तारणहार झूलेलाल Rescue works of Jhulelal

मिरक शाह सिंधियन जे मुखियिन खे घुराये इसिलाम कबूल करण जी सन्द्स पेशकश ते फेसिले बाबत पुछियो। मुखी जिनखे आकशवाणी मूजिब बालक जे जन्म वठण सबब विशवास थी चुको हुओ सिंधियिन जो तारणहार अवतार जन्म वठी आयो आहे तिन मिरक शाह खां वधीक वक़त जी घुर कयी।

मिरक शाह बालक जे जन्म खां अणजाण न हुओ, सागिये वक़्त हू इहो बि डिसण पे चाहियो त हिकु बालक कीअं हिंदुन खे शाह जे कहर खां बचाये इसिलाम कबूल करण खां रोकिण में कामयाब थिये थो। मिरक शाह सिंधी हिन्दू मुखियिन खे वक़्त जी मोहलत त डिनी पर सागिये वक़्त पहिजें वज़ीर अहीरे खे नसरपुर वंञी बालक बाबत समुरो अहिवाल हासिल करण ऐं मुमकिन थी सघे त बालक खे मारिण जो हुकुम पिणु डिनो।

नसरपुर में रतनचंद वक़त मुजीब बालक जो मुनण कराइयो [ मुनण – हीअ उहा रसम थिंदी आहे जहिं मुजिब जन्म जे मुकरर अरसे बैद बार जे मथे जा वार लाहिराया  वेंदा आहिन ] ऐं बालक उदयचंद खे गुरु दीक्षा [पढ़ाहियी- स्कूली तैलीम – जी शुरुआत  जी मोकल वठण ] लाय गुरु गोरखनाथ वट वठी आयो। बालक खे डिसी ऐं रतनचंद जे अचण जो मकसद बुधी गुरु गोरखनाथ जे चपन ते खिल अची वयी हुनन मुश्कंदे चयो “मां उनखे छा गुरु दीक्षा डिन्दुंम जहिं खां समुरे जगत खे गियानु पयो थो मिले पर रतनचंद तुहिंजे अचण करे मां बालक खे “अलख निरंजन ” हिउ  गुरु मन्त्र डीन्दे गुरु दीक्षा डियां थो।  बालक जे जन्म वठिण जे थोरे अरसे बैद ई माता देवकी जो स्वर्गवास थी वियो हो ऐं बालक जी संभाल जे मकसद खां रतनचंद बी शादी करे चुको हो।  

बालक उदयचंद जी उमर थोरी वड़ी थी त माट्रेली माउ खे लगो त हाणे उदयचंद खे बि कुटम्ब जी कमायी में हिसो वठण घुरिजे सो हुन हिक डींहुं कूहर रधे मटकी [मिटिअ जो थांव ] भरे उदयचंद खे डिना ऐं  बाजार में कूहर विकणी पैसा कमाये अचण लाय चयो।  बालक मटकी खणी सिन्धु नदिअ जे किनारे ते आयो।

अधु कूहर आमु माण्हुन में विराहे बाकी अधु कुहरन वारी मटकी सिन्धु नदीअ जे प्रवाह खे अर्पण करे छडी।  सजो डींहुं बालक सिन्धु नदीअ जे किनारे ते कठो थियलन सां रूहानी खियालन जी डे वठु कंदो रहियो।  शाम जे वक़्त सभु अज़ब में पयिजी वया छो जो बालक उदयचंद जी सिंधु नदीअ खे अर्पण कियल मटकी वापस अची किनारे लगी ऐं उहा मटकी उमिदे किसम जे चांविरन [ताहिरीं ठाहीण जोग ] सां भरियिल हुई।  बालक उदयचंद मटकी खणी घर अची माउ खे डिनी।  

बालक उदयचंद जी उमर वधण सां उनजे चमत्कारन जूं गलिहियूं बि वधण लगियूं ऐं इहे मिरक शाह पिण बुधियुं जहिं सबब शाह जे मन में हिक किसम जे भव अची घरु कयो।  शाह पहिंजे वज़ीर अहीरे खे घुराये नसरपुर मोकिलियो जीयं वज़ीर बालक खे शाह सां रूबरू अकेलो मिलण लाय वठी अची सघे।  वज़ीर अगमें बि नसरपुर आयो हो ऐं बालक जा चमत्कार डिसी झूलेलाल जो मुरीद थी चुको हो।  वज़ीर खे जाण हुई त मोलविन ऐं बियन दरबारियिन जी सलाह ऐं ज़ोर हेठ मिरक शाह इहो बंदोबसतु करे चुको आहे त जडिहिं बालक उदयचंद शाह सां मिलण अचे त बालक खे गिरफ्तार कजे या मारे छडिजे। वज़ीर अची समुरी हकीकत बालक उदयचंद खे बधायी हुयी । 
मिरक शाह जो शरणागत अचण
मुलाकात जे वक़्त अज़ब नज़ारो हो – बालक उदयचंद खे गिरफ्तार करण या मारिण जा सभु बंदोबस्त बेकार थी विया छो जो न फ़क़त महल बाहि सां घिरी वियो पर गडोगडु पाणी जे तेज वहकरे सबब सभनी खे बोडि में फासी पवण जो अहसास पे थियो। हिक पासे बाहि त बिये पासे बोड़ बचण जो कोई रस्तो न डिसी मिरक शाह हथ जोड़े शरणागति कबूल कंदे चवण लगो
“मां कबूल कियां थो त हिन्दू तोड़े मुसलमान हिक ई दातार जो अंसु आहिन ऐं कहिं खे बि हकु कोन्हे त ज़ोर ज़बरदस्तीअ सां बिये खे धरम बदिलायिण लाय मज़बूर करे। मां इहो बि वायदो थो कियां त बाकी बचियल ज़िन्दगी पहिंजे हिन् इकरार ते कायम रहंदुम , मेहरबानी करे मुहंजी ऐं बियन जी ज़िन्दगी बचायियो। “
झूलेलाल साहिबन सभनी खे ज़िन्दगी बख़्शिन्दे चयो

“हमेशा याद रखो त जोति [बाहि ] हिन समूरे संसार जो त जल जीवन जो मुख्य ऐं पहिरियों आधार आहे। “

चवणी आहे त उन डींह खां वठी झूलेलाल मन्दिरं में जोति ऐं डाति जो सिलसिलो शुरू थियो ऐं कूहर ऐं तांहिरी झूलेलाल साहिब जे प्रसाद तौर विरहायिण जी रीत शुरू थी।