इयें ई Blog in Sindhi Devanagiri

काफी समे खां सिंधी भाषा ऐं सिन्धियत बाबत लिखण खां पोय अजु मनु में खियालु आयो त छो न व्हाट्सप्प जे दोस्तन वास्ते कुछ इयें ई पिण लिखां ? पर इयें ई छा लिखां इहो सवाल नांग वांगुर फणु कढ़ी सामहु अची बि रहियो। इन सवाल खे पूरी तरह समझां या मुंहु डियां उनखां अगु मुहिंजो पुराणो वाक़िफ़ निखमिणोमल बि अची पहुतो। अगते वधण खां अगु इहो ज़रूरी आहे त तव्हां खे निखमिणोमल जी वाकफियत डियां। 
मुहिंजे नाने जे गोठ जो रहवासी निखमिणोमल सरकारी नौकरी मां कुछ साल अगु रिटायर थियल शख्स आहे। संदस बिन पुट्रन मां हिकु मुंबई में मल्टीप्लेक्सन जो मालिक आहे त बियो मदुरै में नौकरी कन्दे पहिंजा शो रूम खोले वेठो आहे। निखमिणोमल खे हिक धीउ मोहनी बि आहे जा शादी करे मूड़स जो मैनहटन अमेरिका में हलन्दड़ मल्टी ब्रांड माल पयी संभाले। संदस घरवारी जो स्वर्गवास थिये बिन सालन खां वधीक जो अरसो गुजिरी चुको आहे, मतलब त रिटायर निखमिणोमल छुटल बैल वांगुर आज़ादी ऐं बेफिकरीअ जी ज़िंदगी पियो गुज़ारे। हर महीने सरकारी पेंशन त पयी ई मिली मथां बयी पुट्र बि बिना विसारे हर महीने बैंक ट्रांसफर पिया डियन। नियाणी मोहनी साल बिन में जडिहिं बि अचे त निखमिणोमल जे बैंक खाते में डॉलरन जी इंट्री ज़रूर थिये। 
आसूदगीअ  जे अंगण में रहण वारे निखमिणोमल कुछ बियन रिटायर थियलन जे सहयोग सां हिक संस्था [हाणे कहिं सिंधीअ वटि पैसा ऐं वकतु बयी हुजन ऐं उहो का संस्था न ठाहे इहा त अणथियणी गालिह आहे न ] बि ठाही आहे। आखिर सजी उमिर समाज खां वरतो ई वरतो आहे सो मोट में कुछ डियण बि ज़रूरी आहे न ? इन डियण जे सिलसिले में, जे निखमिणोमल जे व्हाट्सप्प ते रोज़ सौ बी सौ मेसेज फॉरवर्ड न करे त लगंदो अथस त अजु नेरन ई कोन कयी आहे। खैर।
निखमिणोमल जे सामहूं हूंदे मूं लाय पहिंजे सामहूं बीठल सवाल सां विचारन जी डे वठु करण जो न सवाल आहे न को मतलब। छो जो निखमिणोमल मतलब सजी दुनिया जी खबरुन जो भंडार। हाणे जे समुन्ड सामहूं हुजे त फुडे बाबत सोचिण समझदारी त न थींदी। विहंदे ई निखमिणोमल शुरू थी वियो। 
एस पी सर सलाह त डियो ! अजु कलह चवन था पंजाहु हज़ारन खां बि घटि खरचु करे पंज डीन्ह दुबई जी सैर करण मुमकिन आहे ? 
मुखे याद अची वियो त हिक संस्था दुबई में सिंधी सम्मेलन करे रही आहे। सो मां निखमिणोमल खे समझायिण चाहियुम त इहो सैर जो प्रोग्राम न पर सिंधी भाषा ऐं सिन्धियत जे वाधारे जी हिक कोशिश आहे। पर निखमिणोमल जा पहिंजा ई तरक हुआ। 
एस पी सर तव्हां बि अलाये छा जो छा पियो चवो ? मां अगमें बि गोवा घुमी आयो आहियां न ? उन वक़्त बि इन नमूने जी गालिह थी हुयी पर मुखे खबर आ त तक़रीरुन वक़त अधु डेलीगेट्स त कमरे में आराम पिया कनि उहे बाहिर निकता ई ताडिहिं जडिहिं डिनर रेडी थी वियो। क्रूज़ ते बि स्टेज ते सिंधी प्रोग्राम पियो हले पर सभु खायिण पियण में पूरा हुआ।
मुखे बि याद आयो त बराबर कुछ वक़त अगु निखमिणोमल पाण सां गडु पहिंजे खरच ते बियन ट्रिन रिटायर शख्सन खे वठी गोवा में हिक अखिल भारत सिंधी संस्था जे सम्मलेन ते वियो हो ऐं मोटी अची अटकल महीनो खनु गोवा जी मौज़ बयान करण में रुधियिल रहियो हो।
सो मूं विचार कियो त निखमिणोमल हिन भेरे बि पक बियन खे पहिंजे खरच ते दुबई वठी वेंदो – आखिर समाज जे डिनिल खे मोटायिण बि हुन जो फरज़ु आहे ? – त छो न मां इन मोके जो फायदो वठां ऐं सिंधी भाषा ऐं सिन्धियत जी महफ़ूज़ी जी हलचल सां जुडी बिना खरच पहिंजो नालो कियां ? बस इहो विचार आयो ऐं मुहिंजे गालिहायिण जो लहजो बदिलजी वियो। मुहिंजा विचार बुधी निखमिणोमल चयो 
एस पी सर तव्हां चवो त बिलकुल सही था। तव्हां जहिड़ो शख्सु साणु हूंदो त दानु कियिल गायिं जो पुच्छ पकडे वैतरणी पार करण वांगुर मां बि सिंधी भाषा ऐं सिन्धियत ते गालिहायिण सां गडोगडु इन विषय खे कुछ त समझी सघंदुम ? पर गालिह पंजाहु हज़ारन जी आहे ? मथां वरी तव्हां जो पासपोर्ट बि ठाहिरायिणो पवन्दो ? उन ते बि खरचु थींदो ? सो मुखे सोचिणो पवन्दो। 
निखमिणोमल त हली वियो पर दोस्तों मेहरबानी करे हिन पोस्ट खे फॉरवर्ड न कजो। जे निखमिणेमल पढ़ी वरतो त थी सघे थो तव्हां जे अज़ीज़ एस पी सर जे हथन मां दुबई वञण जो हीउ मोको निकरी वञे।
जे तव्हां खे पसन्द आयो ऐं वाहेगुरु जी महर रही त हीउ इयें ई जो सिलसिलो अगते बि इयें ई कायम रखण जी कोशिश कंदुम। हिन लेख ऐं इयें ई सिलसिले जे बियन सभनी लेखन खे  खे हिक तंज न पर मज़ाकिया रचना जी नुक्ते निगाह सां डिसण जी मेहरबानी कंदा। 

सिंधियत सुहिणी रहे
एस पी सर (मंघिरमलानी) कोल्हापुर 
01 जनवरी  2018