स्वामी भगत प्रकाश

प्रेम प्रकाश मंडल जा संत – फेमस सिंधी संत – अमरापुर स्थान जयपुर
जयपुर जे प्रेम प्रकाश आश्रम में रहन्दड सतगुरु स्वामी भगत प्रकाश महाराज प्रेम प्रकाश मंडल जे मशहूर संतन मां हिकु आहिन। भारत तोड़े विदेश में हज़ारें श्रध्दालू स्वामी भगत प्रकाश जन जी रुहानी रहबर ऐं गुरु रूप में पूजा कन्दा आहिन।
हिन धरतीअ ते जन्म वठण वारिन किन चूंड आत्माउन खे इहो वझु मिलन्दो आहे त उन्हन जी हयाती गुरु सां गडु रही गुरु सेवा सां शुरू थिये ऐं गुरु पाण उन्हन जी दुनियावी जीवन जी बुनियाद रखे। स्वामी भगत प्रकाश इन्हन चूंड आत्माउन में शामिल आहिन। किन सिंधी कुटुंबन में गुरु सेवा वास्ते हिक औलाद गुरुन खे डियण जी रिवायत मूजिब हू स्वामी सर्वानंद महाराज जन खे डिना विया हुआ। स्वामी सर्वानंद जन न सिर्फ हिन बालक खे दुनियावी सिखिया (तैलीम) जी वाकफियत डिनी पर गडोगडु सचे ज्ञान सां संदस ज़िंदगीअ खे मालामाल कयो।

स्वामी भगत प्रकाश जो जन्म 1960 में सिंधी महीने कती जी पूर्णिमा तिथ (निसबती तारीख 03 नवंबर) ते थियो आहे। सन्दन माउ नालो कौशलियाबाई ऐं पीउ जो नालो टीकमदास खिलनानी आहे। छटीअ डीहुं इन बालक जो नालो रखियो वियो हो धर्म दास, जहिंजो अखरी अरथु आहे धर्म जो दास। धर्मदास जो नानाणो कुटुंब स्वामी सर्वानंद जो पको भगत हो। उन्हन जी सलाह ते खिलनानी कुटुंब बालक धर्मदास खे गुरु सेवा वासिते डियण जो फेसिलो करे धर्मदास खे अमरापुर स्थान जयपुर स्वामी सर्वानंद वटि मोकिलियो। स्वामी जन बि हिन बालक जी पहिंजी औलाद वांगुर संभाल कयी।

स्वामी सर्वानंद बालक धर्मदास जी स्कूली तैलीम ते बि खास धियान डिनो जहिंजे नतीज़े तौर धर्मदास हिन्दी, संस्कृत ऐं इंग्लिश में M.A. जो इम्तिहान फर्स्ट किलास में पास कयो। बालक धर्मदास में सेवा जी भावना में वाधारो थिये ऐं हुन में श्रध्दालुन जे दुख दर्द खे समझण जी सलाहियत वधे इन लिहाज खां धर्मदास खे कुछ वक़त हरिद्वार जे प्रकाश आश्रम में सेवा करण वासिते बि मोकिलियो वयो हो। स्वामी जन धर्मदास जो नालो बदिलाये खेस नओं नालो भगत प्रकाश डिनो। भगत प्रकाश कुछ डीहं प्रेम प्रकाश आश्रम मुंबई में बि गुजारिया।

स्वामी भगत प्रकाश प्रवचन ऐं सतसंग जो हिक नओं तरीको शुरू कयो आहे। स्वामी जन सतसंग जी शुरुआत प्रेम प्रकाश मंडल सां लागापो रखन्दड रिवायती सिंधी भजन सां कन्दा आहिन जीयं श्रध्दालुन जो धिआनु सतसंग में त लगे ई पर गडोगडु उहे पाण खे सिंधी भाषा सां जुडियल महसूस कनि। तहिं खां पोय स्वामी भगत प्रकाश प्रेम प्रकाश मंडल जे सतगुरुन जी सिखियाउन बाबत प्रवचन कन्दा आहिन।

स्वामी भगत प्रकाश जन सतगुरु स्वामी टेऊँराम जन जी गदीअ जा पंजा गदेसर ऐं प्रेम प्रकाश मंडल जा पंजा अध्यक्ष आहिन। स्वामी जन जयपुर आश्रम में सतसंग ऐं धियान करण जी सहूलियतूं त वधायूं ई आहिन पर गडोगडु इहो बि नियम ठाहियो आहे त जयपुर में हूंदे आश्रम में सुबूह शाम थियण वारो सतसंग पाण कन्दा आहिन।

प्रेम प्रकाश पंथ जे सालानो उत्सवन में चैत्र मेलो हिकु अहमियत वारो उत्सव आहे। अमरापुर स्थान जयपुर में हुजण सबब शुरुआत खां ई जयपुर में चैत्र मेलो वडी धूम धाम सां मलिहायो वेन्दो आहे। चैत्र मेलो वासिते सजी दुनिया मां हज़ारे विशवासु जयपुर ईन्दा आहिन। स्वामी भगत प्रकाश जन न सिर्फ चैत्र मेलो वासिते अचण वारन जे रहण जे सुठे बन्दोबस्त वासिते आलिशान इमारत ठाहिरायी आहे पर चैत्र मेलो उन पैमाने ते मलिहायिण शुरू कयो आहे जो चैत्र मेलो हाणे सिरफ प्रेम प्रकाश पंथ जो हिकु उत्सव न रहियो आहे पर चैत्र मेलो जयपुर शहर जो आइकोनिक उत्सव बणिजी पयो आहे।