झूलेलाल जन्म साखी - Life of Jhulelal

जे डिसजे त सिंधियिन खे साईं नाले सां सडु करण हिन्दु धर्म जी पुरातन परम्परा मूजिब आहे। मिसाल तोर विष्णु जी पूजा करण वारा वैष्णव लेखिया वेन्दा आहिन चाहे उन्हन खे इन नाले सां सड़ियो न वेन्दो हुजे। सिंधी लाल साईं झूलेलाल जी पूजा कन्दा आहिन मतलब झूलेलाल साहिब सिंधी कौम जा आराधिय देवता आहिन सो झूलेलाल साहिबन जे नाले सां जुडियिल अखर साईं सिंधी कौम जे हर शख्स जो आमु नालो बणिजी मशहूर थी वयो। हुअं बि सिंधी भाषा में आम तोर अखर साईं रूहानी रहबर, धर्म गुरु या मालिक लाय कमि अचे थो।

जहिं समे मुसिलमान हुकुमिरान मिरख (मिरक) शाह सिंधी हिंदुन खे इसिलाम कबूल करण या मोत चूंडिण जो हुकुम डिनो उन वक़त, सिंध ते केतिरिन सदियिन खां गैर हिंदुन जी हुकूमत सबब सिंधी पहिंजियूं रूहानी, धार्मिक पाडूँ विञाये चुका हुआ। हालांकि इन गालिह जा ऐतिहासिक सबूत आहिन त सिंधु नदी जे किनारे ते रहण वारन हिंदुन मतलब सिंधी कौम खे न सिर्फ पंहिंजो खासु तहज़ीबी शिरसतो हुओ पर पहिंजी अलग भाषा बि हुयी।

मोहन जो दड़ो या मुअलन जो दड़ो जी खुदायी बुधाये थी त सिंधु घाटी सभ्यता पुरातन इंसानी सभ्यताउन में शामिल आहे ऐं मोहन जोदड़ो ऐं हड़पा में कियिल खुदायी मां अहिड़ा इशारा मिलिया आहिन जेके सिंधियन जे हिन्दु हुजण जे रुख में चिट्री गवाही डियन था। मोहन जोदड़ो इन गालिह जो पिणु सबूत आहे त सिंधी कौम न सिरफ वड़ा शहर ठाहिण जे हुनुर सां वाक़फ़ियत रखन्दी हुयी पर सिंधी कौम खे इन्हन शहरन जी संभाल करण बाबत जानकारी पिणु हुअस।

सिंधी हिंदू ऐं झूलेलाल जन्म साखी
मिरक शाह जे जुलमन ऐं धमकी जे असर हेठि ज़िंदगी ऐं धर्म जे लिहाज़ खां इन डुखिये समे में सिंधी अची सिंधु किनारे ते कठा थिया ऐं जल देवता खे पंहिंजी राखिया वासिते प्राथर्ना करण लगा। हज़ारें सिंधी केतिरा ई डीन्ह जल देवता खे बाड़ायिन पया ऐं आखिर में आकाशवाणी – त सिंधियिन जो उधार करण वासिते जल देवता अवतार वठी ईंदो – बुधी घर मोटिया।

झूलेलाल साहिबन जी जन्म साखी मतलब इन आकाशवाणी खां वठी झूलेलाल साहिबन जे इंसानी रूप में धरतीअ ते रहण जे विच वारे अरसे जो बयानु – केतिरा इन खे झूलेलाल जी समूरी कहाणी (complete Story of Jhulelal) बि चवण था। पढ़िहण ऐं समझण जी सहूलियत धियान में रखी असां इन विच वारे अरसे मतलब झूलेलाल साहिबन जी जन्म साखी खे कुझु हिसन में विरहाये हर हिक खे अलग उनवान डिनो आहे। हेठ डिनिल उनवान ते किलिक करे तव्हां जन्म साखी जो उहो हिसो पढ़ी सघो था.

सालाना सिंधी जलसा
झूलेलाल साहिब जे अवतार सां जुडियिल
(01) चेट्र महीने जे चंड्र ते झूलेलाल साहिब जे इंसानी रूप में जन्म वठण सबब
इहो डींहुं चेट्री चंड्र या सिंधी नयें साल जी शुरुआत जे रूप में मलिहायिण जी रीत शुरू थी। इहो उहो डींहुं आहे जंहि ते दुनिया जी हरि कुंड में रहण वारो सिंधी आयोलाल झूलेलाल ज़रूर चवंदो आहे।
(02) सिंधु जे किनारे सिंधी हिंदुन 40 डीन्ह जल देवता जी पूजा प्राथर्ना करे अवतार वठण वासिते मज़बूर कयो हुओ इन सबब करे
हर साल अंग्रेजी महीनन जुलाई अगस्त महीने में चालिहो मलिहायो वेंदो आहे। इहो चालीहन डीन्हन जो विरतु आहे। जंहि जी विसतार सां जाण सिंधी डिणन में डिनी वयी आहे।

1947 में देश जे धर्म जे आधार ते बिन हिसन में विरिहाजण सबब सिंधी पंहिंजो अबाणो वतन सिंध छडे भारत लड़े अचण वासिते मज़बूर कया वया। अजु दुनिया में भारत उहो देश आहे जिते हिंदू सिंधियिन जी जनसंख्या वधि में वधि आहे सो कुदरती तोर झूलेलाल साहिबन जी जन्म साखी सां जुडियिल इहे बयी सालाना जलसा भारत में वड़े जोश, उत्साह ऐं उमंग सां मलिहाया वेन्दा आहिन। उल्हासनगर, भरुच, चकरभाटा, इंदौर धुले जहिड़ा शहर चालीहे वासिते मशहूर आहिन त छतीसगढ़ में गणेशोत्सव वांगुर घर घर में झूलेलाल जो नारो बुलंद कन्दे चेट्री चंड्र मलिहायिण जी रीत शुरू कयी वयी आहे।
सिंधियत सुहिणी रहे
एस पी सर (मंघिरमलानी) कोल्हापुर