पोपटी हीरानंदानी
TSW Citation
फेमस सिंधी साहित्यकार – इन्किलाबी लेखिका – साहित्य अकादमी अवार्ड 1982
सिंधी साहित्यकार, तैलीमदान पोपटी हीरानंदानी उन ज़माने में पहिंजे कम में कमालियत (perfection) जो मुजाहिरो कयो आहे जंहि समे में अज़ु जी फ़िल्मी दुनिया में मिस्टर परफेक्‍शनिस्‍ट तोर मशहूर कलाकार जो जन्म बि कोन थियो हुओ। सिंधी अदबी दुनिया में पोपटी खे इंकलाबी सिंधी औरत जो लक़ब हासिल आहे ऐं इहो अजायो बि न आहे। जंहि समे में सिंधी औरत जे इश्क़ ते गालिहायिण खे खराब गालिह लेखियो वेन्दो हो उन समे पोपटी न सिर्फ आशिक़ी जी शायरी, नज़म लिखी पर उन विषय ते थियण वारिन विचारन जी डे वठु में बि बिना झिझक शामिल थींदी रहे। इहा पोपटी जी कम में कमालियत हासिल करण जी खूबी आहे जो सिंधी साहित्य जो को बि अहिड़ो उफ़क़ कोन आहे जंहिं में पोपटी योगदान न डिनो हुजे। उन समे त संदस आत्मकथा मुहिंजी हयातीअ जा सोना रूपा वरक़ हिकु बेहद मशहूर सिंधी किताब हुयी ई पर अजु चालीहन सालन खां पोय बि मशहूर सिंधी किताब आहे।
बायोग्राफी - पोपटी हीरानंदानी
इन्किलाबी विचारन वारी फेमस सिंधी लेखिका पोपटी हीरानंदानी जो जन्म 17 सितम्बर 1924 ते कराची सिंधी में थियो हो। हुअ पंहिजे माउ पीउ जे सतन बारन मां हिक हुयी। पोपटी जो जन्म पढ़ायी जी रिवायत वारे आमिल कुटुंब में थियो हो। हिते असां खे इहो याद रखण बि ज़रूरी आहे त सिंधी कौम में पढ़ायी वासिते का खास कशिश नज़र न अीन्दी आहे ऐं छोकिरिन जी हालत में त हालतूं वधीक ख़राब हुंदियूं आहिन। खुश किसमती सां विरहांङें खां पोय घटि में घटि भारत में त हालतुन में बदिलाव आयो आहे ऐतिरो जो अजु पढ़हन्दड सिंधी छोकिरन जी भेट में सिंधी छोकिरिन जो तादाद वधीक आहे।
पोपटी जी उमर सिर्फ डह साल हुयी जो संदस पिता जो सुरगवासु थियो सो हुन बालपणे में तकलीफ जा डीहं त डिठा पर गडोगडु माउ जी उन्हन सभनी परेशानिन जो बि अहसास महसूस कियो जिन खे मुहं डयी माउ सतन बारन खे पाले पयी। माउ जी परेशानीअ पोपटी खे हिमथ ऐं होसिले सां धीरज रखी डुखिये वक़त खे मुहं डियण जी सिखिया डिनी। पिता जे सुरगुवास खां पोय पोपटी जी माउ हैदराबाद में रहण जो फेसिलो कियो।
पोपटी जेको पहिरियों इन्किलाबी फेसिलो कियो सो हुओ जेको छोकिरो डेती लेती में विशवासु न करे उन सां शादी न करण। छो जो आमिल कुटुंबन में पढ़ायी जी रिवायत सां गडु तमाम घणी डेती लेती जी रसम बि हुयी। हुन कुंवारों रहण जो फेसिलो करे माउ खे मज़बूर कियो त संदस मंङणे वक़त छोकिरे वारन खे डिनिल सभु सामान वापस वठे। विरहांङें खां पोय कुटुंब मुंबई अची रहियो हो।
मुंबई में पोपटी टीचर जी नौकरी कन्दे साहित्य सिरजन [रचना] में लगी पयी हुयी। पहिंजे कम ते पोपटी घणो धिआनु डीन्दी हुयी इन जो अंदाजो इन गालिह मां मिले थो त पोपटी स्कूल जे बारन खां वठी कॉलेज जे बारन खे सेखारियो आहे। रिटायरमेंट वठण वक़त हुअ मुंबई जे के सी सी कॉलेज में सिंधी विषय जी लेक्चरर हुयी। सिंधी साहित्य में संदस योगदान ते पिणु धिआनु डिजे त सामहूं अचे थो साहित्य जे हर उफ़क़ चाहे उहा सिंधी कवीता या सिंधी कहाणी या वरी अदबी नुक़तचीनी, मज़मून हुजन या बायोग्राफी लिखण या वेन्दे सिंधी भाषा बाबत लिखणो हुजे हर साहित्यिक दायिरे में पोपटी जी लेखे जोगि मौजूदगी ऐं योगदान रहियो आहे। इहो डेखारे थो चाहे विचारन जी सतह ते पोपटी खे इंकलाबी सिंधी औरत छो न लेखियो वेन्दो हुजे पर कम जे मामले में कमालियत (perfection) हासिल करणु जणु त संदस सुभावअ जो क़ुदरती हिसो हुओ।
हुअ समाज में औरत जी इज़त आबरू ऐं ओहदे जी हिफाज़त ऐं सामाजिक तोड़े हर खेतर में वाधारे वासिते न सिर्फ सुजाग हुयी पर इन डाव में कोशिशूं बि करे रही हुयी। पोपटी हीरानंदानी खे इन्किलाबी लेखिका सडिजण जे पुठियां हिकु वडो सबब हो संदस इशक जहिड़े विषय ते लिखण जो फेसिलो करण। मरदन जी हुकूमत वारे समाज में उन वक़त त औरत जो इशक ते गालिहायिण बि मुनासिब न समझियो वेन्दो हो। पोपटी हीरानंदानी पहिंजी बायोग्राफी में बि लिखियो आहे
“औरत सहन करण वास्ते ठही आहे पर इहो संदस चरित्र में कहिं खराबीअ सबब न सिर्फ इन करे आहे जो हुन औरत थी जन्म वरतो आहे।”
1982 में साहित्य अकादमी पोपटी हीरानंदानी जे साहित्यिक योगदान जी क़दुरशिनासी कन्दे संदस लिखियिल आत्मकथा “मुहिंजी हयातीअ जा सोना रूपा वरक़” वासिते साहित्य अकादमी अवार्ड (सिंधी भाषा) सां नवाजे संदस सत्कार कयो। आवर्ड डियण जे जाहिरनामे में साहित्य अकादमी पारां लिखियिल हो
पोपटी जी हिअ आत्मकथा सिंधी समाज खे समझण में मदद करण सां गडु मुल्क जे विरहांङें सबब पैदा थियिल दर्दनाक हालतुन जो बयान करे थी।
हयाती जी पछाड़ीअ में पोपटी कैंसर जहिड़ी बीमारी जो शिकार बणी ऐं केतिरा साल बीमारी जा सूर सहण खां पोय 16 दिसंबर 2005 ते मुंबई में हिन जो सुरगुवास थियो।
हासिल के खासु ओहदा :
1970 आल इंडिया रेडिओ जी मुंबई जी ऑडिशन कमेटी जे सलाहकार मेंबर तोर ऐं भारत सरकार जे तेलीमी खाते जे सिंधी भाषा सलाहकार बोर्ड जे मेंबर तोर
1974 अखिल भारत सिंधी भाषा ऐं साहित संघ जे सेक्रेटरी तोर
1977 में विगियानिक ऐं तकनीकी पदन जी डिक्शनरी तियार करण वारी कमेटी में शामिल हुजण
1979 में UPSC जी सिलेक्शन कमेटी जे मेंबर तोर
1980 साहित अकादमी जी सलाहकार कमेटी जे कनवीनर तोर
अदबी योगदान - लिखियिल किताब
पोपटी जी बेमिसाल रचना हुयी सिंधी साहित्य जो इतिहास। हिन जा लिखियिल बिया किताब आहिन:
1953 – पुकार (सिंधी कहाणी संग्रह)
1956 – मंजू (सिंधी नॉवेल)
1953 – रंगीन ज़माने जूं गमगीन कहाणियूं (सिंधी कहाणी संग्रह)
1962 – भाषा शास्त्र
1962 – हिकु पुष्प पंदिरिहां पंखिडियूं (कवीता संग्रह)
1967 – मूं तोखे पियार कयो
1975 – रूह संधि रुंच (कवीता संग्रह)
1975 – ज़िन्दह सा कौम रहन्दी
1978 – खिज़ाउन जो दौरू पूरो थियो
1980 – मुहिंजी हयातीअ जा सोना रूपा वरक़ (आत्मकथा)
1980 – सैलाब – ज़िन्दगीअ जो (सिंधी नॉवेल)
1983 – शाह – सिंधी तहज़ीब जी रूह (अदबी नुकतचीनी)
1985 – सिंधी कल्ह ऐं अज़ु (मज़मून)
1988 – मां सिन्धिणी (कवीता संग्रह)
1993 – जिंदगीअ जी फोटरी (सिंधी कहाणी संग्रह)
1993 – माणिक मोतीला (जीवनी)
Books Window
अवार्ड
साहित्य अकादमी अवार्ड (सिंधी भाषा): 1982
किताब जो उनवान: मुहिंजी हयातीअ जा सोना रूपा वरक़ [आत्मकथा]
बिया अवार्ड ऐं सतिकार :
1990 में महाराष्ट्र सरकार पारां गौरव पुरसकार ऐं असीं सिंधी दुबई पारां अवार्ड
1993 सिंधी अकादमी पारां अवार्ड ऐं अखिल भारत सिंधी बोली ऐं साहित सभा पारां सतिकार
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.