पागलपन Madness

तव्हां खे को पागलपन जो दौरो त न पियो आ न एस पी सर ?

सुबह सां सिज उभरण खां अगु मुहिंजे घरमें दाखिल थियण वारे निखिमिणेमल जे अखरन न सिर्फ मुखे वायिडो करे छडियो पर विचारन जे समुंड में बि गरकु करे छडियो।

 साईं निखिमिणामल इन खे पागलपन न हा जुनून ज़रूर ……..

मुहिंजी गालिह अध में कटीन्दे निखिमिणेमल पहिंजी गुसे भरी आवाज़ वधीक बुलंद कंदे चयो।

तव्हां छा था समझो एस पी सर मां तव्हां जे भारत जे सिंधी समाज वास्ते कुछ करण जी चाहत जी गालिह पियो कियां। न एस पी सर न मुहिंजी मुराद त तव्हांजे जे सोशल मीडिया खास करे व्हाट्सप्प बाबत नज़रिये जी आहे।

पर साईं निखिमिणामल मां त व्हाट्सएप्प ते विरले ई कहिं जी पोस्ट ते का टीका टिप्पणी कंदो आहियां ? बिना कहिं बहस में शामिल थियण जे मां सिर्फ पहिंजियूं पोस्ट करण तायीं पाण खे महदूद रखन्दो आहियां। हाणे इन खे पागलपन चवण न मुनासिब न थींदो न ?

त एस पी सर तव्हां खे खबर न आहे त तव्हां जो सोशल मीडिया बाबत नज़रियो पागलपन आहे ? मां न सिर्फ तव्हां खे इहो बुधाये थो सघां पर साबित बि थो करे सघां। बस मुहिंजी हिक शर्त आहे एस पी सर तव्हां चुप रहंदा मुखे विच में रोकिण जी कोशिश न कन्दा। मुहिंजे शर्त कबूल कन्दे ई निखिमिणोमल शुरू थी वियो।

एस पी सर गणिण शुरू कियो त कहिडिन गालिहीन सबब मां इन खे पागलपन पियो चवां।

[1] तव्हां चाहियो था त व्हॉटसएप्प ते माणुहू पहिंजो पसंदीदा कम फॉरवर्ड करण छड़े सिंधी भाषा जे वाधारे जी गालिह कनि ? इन गालिह ते बहस कनि त देवनागिरी लिपी जो वापर वधायिण वास्ते अलग संस्था ठाहिण घुरिजे या न ? इहो पागलपन न आहे त बियो छा आहे ? मुखे सिर्फ ऐतिरो बुधायो एस पी सर छा व्हाट्सएप्प लोकसभा, राज्य सभा या विधानसभा आहे जिते माणुहू बहस करण या बहस बुधण वास्ते था अचन ?

[2] तव्हां चवो था त माणुहू व्हाट्सएप्प ग्रुपन में हद खां वधीक तादाद में फोटो / वीडियो ऐं बियूं बिना मतलब जूं पोस्ट्स फॉरवर्ड करण में लगा पिया आहिन। पर छा तव्हां खे खबर आहे एस पी सर त तव्हां जी इन मुखालफत सबब मुल्क में बेरोज़गारी वधी सघे थी ?

मां चवण चाहियो पे त ग्रूपन में फॉरवर्ड थियण वारिन पोस्ट्स जे वड़े अंदाज़ ऐं बेरोज़गारी जो कहिड़ो लागापो थी सघे थो पर मुखे याद आयो त मां निखिमिणेमल जी शर्त कबूल कयी आहे सो माठि करे वेही रहियुम।

[3] तव्हां त अलग अलग शहरन जे 30 खां बि वधीक सिंधी ग्रुपन में शामिल आहियो न एस पी सर। तव्हां खां बेहतर बिये कहिं खे जाण हूंदी त इहे फॉरवर्ड थियण वारा फोटो हुजन या वीडियो या वरी कहिं विषय ते लिखियिल का पोस्ट, जेका  किन ग्रूपन में हिक शहर जो मेंबर फॉरवर्ड करे त बियन कुछ ग्रुपन में को बियो, बिये शहर जो सिंधी थो फॉरवर्ड करे।

[4] तव्हां खे खबर आ एस पी सर तव्हां इन फॉरवर्ड करण जी मुखालफत करे आँगुरिन ते गणे सघण वारन पहिंजियूं  पोस्ट्स पाण तैयार करण वारन जी  ख़ुशी खसे वठण जो कम पिया कियो ?

हाणे मुहिंजे वास्ते चुप रहण डुखियो थी चुको हुओ। पर साईं निखिमिणामल इहा बेरोज़गारी जी गालिह ………

इन गालिह ते बि अचां थो एस पी सर। मुहिंजी गालिह पूरी न थियण जी पहिंजी आदत कायम रखन्दे निखिमिणेमल चयो।

[5] तव्हां खे छा थो लगे त इहे गुड मार्निंग जा फोटो तैयार करण वारा, इंटरनेट ते किलाकन जा किलाक वेही वीडियो चूंडिण वारा या अलग अलग विषयन ते लिखी पोस्ट तैयार करण वारा बि तव्हां वांगुर समाज में सुजागी आणिण वास्ते इहो कनि पिया ? न एस पी सर न ! इहे हिक हिक पोस्ट वास्ते कहिं न कहिं कम्पनी खां पेसा वठन्दा आहिन। तव्हां पाण फेसिलो कियो त छा तव्हां इन्हन खे बेरोज़गार थियण जी राह ते न था मोकिलियो ? जे हा त पोय इन खे पागलपन न चयजे त छा चयजे ?

[6] तव्हां जी इहा मुखालफत बिये नमूने बि बेरोज़गारी वधाये सघे थी एस पी सर ? मुल्क जी हर हिक वडी सियासी पार्टी आम माणुहू जो नज़रियो पार्टी या पार्टी जे अगुवान वास्ते मुफीद या फायदेमंद रखण वास्ते सोशल मीडिया जो उपयोग कन्दी आहे। व्हाट्सएप्प जा फॉरवर्ड करण जा शौकीन शख्स इन्हन सियासी पार्टिन जूं पोस्ट्स फॉरवर्ड करे मददगार साबित थींदा आहिन।

[7] सोशल मीडिया जो कारायितो ऐं मन माफ़िक़ उपयोग करण वास्ते हर हिक सियासी पार्टी आय टी सेल ठाहे थी जहिं में कम करण वारन मां किन खे हज़ारें त किन खे लखें रुपया हर महीने पगार जे रूप में डिये थी। एस पी सर हाणे जे तव्हां जहिड़न शख्सन सबब जे इहे पोस्टस फॉरवर्ड थियण बंद थी वञन त छा कहिं बि पार्टी खे पार्टी आय टी सेल जी ज़रूरत रहन्दी ? जे न त बेरोज़गारी त वधन्दी न ?

निखिमिणेमल चांहि पी पूरी कयी हुयी सो हू गालिह बि पूरो करे हलन्दो थियो पर दोस्तों मां तव्हां खां थो पुछां छा हकीकत में व्हाट्सएप्प जहिड़े सोशल मीडिया ते मुहिंजी हलत खे पागलपन जे दायरे में शामिल करे सघिजे थो ?