बदिलाव जी बोडि Flood of Change

जहिड़े नमूने बाल गंगाधर तिलक जो चवण सही हुओ त पहिंजो राजु मुहिंजो जन्मजात हकु आहे अहिडी तरह इहो बि सही आहे त बदिलाव जन्मजात थिये थो। को बि समाज किन नियम कायदन, रीती रिवाजन ऐं प्रथाउन जे पालन जे आधार ते तरकी करे थो। इहे नियम कायदा रीती रिवाज़ जहिं वक़त अमल में अचन था त इहे बदिलाव जो बिजु साणु खणी अचन था। हकीकत में जे डिसजे त नियम कायदन जी ज़रूरत ई इन करे पवे थी छो जो असां समाज में को बदिलाव आणिण चाहियूं था।

मुंहिंजी गालिह पूरी मस थी हुयी जो निखिमिणोमल शुरू थी वियो।

पर एस पी सर हर बदिलाव सही बि त कोन थिये न ? मां कबूल थो कियां त प्री वीडियो शूट सही कोन आहे ? पर छा असां बिन बालिगन खे इहो करण खां रोके सघूं था ? बिलकुल न। छो जो लोकशाही में इहो उन्हन जो हकु आहे ऐं पंचायत खे इन जी रोक जो नियम ठाहिण तुगलकी फरमान लेखियो वेन्दो।

डिसो एस पी सर ब बालिग शख्स शादी खां अगु या शादी का पोय पहिंजा कहिड़े किसम जा फोटो कढ़न था या वीडियो तैयार कनि था इन गालिह जो सामाजिक हलत ते को फरकु न थो पवे। एस पी सर मुहिंजी गालिह ते ध्यान डिजो फरकु पवे थो जडिहिं इहे फोटो / वीडियो सार्वजानिक रूप में डेखारिया वञन था।

थधी थियण वारी चाहिं ते ध्यान वञण सबब निखिमिणेमल गालिहायिण बंद करे कोपु हथ में खंयो ऐं मां इन कुदरती डाति तोर मिलियल मोके जो पूरो पूरो फायदो वरतो।

बदिलाव न सिर्फ कुदरती गालिह आहे पर हकीकत में जे डिसजे त बदिलाव उहो हथियार आहे जेको समाज तोड़े शख्स खे वक़त, हालतुन ऐं माहोल सां ठहकी हली पहिंजो वज़ूद कायम रखण में मददगार आहे। जे तरकी करणी आहे त बदिलाव बि कबूल करणो पवन्दो।

बिन ढुकन में चाहिं खतम कन्दे निखिमिणेमल मुखां इहा कुदरती डाति खसे वरती।

बदिलाव खां इंकार जी त गालिह ई कोन्हे एस पी सर हित त गालिह उहा आहे जो बदिलाव जे नाले हेठ जेके नियम ठाहिण जी कोशिश पयी कयी वंञे या जिन रीती रिवाजन में बदिलाव जी गालिह पयी कयी वंञे उहे त समाज जो तरो ई कढ़ी छड़िण जहिड़ा आहिन। हाणे डिसो एस पी सर

असां बारिहे खे पगड़िन जे डीन्ह ते करण चाहियूं था जीयं वकतु बचे पर हकीकत में जे डिसजे त बारिहे जी रसम इन करे वज़ूद में आयी छो जो जेको मिट्रू मायट्रू सर या पगडिन ते न पहुची सघियो हुजे उन वटि हिकु बियो मोको हुजे दुःख में शामिल थियण जी।

तव्हां जे ध्यान में इहो बि ज़रूर आयो हूंदो एस पी सर त बारहो पगड़िन जे डीन्ह ते करण जो मतलब आहे बारिहे जो किरया करम पगड़िन खां अगु पूरो करण। छा त अजीब बदिलाव चाहियूं था असां एस पी सर ? जहिं सामाजिक तोर पग ई न पाती [जवाबदारी खंयी आहे ] सो बारिहे जो किरया करम करे ?

हाणे त इहो बदिलाव आणिण जी कोशिश शुरू थी वयी आहे एस पी सर त पगड़ियूं ट्रियें डीन्ह ते न पर बिये डीन्ह ते थियन। पगड़िन जो वकतु बि रिवायती तोर शाम जी जगह ते सुबह जो थिये जीयं स्वर्गवासी जे कुटुंब ऐं बियन सभनी खे दुकान खोलिण में सहूलियत थिये। 

डिसो न एस पी सर पगड़िन खां अगु सुबह जो हाठियूं मेडिणिण जी रिवायत आहे जे असां पगड़िन जी रसम बिये डींहुं सुबह जो करे छडियूं त छा स्वर्गवासी जे घरवारन वास्ते इहो डुखियो न थी पवंदो ऐं उन खां बि वड़ी गालिह एस पी सर त छा इन नंढे अरसे में चिता जी बाहि ऐतिरी थधी थी चुकी हूंदी जो हाठियूं मेडिणिण जी रसम पूरी करे सघिजे ?

हकीकत इहा आहे एस पी सर जो अजु असां न त वकतु ऐं न ज़रूरत मूजिब बदिलाव चाहियूं था असां खे बदिलाव खपे सिर्फ बदिलाव वास्ते। हकीकत इहा आहे त बदिलाव पुठियां असां जो मकसद सिर्फ ऐं सिर्फ नयीं रीत शुरू करण जो जसु हासिल करण आहे।

पुराणे समे खां पगड़िन जो वकतु शाम जो रखण जो सबब इहो आहे त वेझिड़ायी में रहण वारा मायट्र सुबह जो पहिंजे घरां निकरी रात तायीं वापस पहुची सघन जीयं स्वर्गवासी जे कुटुंब खे मेहमान नवाज़ी जी तकलीफ घटि में घटि थिये।

पगड़िइ यूं बिये डींहुं सुबह जो करण जो मतलब आहे जेके मायट्र सर ते आया हुजन उहे रात रहन। एस पी सर तव्हां त ऐतिरो बाहिर अचो वंञो कोन पर हकीकत आहे त अजु ट्रैन में रिजर्वेशन मिलण गरीब विधवा जी नियाणी जी शादी खां बि डुखियो कमु आहे।

डिसो एस पी सर बारहो असां पगड़िन डींहुं करण था चाहियूं , पगड़ियूं बिये डीन्ह ते सुबह जो करण था चाहियूं। छा इहो बदिलाव आणे असां इहो सन्देश डियण जी कोशिश न था कयूं त इन्हन मोकन ते 10 -12 किलाकन जी मुसाफिरी ते रहण वारन मायट्रन जे अचण जी ज़रूरत कोन्हे। छा इहा अजोके सिंधी समाज जी सोच आहे एस पी सर ?

तव्हां बि ज़रूर निखिमिणेमल जी हिनन गालिहिन सां पाण खे रज़ामन्द महसूस करे रहिया हूंदा। हकीकत में इहो सिर्फ बदिलाव वास्ते बदिलाव जो जेको रुख वेझिड़ायी में असां जे सिंधी समाज में तेज़ी सां वधी रहियो आहे इन ते तमाम गंभीरता सां विचार करण जी निहायत सख्त ज़रूरत आहे।

हालत इहा आहे एस पी सर जो सिंधी कौमी तराने तोर मशहूर स्व. डॉ मोतीप्रकाश जे गीत आंधी में जोत जलायिण वारा सिंधी में बि झूलेलाल साहिब, कंवररराम साहिब वगैरह जो नालो हुअण सबब बदिलाव जी घूर थी रही आहे। मज़े जी गालिह इहा बि आहे त इहा घुर करण वारा नयें कौमी गीत जी रचना करण ते बि राज़ी न आहिन उन्हन जो त ज़िद आहे त इन गीत में ई बदिलाव थियण घुरिजे।

अचो त दोस्तों कुछ वकतु निखिमिणेमल खे पासीरो विहारे असां हिक बिये सां मुखातिब थियूं। जहिड़े  नमूने अजु सिर्फ बदिलाव वास्ते बदिलाव जी गालिह हली रही आहे तहिडी तरह हर बदिलाव जी मुखालफत जो बि फैशन शुरू थी रहियो आहे। असां  वास्ते उहो समझण ऐं अहसास करण ज़रूरी आहे त तकनीकी वाधारो असांजी शख्सी तोड़े सामाजिक जीवन ते असर करे थो बदिलाव खे ज़रूरी बणाये थो।  

विज्ञान जो धरती ते साहवारन जे वज़ूद बाबत हिकु सिद्धांत आहे त सिर्फ उहे साहवारा वज़ूद कायम रखी सघन्दा आहिन जेके ताकतवर थियन ऐं जिन में माहोल सां ठहकी हलण जी काबिलियत हूंदी आहे।  सामाजिक बदिलावन सां बि सागी गालिह लागू थिये।  सिर्फ उहे बदिलाव सामाजिक रिवायत जो रूप वठी सघन्दा आहिन जेके मुफीद थियन ऐं जिन खे समाज जो वड़ो तबको कबूल करे।

मतलब जेके बदिलाव तव्हां खे मुनासिब न था लगन उन्हन जी मुखालफत कन्दे उन्हन खे कबूल न कियो।