हरी हिमथानी (हिमथाणी)

फेमस सिंधी नॉवेल लेखक – अजमेर – साहित्य अकादमी अवार्ड 2002
जडहिं बि सिंधी अदब जी दुनिया में मुल्क जे विरहांङें जी तक़लीफ़ुन खे रचनात्मक ऐं असिरायिती लेखणी सां बयान कर्ण जो ज़िकुरु थिये थो त साल 2002 में अकादमी अवार्ड हासिल कियिल हरी हिमथाणी बियन केतिरन नामवरन खां बि आग़ खटी वठे थो। 13 फरवरी 1933 ते सिंध, नवाब शाह जे गोठ हिसाब में जन्म वठी हरी हिमथाणी 1947 में भारत अची अजमेर शहर में पाणु वसायो। मैट्रिक जो इम्तिहान पास करे हुन रेलवे में नौकरी करण शुरू कयी ऐं रिटायर करण वकत वेस्टर्न रेलवे अजमेर में ऑफिसर जे ओहदे ते हो।
हरी इन गालिह में खुशनसीब हो जो संदस बालपणे जो वडो हिसो कुदरती नज़ारन जे विच में गुजरियो। गोठ हिसाब में फ़क़त 50 खनु कुटुंब रहन्दा हुआ जिन जी रोज़ी रोटीअ जो वसीलो खेती ऐं गायूं मेंहियूं पालिण हो तहिंकरे हरी साईं चादर सां ढकियिल ज़मीन डिसण ऐं शाम जो घर वापस ईन्दड जानवरन जी गिचीअ में बधियल घिंटिन जे मधुर संगीत जो आनंद वठण ते हिरियल हो। भारत अची अजमेर में ज़िन्दगी नयें सिर थायींकीं बणाये हुन विरहांङें जी यादुन खे पहिंजी रचनात्मक लेखणी वसीले ज़ाहिर करण जो इरादो कियो। हरी हिमथानी जी पहिरियीं रचना हिक कहाणी हुयी जहिंजो उनवान हो “प्यार रोयी डिनो ” जेका फेमस ऐं हरदिल अज़ीज़ सिंधी मैगज़ीन कुमारी में छपिजी हुयी।
जे थोरो बि धिआनु डिजे त हरी हिमथाणी जी शुरुआती रचनाउन में न सिर्फ भारत लड़े अचण सबब हासिल दुखन ऐं मन जे असंतोष जो इजिहार नज़र अचे थो पर पहिंजे बालपणे जे खुलियिल माहोल जे खसिजी वंञण जी उदासी बि चिट्री तरह सां ज़ाहिर थिये थी। संदस नॉवेल रात जो बियो पहरु ऐं माज़ी जा दंगा पढिहण वारे सामहूं विरहांङें जे समे जे माहोल ऐं हालतुन खे चित्र रुप में उकेरिण पूरी तरह सां कामियाब थींदा महसूस थियन था। इहो हरी हिमथाणी जी लेखणी खे पसंद करण वारन जी घुर जो असरु हुओ जो 1954 खां 1960 जे छहन सालन जे अरसे में हिन साहिब जा पंज नॉवेल छपजिया।
कल्पना खे अखरन में बियानु करण में हरी हिमथाणी खे महारत हासिल हुयी ऐं संदस लेखणी घणे भाङे आर्थिक रुप में विचोले दरिजे जे कुटुंब जे जीवन ते आधार रखन्दड रही आहे। हरी हिमथाणी जी लेखणी बाबत, सिंधी अदबी दुनिया जे नामवर लेखक प्रो. नामदेव ताराचंदानी जो चवण आहे ” … His story telling is so unique in its continuity sustained interest that it is impossible to part from his book until it is completely read. If the light went out, the reader would light a candle and would continue reading.“ 
1960 खां 1970 इहे डह साल हरी हिमथानी हिक किसम सां अदबी दुनिया मां सनियासु वठी गुजारिया। हक़ीक़त में हुन 1960 में हुन पहिंजी बायोग्राफी लिखण जी शुरुआत कयी। पूरा ट्रे साल पहिंजे कमरे जे एकांत में गुजारे लगभग 1500 सुफन वारो रफ़ ड्राफ्ट तैयार कियो हुओ पर डियारी जी सफाई दौरान वड़े भाउ अणजायीअ इहे सुफ़ा कहिं घर बिना कम वारियूं शयूं वठण आयल कबाड़ी खे डयी छड़िया। इन गालिह जो हरी ते ऐतिरो गहिरो असर थियो जो पंज अठ साल हुन कुछ बि न लिखियो।
हिन जे साहित्यिक सफर जी नयीं शुरुआत 1970 में लिखियिल ऐं 1972 में छपियिल नॉवेल “डिंगयूं फिडियूं लकीरुं” सां थी। हरी हिमथाणी जा लिखियिल कुछ नाटक आल इंडिया रेडियो जयपुर तां ब्रॉडकास्ट थी चुका आहिन। “ज़िन्दगी, कुमारी ऐं कलाकार ” जहिडिन अदबी मैगजीन्स में हरी हिमथानी जा लेख लागीतो छपिजंदा पिया रहिया आहिन। हिन जा कुछ लेख सिंध जी अदबी मैगजीन्स में बि छपजिया आहिन।
हुअं त साल 2020 खे कोरोना सबब तक़लीफ़ुन भरियो साल लेखियो पियो वंञे पर इहो साल वेन्दे वेन्दे पहिंजे आखिरी महीने जे पहिरियें ई डीन्ह ते मतलब 01 दिसंबर 2020 ते सिंधी अदबी दुनिया लाय हरी हिमथानी जे सुरगुवास जी दुख भरी खबर खणी आयो।
हरी हिमथाणी जन जे किताबन जे कवर जा फोटो मोकिलिण वास्ते असां श्री मोहन हिमथाणी जन जा शुकुरगुज़ार आहियूं।