झूलेलाल साहिबन जा नाला
सिंधी आराधिय देव - झूलेलाल साहिबन जा नाला
हिंदुन में इहा आम रिवायत आहे त हर हिक अवतार खे केतिरिन ई नालन सां यादि कयो वेन्दो इहे नाला अवतार जे कन्हि गुण या कन्हिजो उधारु कंदे कयल कम सबब वज़ूद में आयल हूंदा आहिन। सिंधी बुनियादी तोर हिन्दु धर्म में विशवासु रखण वारा ऐं हिन्दु रीती रिवाजन मूजिब ज़िंदगी गुजारिण वारा लेखिया वेन्दा आहिन। अहिडी हालत में जेकडहिं सिंधी आराधिय देव झूलेलाल जा अलग अलग नाला आहिन त इहा अज़ब जी गालिह न आहे।
केतिरा सिंधी त इन गालिह ते पिणु विशवासु कनि था त केतिरिन बियन हिन्दु देवी देवताउन वांगुर झूलेलाल साहिबन जा पिणु 108 नाला आहिन। इहो बिलकुल मुमकिन आहे त सोशल मीडिया ते सिंधी आराधिय देव झूलेलाल साहिबन जे 108 नालन जी लिस्ट तव्हां खे नज़र आयी हुजे या अची वञें पर इन बाबत के पुख्ता ऐतिहासिक सबूत मौजूद कोन आहिन। जिन आम नालन सां झूलेलाल साहिब खे बाड़ायो वेन्दो आहे – यादि कबो आहे से लेख जी पछाड़ीअ डिनल आहिन।
झूलेलाल जन्म साखी -02
आकाशवाणी मूजिब सिंधी महीने चैत्र या चेट्र महीने जी बीज तिथि [विक्रम संवत 1007 अंग्रेजी साल 950] ते नसरपुर में देवकी ऐं रतनचंद लोहाणा जे घर हिक बालक जन्म वरतो जंहिं जो नालो “उदयचंद ” रखियो वियो। अगिते हली इहो डींहुं चेट्री चंड्र जे रूप में मलिहायिण जो रिवाज़ शुरू थियो। हिंदी बोलीअ में उदय जो मतलब थिंदो आहे उभरण ऐं चंद , चंड्र लाय कमि अचण वारो अखर आहे। मतलब त उदयचंद जी अलफ़ाज़ी माइना थी उभरन्दड चंड्र । वकतु पुजाणे हिन बालक उदयचंद हिन्दु सिंधियिन जो मिरक शाह जे जुलमन खां पूरी तरह सां बचाउ कियो। जीयं उभरन्दड चंड्र जे सामहूं रात जी कारहि खे पहिंजो वजूद कायम रखण मुमकिन न थींदो आहे तहिड़ी तरह बालक उदयचंद जी मौजूदगीअ सबब मिरक शाह लाय हिन्दुन ते जुलमु करण नामुमकिन थी पयो।
बालक जे जन्म खां वठी अज़ब में विझण वारियूं गालिहियूं थियण लगियूं। माउ पीयु डिठो त बारु जडिहिं वातु खोले थो त संदस वात में सिंधु नदी नज़र अचे थी। सिंधु नदीअ जे पाणीअ जे वहकरे में हिकु बुजरुग पले [हिक किस्म जी मच्छी ] ते सवार आहे। हिन् नज़ारे सबब झूलेलाल साहिब खे पले वारो पिण कोठियो वेंदो आहे।
सिंध जे रहवासियीन जो विश्वास हो त हिउ बालक संदन उद्धार लाय जन्म वठी आयियल अवतार आहे जहिं सबब हू जन्म मरण खां छुटियल मतलब अमर आहे इनकरे बालक जो नालो अमरलाल करे पिण मशहूर थी वियो।
हिन् बालक जो पींघो (झूलो ) सदायीं लुडन्दो पयो हो जहिं करे माता देवकीअ बालक खे झूलण नाले सां सडु करण शुरू कियो वक़्त पुजाणे इहो झूलण बदिलिजी झूलेलाल थी वियो।
मिरक शाह सां मुलाकात लाय वेंदे वक़्त साईं झूलेलाल साहिब जन घोड़े ते चढिहि विया हुआ इनकरे श्रद्धालु भक्त झूलेलाल साईं खे घोड़ेवारो हिन नाले सां पिण पुकारीन्दा आहिन।
झूलेलाल मन्दिर में सदायीं जोति जलन्दी रहंदी आहे तहिं करे झूलेलाल साईं खे जोतियिन वारो पिणु सडिबो आहे। आमुतोर मन्दिरन में या बहिराणो साहिब कढ़ण वक़त आयोलाल झूलेलाल जो नारो लगायो वेन्दो आहे।
सिंधियन जे भगवान लाल साईं जा सत सभ खां वधीक मशहूर नाला आहिन
उडेरोलाल – पले वारो – अमरलाल – झूलण – घोड़े वारो – जोतियिन वारो – बहिराणे वारो