सिंधी लोक कला ऐं कलाकार

जडहिं असां अखर लोक कला कमि आणियूं था त मतलब असां कला जे उन रूप जी गालिह कयूं था जेको उन समाज जी पसंदगी ऐं रिवायतुन जो इजिहार करे थो। इहो आम आहे त कंहिं बि समाज जी सभ्यता सांस्कृतिक वरसे जो हकीकी दीदार उन समाज जी लोक कलाउन में ई थिये थो। जे कलाकारन जी गालिह कजे त लोक कला पेश कन्दड़ कलाकार कला जे रूप जी आम माणुहुन में मशहूरी पसंदगी ते धिआनु डियन त रिवायती कला जे कलाकारन जो समूरो धियान कला खे सही नमूने, नियमन मूजिब पेश करण ते हूंदो आहे।
सदियिन खां वठी सिंधी कौम वटि हिकु चिट्रो, बेमिसाल, लासानी सांस्कृतिक वरसो रहियो आहे। सिंधी सभ्यता या सिंधु घाटी सभ्यता इंसानी इतिहास जी पुरातन सभ्यताउन में शुमारी वेंदी आहे। नतीज़े तोर सिंधी कौम वटि बेहद अमीर ऐं वड़े विसतार वारो लोक कलाउन जो ज़खीरो हुजण अज़ब जी गालिह न आहे। चाहे डियारी ते रिवायती हटड़ी पूजा जे रूप में रचनात्मक इजिहार जी गालिह हुजे या सिंधी लोक नाचु छेज जे रूप में हिक मेडु (ग्रुप या समूह ) जे रिथायिते नमूने संगीत जे ताल ते पंहिंजी कला जो इजिहार कंडे ख़ुशी हासिल करण जी। लोक कलाउन जा जेतिरा रूप सिंधी कौम वटि आहिन से बियन समाजन में विरले ई नज़र अचन था।
सिंधी कौम जे सामाजिक जीवन ते संतन सूफिन दरवेशन ऐं फ़कीरन जो बि असर रहियो आहे। इन असर जो मिसाल आहे सिंधी लोक कला भगत। धिआनु डिजे त समझ में अचे थो त भगत रिवायती संगीत, गायिकी ऐं नाच जी कला खे आखाणी बुधायिण जे हुनर खे मिलाये ठहियिल लोक कला आहे। जे सिंध में इन कला के भगत कंवर राम साहिबन मशहूर कयो त भारत में सिंधी भगत खे हर सिंधी घर तायीं प्रो. राम पंजवानी जन पहुचायो। राम पंजवानी जन त मटकी खे साज़ जे रूप में कमि आणे भगत जी लोक कला खे हिक नयें आला मुक़ाम ते पिणु पहुचायो।
जेकडहिं सिंधी कौम जे डिण मलिहायिण जे तरीके ते, सामाजिक जलसन ते तोड़े शादी सां जुडियिल रीतुन, रसमुन ऐं रिवाजन ते धिआनु डिजे त सिंधी समाज जी ज़िंदगी ते सिंधी लोक कलाउन जो असर साफु साफु ऐं बेहद चिट्रो नज़र अचे थो। सिंधी कोयल भगवंती नावाणीअ रिवायती गायिकी खे लोक कला जे रंग में रंगींदे सिंधी लाड़ा अहिड़े रूप में पेश कया जो अजु बि सिंधी घरन में भगवंती जे गायल लाड़न बिना शादी पूरी न थी थिये।
सिंधी समाज जे सामाजिक तोड़े शख्सी जीवन ते सांस्कृतिक वरसे लोक कलाउन जे असर खे धियान में रखी 2021 अपडेट करण वक़त टीम TSW सिंधी लोक कला ऐं कलाकारन बाबत जानकारी खे सिंधी भाषा ऐं साहित्य सेकशन में हिक अलग हिसे जे रूप में शामिल करण जो फेसिलो कयो। इन अलग हिसे सबब सिंधी नवजवान पीढ़िन खे सिंधियत जे आलिशान सांस्कृतिक वरसे लोक कलाउन जी जानकारी हिक ई जगह ते मिली सघंदी। सिंधी सांस्कृतिक वरसे सिंधी लोक कलाउन जी जानकारी हासिल कंदे सिंधियत जे वाधारे खे न विसारीन्दा।
सिंधियत सुहिणी रहे
एस पी सर (मंघिरमलानी) कोल्हापुर