दाल पकवान डे

छा तव्हां खे नथो महसूस थिये एस पी सर त मुहिंजो इन मशहूर सिंधी ताम दाल पकवान खे खूनी हतियारो चवण सही ऐं मुनासिब आहे ? 

पर साईं निखिमिणामल ! अजु आखिर तव्हां कहिं समे जे औरतुन जे मिलकियत हुजण वारे रन्धिणे में दाखिल ई छो था चाहियो ? 

शुकुर हुओ जो अजु निखिमिणेमल मुहिंजो जुमिलो पूरो थियण डिनो हुओ। 

गालिह इहा कोनि आहे एस पी सर त सिंधी रन्धिणे जे राजपाट जी समूरियूं वागूँ सिंधी औरतुन जे हथ हुयूं या आहिन ? सुवाल इहो आहे त आखिर इहो दाल पकवान हतियारो आहे या न ? 

मां निखिमिणेमल जे अजु मुहिंजी गालिह बुधण / पूरी थियण वारे मूड जो पूरो पूरो फायदो वठन्दे चयो। 

साईं निखिमिणामल ! दाल पकवान को माणुहू न पर माणुहअ जो ठाहियल हिकु पदारथ आहे। मथां वरी न त दाल पकवान खे हथ आहिन ऐं न ई हथन में को हतियार अथस ? सो भला इहो बिना साहवारो दाल पकवान हतियारो खूनी कीअं थो थी सघे ? 

मुहिंजी गालिह शायद निखिमिणेमल खे पहिंजे पुराणे बिये जी गालिह खे बुधो अणबुधो करण वारे मूड में आंदे छडियो। 

केरु थो चये एस पी सर ! मुखे सिरफ हिक किताब जो नालो बुधायो जहिं में लिखियल हुजे त को खून हतिया करण वासिते हथन में हतियार हुजण जरुरी आहे ? मां बेशुमार वाकिया बुधाऐ सघांव थो जहिं में कहिं हतियार जो उपयोग त परे पर जिकुरु बि आहे तहिं खां पोय बि खून थियो आहे।  

पर साईं !

पहिंजो हथु मथे खणी मुखे कुझु चवण जो मोको डिने बिना निखिमिणेमल जो प्रवचन शुरू रहियो। 

इहे जेके तव्हां जे लिखियल लेख / कविता या बी कहिं रचना में तव्हां जो नालो कटे – गुम करे ऐं पहिंजो नालो लिखी फॉरवर्ड कनि था छा उहे तव्हां जा हतियारा न आहिन ? छा इन्हन – तव्हां जे अंदर मौजूद रचनाकार जो खून करण वासिते को हतियार कमि आन्दो आहे ? 

साईं मुहिंजी गालिह छडियो हिते तव्हां दाल पकवान खे हतियारो पयो था चवो ? 

निखिमिणेमल जे आवाज जी न सिरफ बुलन्दी वधी वयी पर संदस आवाज में जोश जो अचण बि साफ साफ महसूस पे थियो।  

मां हिकदम सही थो चवां एस पी सर इहो दाल पकवान खुनी आहे इन दाल पकवान हतिया कयी आहे ? सिंधी रन्धिणे में ठहियल पदारथु हून्दे बि इन जे दामन ते सिंधियत जे खून जा दाग आहिन ? 

पर साईं !

हिकु भेरो वरी मुहिंजा अखर / विचार चपन जी हद खां बाहिर अचण जी कोशिश कन्दे शहीद थी वया। 

मां पुछां थो एस पी सर ! आखिर साल जे 365 डीन्हन मां इहो 10 अप्रैल जो डींहुं ई छो चूंडियो वयो आहे ?  

कहिडे ब्राह्मण सुवामीअ खां महूरत कढ़ायो वयो त दाल पकवान डे 10 अप्रैल ते मलिहायो वंञे ? 

10 अप्रैल त भारत में भारत सरकार जे सिंधी भाषा खे मान्यता डियण – संविधान में शामिल करण वारे डीन्ह तोर हुअं ई सिंधी समाज जो जलसो आहे न ? 

आखिर इहा 10 अप्रैल ते दाल पकवान डे मलिहायिण जी रीत शुरू करण सिंधी भाषा मान्यता डीन्ह जी हतिया न आहे त बियो छा आहे ? 

पर साईं निखिमिणामल इहो दाल पकवान डे कहिडे डीन्ह ते मलिहायिजे इन गालिह जो फेसिलो त किन अखिल भारतीय सिंधी संस्थाउन जो आहे न ? 

मुहिंजो वातु न खोलायो एस पी सर ! भारत जी सिंधी संस्थाउन जे लागापे में ? खबर अथव न त मुहिंजी पहिंजी बि हिक संस्था आहे ? वधीक सिंधी संस्थाउन में बरपा थियण जे रुख में त को खास कमु / कोशिश थीन्दी नजर अचे कोन बस हर को रोशे (जोश उमंग सां भरियल जलसे रूपी डेखाउ) में बिजी आहे ? 

पर साईं इहो फेसिलो कियो संस्थाउन जे बानीकारन ऐं तव्हां दाल पकवान खे पया था हतियारो चवो ? 

त छा गलत थो चवां एस पी सर ! आहे दाल पकवान हतियारो ? बराबर इन दाल पकवान जो वजूद ई खूनी आहे ? जेकडहिं इहो दाल पकवान न हुजे हां बुधायो  10 अप्रैल ते सिरफ सिंधी भाषा मान्यता डीन्ह जो जलसो हुजे हां न ? 

तव्हां पाण विचार कयो एस पी सर ! इन दाल पकवान जलसे जो हिसो बणिजी सिंधी भाषा मान्यता डीन्ह जी अहमियत जो खून कयो आहे या न ? 

चांहि पूरी थी चुके काफी वकतु थी वयो हुओ सो निखिमिणोमल त तव्हां खे मुखे विचार करण वासिते छडे पहिंजी संस्था जे कम ते हलियो वयो।  

विचार सिरफ इन गालिह ते करणो आहे त छा 

साईं निखिमिणेमल जे चवण मूजिब हिक डीन्ह जे मलिहायिण जो कारण हिकु ई हुअण घुरिजे या अजु जे असां जे तेज रफतार, वकत जी अणाठ वारे जिंदगी जियण जे तरीके खे धियान में रखी सिंधी मान्यता डींहुं ऐं दाल पकवान डे वांगुर केतिरिन ई खुशीअ जे मोकन खे हिक सागे डीन्ह ते मलिहाइणु घुरिजे ?