पदम श्री गोविन्द निहालानी

मशहूर सिनेमेटोग्राफर डायरेक्टर – फिल्म फेयर अवार्ड – पदम श्री
2002 में पदम श्री अवार्ड सां नवाज़ियिल ऐं पंज फिल्म फेयर अवार्ड हासिल कियिल गोविन्द निहालानी उन्हन फेमस बॉलीवुड सिंधी शख़्सियतुन में शामिल आहे जिनखे 1947 जे विरहांङें जे बेहद दर्दनाक दौर मां गुजारिणो पियो हो। 19 अगस्त 1840 ते जन्म वठण सबब गोविन्द उन वक़त सिरफ सतन सालन जो बार हो पर तहिं हूंदे बि घर खां दर बदर थियण जो दुख ऐं तक़लीफ़ूं हिन जे कोमल मन ते उकेरि जी वयूं। सालन खां पोय वञी गोविन्द इहे पंहिजे टेलीविजन सीरियल “तमस ” वसीले जग ज़ाहिर कयूं।

इहो सचु आहे त भगवान सिंधी कौम खे धंधे करण जी क़ाबिलियत डियण खां सिवाय साहित्य ऐं कला जे खेतर में कामियाबी हासिल करण जो हुनर, सलाहियत ऐं ज़हनियत बि बक्शी आहे। गोविन्द निहालानी जी कामियाबी इन गालिह जी पूरी पूरी पुठिभरायी करे थी। 1962 में बेंगलोर जे Jaya Chamarajendra Polytechnic मां सिनेमेटोग्राफी (फ़िल्मुन जी फोटोग्राफी) में ग्रेजुएशन करण खां पोय गोविन्द मुंबई जी फिल्म इंडस्ट्री में बतोर सिनेमेटोग्राफर कमु करण शुरू कयो।

मुंबई में गोविन्द निहालानी जी पहिरियीं लेखे जोग कामियाबी हुयी मराठी फिल्म “शांतता !कोर्ट चालू आहे ” (शान्ती रखो कोर्ट जो कमु शुरू आहे) हिन फिल्म में गोविन्द सिनेमेटोग्राफर जो कमु करण खां सिवाय, मशहूर डायरेक्टर ऐं ड्रामा लेखक सत्यदेव दुबे सां गडु फिल्म जो प्रोडयूसर बि हो। डायरेक्टर श्याम बेनेगल सां मिली कमु करण जे गोविन्द जे फेसिले खे ऐतिहासिक चयी सघिजे जो छो जो इन जोड़ी न मिली करे केतिरियूं ई डॉक्यूमेंट्री फिल्म्स जिनमे हिक महान सत्यजीत रॉय ते बी हुयी ठाहिण सां गडोगडु 10 खां वधीक फिल्म्स बि ठाहियूं। हिन जोड़ी जी फ़िल्मुन मां “जुनून” सभ खां वधीक मशहूर थी ऐं 1979 में इन फिल्म वास्ते गोविन्द निहालानी खे बेस्ट सिनेमेटोग्राफी जे नेशनल अवार्ड सां नवाज़ियो वियो। जडहिं गोविन्द मशहूर कलाकार गिरीश कर्नाड जी कन्नड़ फिल्म “Kadu” [जंगल] जी सिनेमेटोग्राफी कयी त सजी फिल्म इंडस्ट्री हिन जे हुनर ऐं सलाहियत जी कायिल थी पयी।

1980 में गोविन्द निहालानी जी बतोर सिनेमेटोग्राफर ऐं डायरेक्टर फिल्म “आक्रोश ” पेश कयी हिन फिल्म न सिर्फ कामियाबी हासिल कयी पर गडोगडु दिल्ली जे इंटरनेशनल फिल्म फेस्टीवल्स में गोल्डन पीकॉक अवार्ड बि हासिल कियो। माणुहुन मतलब बॉलीवुड जी दुनिया गोविन्द निहालानी खे हिकु गम्भीर फिल्म ठाहीन्दड शख्स तौर लेखिण लगा। आलमी सतह ते संदस कमु जी तारीफ थियण लगी। रिचर्ड एटनबरो पहिंजे ड्रीम प्रोजेक्ट “गांधी” जी बी यूनिट जे सिनेमेटोग्राफर डायरेक्टर तौर कमु करण जो ऑफर खणी गोविन्द निहालानी सां मिलियो।

ही उहो समो हो जो फिल्म इंडस्ट्री में अमिताभ बच्चन जी एंग्री मन इमेज जो सिको पे हलियो जहिं करे आर्ट फ़िल्मुन जी सख्त ज़रूरत महसूस थिये पयी। इन्हन फ़िल्मुन जो अगुवान हो गोविन्द निहालानी। 1982 में हुन इंडियन एयर फ़ोर्स ते आधारित फिल्म “विजेता” ठाही त 1983 में “अर्ध सत्य” जेका न सिर्फ कमायी जे लिहाज खां कामियाब साबित थी पर उन साल जो बेस्ट हिंदी फिल्म जो नेशनल अवार्ड बि खटियाईं।

भारत में 1984 में थियिल इंटरनेशनल फिल्म फेस्टीवल्स में गोविन्द जी फिल्म “पार्टी ” भारतीय फिल्म तोर शामिल हुयी ऐं इन फिल्म वास्ते अदाकारा रोहणी हट्टंगड़ी खे बेस्ट सपोर्टिंग रोल जो नेशनल अवार्ड मिलियो। 1985 में एशिया पेसिफिक फिल्म फेस्टीवल्स में इन ई फिल्म वास्ते विजया मेहता खे बेस्ट एक्ट्रेस जो अवार्ड मिलियो। गोविन्द निहालानी जी मुखतलिफ सलाहियतुन जो मिसाल आहे 1999 में रिलीज़ थियिल फिल्म “तक्षक ” जी कहाणी ऐं स्क्रीन प्ले गोविन्द लिखियो हो। इन खां अगु 1998 में रिलीज़ थियिल फिल्म “हज़ार चौरासी की माँ ” जो स्क्रीन प्ले पिणु गोविन्द निहालानी लिखियो हो।