अमर शहीद हेमू कालानी

भारत जे नवजवान फ्रीडम फइटर्स मां हिकु, सिंधी कौम जी आज़ादी जी तमन्ना जो नुमाईंदो अमर शहीद हेमू कालानी 23 मार्च 1924 ते सखर सिंध में जाओ हो। संदस माता जो नालो जेठी बाई त पिता जो नालो पेसुमल कालानी आहे। इहा तमाम दुख जी गालिह आहे त सिंध जे हिन वीर ऐं सिंधी कौम में जन्म वरतल महान आत्मा जी जिस्मानी हयाती तमाम घटि (जहिं खे अंग्रेजी में even before completing Teen Age चयबो आहे ) मतलब अुणवीहन सालन खां बि घटि हुयी। हेमू कालानी हिकु होनहार ऐं होशियार विद्यार्थी हो जहिं सखर जे नामवर तिलक हाय स्कूल मां 1942 में मैट्रिक जो इम्तिहान तमाम सुठियूं मार्कुं खणी पास कियो हो।

1942 जो साल जे हेमू जी तैलिमी ज़िन्दगीअ में मैट्रिक जे इम्तिहान डियण जे सबब अहमियत वारो हो त भारत जी आज़ादी जी हलचल में बि साल 1942 तमाम वडी अहमियत रखे थो। महात्मा गांधी जे चवण ते सजे मुल्क में नॉन को ऑपरेशन मूवमेंट हले पयी। हेमू जो चाचो डॉ मंघाराम कालानी सखर जे नामवर देश भगतन ऐं महात्मा गांधी जी पुठ भरायी कन्दडन में शामिल हो। डॉ मंघाराम कालानी आज़ादी जी सुजागी वास्ते जेके प्रभात फेरियूं कढन्दो हो हेमू उन्हन प्रभात फेरिन में शामिल थियण लगो। दर असल इन्हन प्रभात फेरियिन ई हेमू कालानी जे बाल मन में सिंधी कौम जी आज़ादी जी तमन्ना जो नुमाईंदो बणिजण जो बिजु पोखियो वयो।

सजे मुल्क में अंग्रेजन जे राज्य खे हटाये, आज़ादी हासिल करे पहिंजी हुकूमत कायम करण जो माहोल हो। मुल्क जा सभु अलग अलग विचारन ऐं सिद्धांत वारा ग्रुप आज़ादी हासिल करण जी हिक मुराद सां गडु थी अंग्रेजी राज जी मुख़ालफ़त पया कनि. हेमू कालानी बि शांत कोन रही सघियो ऐं हू मुल्क जी आज़ादीअ वासिते ज़ेर ज़मीन या लिकियल नमूने कमु कन्दड हिक गिरोह में शामिल थियो। उन्हन डीहंन में अंग्रेजन जी मिलेट्री वसीले आम माणुहुन खे तकलीफ डियण हिक रवाजी गालिह हुयी सो हिन गिरोह रेलवे लाइन जूं पटिडियूं कढ़ी मिलेट्री जे हिक जगह खां बी जगह पहुचण जे सिलसिले में रुखनो पैदा करण जो फेसिलो कयो। बदकिसमती सां जहिं रात जो पटिडियूं कढण ते अमल थियो सा चांड्रोकी रात हुयी ऐं हेमू कालानी बियन ट्रिन [3] साथियिन सां गडु रेल जे बंदन खे उन्हन जी जगह तां हटाईंदे पकिड़ियो वयो।

गिरफतार हेमू जे घर जी तलाश में मिलियिल लिथो प्रेस ऐं बियन ऐतिराज़ लायिक मिलियिल शयुन खे पुलीस मार्शल लॉ कोर्ट में हाज़िर कियो। उन्हन डीहंन में सखर मिलेट्री राज हेठि हुअण सबब सजे सखर जिले में मार्शल लॉ लागू हो। कोर्ट हेमू कालानी वासिते ताउम्र क़ैद जी सजा जी तज़वीज़ कन्दे पहिंजो फेसिलो वडी अख्तियारीअ वारन डांहु वधीक कार्यवाही वासिते हैदराबाद मोकिलियो। वडी अख्तियारीअ वारन जो फेसिलो हो त हेमू खे इन खां वडी सजा मिलण घुरिजे सो उन्हन ताउम्र क़ैद खे फासीअ जी सजा में बदिलायो।

हिन फेसिले सिंध ऐं सजे मुल्क में गुसे जी लहर पैदा करे छड़ी। सजे मुल्क मां माणुहुन हिन बेरहम फेसिले खे बदिलायिण वास्ते सरकारी ओहदेदारन खे तार मोकिलिण जो सिलसिलो शुरू कियो वेन्दे साधु वासवानीअ ऐं श्री जमशेद जी बि दया जी अपील कयी पर सभ कोशिशूं नाकाम साबित थियूं।

21 जनवरी 1943 जी सुबहअ ते सखर जेल में हेमू कालानी खे फासी ते लटकायो वयो। उन वक़त जेल में मौजूद अंग्रेजन लाय त इहा वडे अज़ब जी गालिह हुयी त हेमू जहिं जी उमर उन वक़त अुणवीह साल बि कोन हुयी तहिंजे चेहरे ते मौत जे ड्रप जी का बि निशानी नज़र न पे आयी उबितो जेल में रहण जे दौरान हिन जो वज़न सत पौंड वधी वयो हो।

जेल जे ओहदेदारन मूजिब हेमू जी आखिरी इच्छा भारत जी पवित्र भूमीअ ते वरी जन्म वठण जी हुयी। हिन सचे सिंधी सपूत, आज़ादी जे बहादुर सिपाही जा आखिरी अखर हुआ “इंक़िलाब ज़िंदाबाद ” “भारत माता की जय ” । सरकार जी घणी कोशिश खां पोय बि हेमू कालानी जे अगिनी संस्कार डींहुं सखर में हिक किसम जी हड़ताल हुयी छो जो सभ सखर वासी पहिंजी नौकरी ते न वञी या दुकान बंद रखी हेमू जे अंतिम संस्कार में शामिल थिया हुआ।