डॉ विनोद आसुदानी

सिंधी अदबी जगत में बेहतरीन गजल लिखण वारे साहितकार जी वकिफियत रखण वारे डॉ विनोद आसुदानी जो जनम, नारंगिन वासिते मशहूर अयं महाराष्ट्र जी विदरभ ऐराजी जे रहवासी लक्ष्मीदेवी अयं हरदयालदास आसुदानी जे पुट तोर 01 जनवरी 1969 ते थियल आहे। सिंधी चवणी हिक लटे सउ पटे – हर बंद थियण वारी राह बंद थियण खां अगु सउ रसिता खोले वेंदी आहे – जो हकीकी अरथु विनोद आसुदानी जे जीवन में चिटी तरह सां नजर अचे थो। कुदरत या परमातमा जेकडहिं विनोद जे नेणन खे जनम खां ई बेनूर रखियो त खेसि बेहतरीन समझण जी सलाहियतुन अयं सियाणप जी मिलकियत जो धणी बि बणायो आहे। तेलीम हासिल करण वारे अरसे में चाहे S.S.C. हुजे H.S.C. या B.A. जो नतीजो हुजे हर भेरे विनोद जो नालो मेरिट लिसट में शामिल नजर आयो हुओ। जडहिं विनोद आसुदानी English, History अयं Sociology में M.A. जी डिग्री हासिल कयी त खेसि गोलड मेडल सां नवाजियो वियो।
पहिंजे तेलीमी खेतर खे वधीक उचाई वारो मुकाम डींदे विनोद अनामलाई यूनीवरसिटी मां एप्लाइड साइकोलॉजी में M.Sc. करण खां सिवाय RTM यूनीवरसिटी मां ब भेरा Ph.D. कयी आहे। पहिरियों भेरो अंग्रेजी में त बियो भेरो साइकोलॉजी में। विनोद आसुदानी जे सामाजिक कमन जी कदरशिनासी कंदे डॉ एस राधाकृष्णनन फाउंडेशन भारत जी सिफारिश ते यूनीवरसिटी ऑफ़ साउथ अमेरिका खेसि इजत तोर डाकटर ऑफ लेटरस (D.Lit.) सां नवाजियो आहे।
सिंधी अयं अंगरेजी साहित सिरजनकरता तोर हाकारे डॉ विनोद आसुदानी खे पंडित (हिंदी साहित) अयं भाषा इसतानक (मराठी) हुजण सबब हिंदी अयं मराठी साहितिक खेतर में अखतियारी हुजण वारी शखसियत तोर सुंञातो वेंदो आहे।