं नाटक
भगवंती नावाणीअ किन सिंधी नाटकन, खास करे मशहूर डायरेक्टर ऐं लेखक गोविन्द माल्ही जे पेश कयल सिंधी नाटकन, में बि कमु कियो हो। इन्हन मां के आहिन
मेहमान
गुस्ताखी माफु
तुहिंजो सो मुहिंजो
देश जी ललकार
मशहूर सिंधी फिल्म “सिंधुअ जे किनारे ” में भगवंती नावांणी हीरोइन तौर एक्टिंग कयी हुयी।
Display Window
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.