सिंधी रेसीपीज - सिंधी खाधो

सिंधी कौम न फ़क़त जायकेदार खाधो खायींण लाय मशहूर आहे पर इंसानन जी उन जमात में बि शामिल आहे जेके खाधे जूं शौकीन आहिन। के अहिड़ा लासानी खाधे जा पदार्थ जहिड़ो कि पापड़, दाल पकवान , तांहिरी या वरी कुदरती शयुन मां ठाहियल ऐं राहत डियण वारी थाधल, सेयल भाजी, दाग वारी भाजी, भुगल चांवर या सिंधी पुलाव, बीहन जा पकोड़ा आहिन जेके सिर्फ सिंधी रंधणे में तियार कया वेन्दा आहिन। इन्हन खे निजु सिंधी खाधो- रवायती सिंधी खाधो चयी सघजे थो। इहो बि धिआनु डियण जोगु आहे त इन्हन जे बिना सिंधी खाधो अधुरो लेखियो वेन्दो आहे।
सिंधी कौम केतिरिन ई अलग अलग जायकेदार खाधे जे पदार्थन लाय मशहूर आहे। इहो सचु आहे त चाँवर ऐं पटाटा सिंधियिन जो मुख्य खाधो आहिन पर गडोगडु सिंधी कौम बसर जो बि घणो उपयोग करे थी। पालक पनीर जहिड़ियन भाजियन खे आमु तौर गैर रवायती लेखिबो आहे पर अजुकल जे सिंधी रंधणे में इहा आमु ठहण वारी भाजी थी वयी आहे।
तरण – फ्राई करण खे असां सिंधी रंधणन जो मुख्य ऐं हुकूमत कन्दड कमु चयी सघऊं था। सिंधी खाधे जा पदार्थ गीह, मसालन ऐं सुवाद लाय त मशहूर आहिन ई सिंधियन जो खाधो रन्धियण जो खास तरीको बि मशहूर आहे। खाधो अञा तैयार थियण ते मस हूंदो आहे जो उनजी खुशबू सबब वात में पाणी अची वेन्दो आहे। न सिर्फ माणुहअ जी भुख वधी वेंदी आहे पर हू भुख खां वधीक खाधो खायींदो आहे, शायद त इहो बि हिकु सबब आहे जो सिंधी आम तोर ओवर वेट थियन था।
तव्हां खे यादि हूंदो त डहोको साल अगु असां हे सेक्शन सिर्फ वेजिटेरियन ऐं निजु सिंधी ताम – सिंधी रेसिपीज सां शुरू कयो हो पर हाणे आहिसिते आहिसिते नॉन वेजिटेरियन डिशुन खे बि शामिल कबो ऐं इन सिलसिले में पहिरियीं डिश आहे चिकन करी। जलदु ई किन आम सिंधी रेसिपीज जा वीडियो पिणु शामिल करण ते विचार हली रहियो आहे। पंहिजे पसंद जो सिंधी ताम असां खे लिखी मोकिलियो।
सिंधियत सुहिणी रहे
एस पी सर (मंघिरमलानी) कोल्हापुर