शिव - शिवरात्री
शिव बाबत
हीउ सिंधी [हिंदु] डिण भोले भंडारी, महादेव शंकर भगवन सां लागापो रखे थो। इंडस वैली सिविलाइज़ेशन खां सामाजिक जीवन जी शुरुआत कन्दड सिंधी क़ौम हीउ धार्मिक डिण सच्ची श्रद्धा ऐं वड़े जोश सां मलिहायिंदी आहे। शिव डींहु सुबह जो सवेल प्रभात वेले उथी भर वारी नदी में “ओम नमो शिवाय ” ऐं “हर हर महादेव ” जो मन्त्र जपीन्दे स्नान करण खां पोय शिव मंदिर में पूजा पाठु करण जी रिवायत आहे।
हालांकि असां वट हिते गांधीनगर [कोल्हापुर] में को आलिशान शिव मंदिर कोन आहे – हिकु नंढो नीलकंठ मंदिर सरकारी हॉस्पिटल भरसां ऐं हिक शंकर भगवन जो मंदिर, पंचगंगा नदीअ किनारे मसूबाबा इते – तहिं हूंदे बि शिव या शिवरात्री वड़े जोश सां मलिहायिण जी रिवायत आहे। पंचगंगा नदी में स्नान करे भोले भंडारी शिव शकर जो दर्शन करण खां पोय फ़किरन साधु दरवेशन खे दानु डियण जी रीत आहे।
गांधीनगर कोल्हापुर जा केतिरा सामाजिक ऐं व्यापारी मंडल पंचगंगा नदीअ जे रस्ते ते खास मांडा लगाये श्रद्धालुन में तरह तरह जा खाधे जा पदार्थ विरहाईन्दा आहिन। मंझंद खां पोय शाम धारे मशहूर सिंधी कोल्ड ड्रिंक थाधल ठाही ऐं विरहायी वेन्दी आहे।
शिव - महाशिवरात्री - धार्मिक अहमियत ऐं पूजा पाठु
शिव हिकु सियारे जी मुंद जो सिंधी डिण आहे जेको सिंधी महीने फगुण [अंग्रेजी महीनो फरवरी – मार्च ] जी उन्धायिन जे तेरहें डीहं [ कडिहिं चोदिहें डीहं] ते मलिहायो वेन्दो आहे। शिवरात्री लफ़्ज़ी मयना आहे शिव खे अर्पण कयल राति । हिन्दु इतिहास मुजीब इहा उहा राति आहे जहिं ते शिव पार्वती जी शादी थी हुयी। इहो पिण विशवास आहे त शिव जे डिन्ह ते गंगा या बि कहिं पवित्र नदी में सिनानु करण सां जन्म मरण जे चकर खां मुक्ति मिलन्दी आहे तहिं करे शिव जे डीहं ते नदीयिन में सिनानु करण वारन जो तादाद वधी वेन्दो आहे। सिनानु करे पूजा पाठ सां गडु शिवलिंग जो खीरु मिलियिल पाणी, तुलसी जा पन ऐं माखीअ सां अभिषेक करण जी रीत बि आहे।
सिंधी खाधो :
सिंधी कुदरती कोल्ड ड्रिंक थाधल शिवरात्री ते ज़रूर ठाही वेंदी आहे ऐं प्रसाद तोर पिणु विरहायी वेंदी आहे।
भारत में ज्योतिर्लिंग
भगवान शंकर जा भारत में अहमियत वारा 12 पवित्र आसथान आहिन जिन खे ज्योतिर्लिंग (जोतिरिलिंग) चयबो आहे। इन्हन मां महाराष्ट्र में ट्रिन , गुजरत, मध्य प्रदेश ऐं उतर प्रदेश में बिन बिन आसथानन ते ज्योतिर्लिंग आहिन त आंध्र प्रदेश, झारखण्ड ऐं तमिल नाडु राज्य में हिकु हिकु जोतिरिलिंग आहे। भारत जे 12 जोतिरिलिंगन जी लिस्ट हेठ डिजे थी : –
आंध्र प्रदेश – मलिकार्जुन
गुजरात – नागेशवरा
गुजरात – सोमनाथ
झारखण्ड – वैद्यनाथ
मध्य प्रदेश – ओंकारेश्वर
मध्य प्रदेश – महाकालेश्वर उज्जैन
महाराष्ट्र – भीमाशंकर
महाराष्ट्र – गृष्णेश्वर
महारष्ट्र – त्रयंबकेश्वर
तमिल नाडु – रामलिंगेश्वरर
उतर प्रदेश – काशी विशवनाथ
उतर प्रदेश – केदारनाथ