झूलेलाल साहिबन जो जन्म

सिंध जी सरजमीं खे रूहानी रहबरन ऐं परमात्मा डान्हु लाडो रखन्दड रुहुन जे जन्म लाय वधीक मुफीद ऐं उपजाऊ लेखियो वेंदो आहे छो जो धरतीअ जो इहो हिस्सों सिंधियन जे आराधिय देव झूलेलाल साहिब सां गडोगडु बियन सन्तन महापुरषन जी जन्म भूमि आहे। इंडिस वैली सभ्यता जे समे खां वठी करे सिंध खे संतन , सुफियन , दरवेशन ऐं फकीरन जी धरतीअ तौर मशहूरी मिलियल आहे।   

राजा डाहिरसेन [सिंध जो आखरियिन हिन्दू राजा ] जे मोहमद बिन कासिम खां हाराइण खां पोइ सिंध में तलवार जे ज़ोर ते इसिलाम जो फैलाव शुरू थियो। डहीं सदीअ जे पोइयें अध में थट्टा जो राजु मकरब खान,  जेको पाण खे “मिरक शाह ” सड़ायिण पसंद कन्दो हो, तहिं शाह सदाकत खान जो खून करे, हासिल कियो।

मिरक शाह खे संदस राज दरबारियिन चयो त जे मिरक शाह इसिलाम जो फैलाव कंदो हो पक मुए पोइ जनत में वेंदो। दरबारीयिन जी इहा सलाह बुधी मिरक शाह पहिंजे राज जे हिंदून जे मुखियिन खे घुराये चयो त या त इसिलाम कबूल कियो या वरी मरण जी तयारी कियो। मुखियिन खे खबर हुई त मिरक शाह इसिलाम जे फैलाव लाय कुछ भी करे सघे थो। इसिलाम कबूल करण बि सवली गालिह कोन हुई पर इंकार जो अंजाम मौत हो इनकरे मुखियिन को बि फैसलो करण खां अगु सभनी हिंदुन खे सलाह करण लाय घुरायो।

हज़ारन जी तादाद में हिन्दू अची सिंधु नदिअ जे किनारे ते कठा थिया ऐं दरयाह शाह खे हिन मुसीबत जे वक़्त मदद लाय पुकारिण लगा। इतिहास चये थो त इहे हज़ारें हिन्दू पूरा चालीह डीन्ह दरयाह शाह जी प्राथना कंदा रहिया। इहो समुरो वक़्त उहे सागिया कपड़ा पिया पाइन, तेल साबुण खां सिवाय पिया सिनानु कनि । जीयं  त जमा थियल सिंधी हिंदुन जो तादाद काफी वडो हो इनकरे हो खाधो बि सादो बिना मसालन वारो पया खायिन। अजु जेको असां चालिहो मलिहायूं था उहो दरअसुल इन्हन चालिहन डीन्हन जी याद आहे। चालिहन डीन्हन खां पोइ आकाशवाणी थी

“मां नसरपुर में देवकी ऐं रतन राय (रतनचंद लोहाणा) जे घर जन्म वठन्दुम ऐं तव्हां सभनी जो उधार कंदुम “

आकाशवाणी बुधी हिंदून खे साह में साहु पयो ।  हाणे मुखी मिरक शाह जे दरबार में वंजी चवण लगा त इसिलाम कबूल करण जो फैसलो करण लाय खेनि वकतु  खपे। मिरक शाह खे जाण हुई त हिन्दू संदस दया ते आहिन हू जन्हि वक़्त चाहे हिंदून खे मारे सघे थो इनकरे उन मुखियिन खे वक़त जी मोहलत डिनी।