वयें रात मुहिंजा राणा

निखिमिणोमल हिक नयें रंग रूप में मूहिंजे सामहूं हुओ। अज़ब जी गालिह हुयी जो उमिर जे हिन सन्यास वठण वारे दौर में हुन फिल्म स्टार गोविंदा जी जवानी जी कहिं फिल्म वांगुर नीरी जीन, गाडिही बंद गले वारी टी शर्ट ऐं पीली जैकेट जहिड़ी अजीबोगरीब ड्रेस पाती हुयी।

गालिह इते पूरी कोन पयी थिये छो जो अजु निखिमिणेमल जे हथन में हिक नयीं स्मार्ट फ़ोन बि हुयी जहिं ते फुल वालियूम ते
मुहिंजो दारू दवा तुहिंजो दीदार आ
जो डी जे मिक्स वर्जन वजी रहियो हो।

मुहिंजी अखियिन जे अज़ब खां निखिमिणोमल ग़ैर वाकिफ़ हो इहो चवण सरासर गलत थींदो छो जो हुन जो अजु जो पहिरियों उचारियिल जुमिलो हो

एस पी सर ऐतिरे अज़ब जो इजिहार न कियो तव्हां खे शायद ध्यान न आहे त अजु बाबा वेलनटाईन जो डीहुं आहे।

मां वक़त जे बदलाव बाबत सोचिण चाहियो पे पर शायद निखिमिणेमल मुहिंजी ज़हीनी हालत समझी वरती छो जो हुन जो चवण हो

एस पी सर बाबा वेलनटाईन जो डीहुं हकीकत में असांजी पुराणी रिवायत जो बदलियिल रूप ई आहे न ? तव्हां खे खबर हूंदी त कहिं समे छोकरन ऐं छोकरिन जे अलग अलग गुरुकुलन में हिक आम इजिलास वसंत उत्सव थींदो हो जेको हकीकत में न सिर्फ इन्हन नवजवान लाय हिक बिये खे सुञाणण ऐं समझण जो मोको हूंदो हो पर आशिक़न जे वास्ते इश्क़ जे इजिहार जो बि नायब बेमिसाल मोको हूंदो हुओ।

मुखे अहसास थियण लगो त व्हाट्सअप – सोशल मीडिया खे अणकारायितो समझण जो मुहिंजो विचार पूरी तरह सां सही न आहे छो जो निखिमिणेमल खे वसंत उत्सव लफ्ज़ जी खबर बियो किथां मिले इहो मुमकिन न आहे।

एस पी सर वकतु बदीलिजी वियो आहे अजु जे समे रात डीहुं त डीहुं रात थी पियो आहे सो इंसान जी हलत बि बदिलिजी आहे। अग में चवंदा हुआ सीं
वयें रात मुहिंजा राणा दिलड़ी डुखाये
त अजु समो आहे
कुंडी मत खड़काओ राजा सीधे अंदर आ जाओ राजा
जहिड़न गानन जो।

अग में वकतु हुओ लिकी छिपी नेणन सां इश्क़ जे इजिहार हो त अजु खुलियिल बाग बगीचन में सवें हज़ारें बियन जी मौजूदगी में बाबा वेलनटाईन जो कसम खायी इश्क़ जो इजिहार करण जो।

मुखे अहसास थियो त निखिमिणोमल जो चवण आहे त काफी हद तायीं सही अजु सुबह जो सवेल उथण जो मतलब आहे 8 बजे। नेरन जो वकतु आहे 11 खां 12 जे विच में त रात जी रसोयी मतलब 11 बजे खां पोय विचार करण जी गालिह।

एस पी सर तव्हां हीउ डी जे मिक्स मुहिंजो दारू दवा तुहिंजो दीदार आ बुधो न ? खबर अथव इहो गीत सिंधी नवजवान सिर्फ सुठन लफ़्ज़न या दिलकश म्यूजिक करे न था पसंद कनि पर इन पसंदगी जो हिकु सबब इन में आयल लफ़्ज़ु दारु बि आहे।

निखिमिणेमल हिकु भेरो वरी पहिंजे सही हुअण जो अहसास करायिण में कामियाबी हासिल कयी। छो जो ख़ुशी जे इजिहार ऐं दारु जे लागापे खे सिंधी कौम खां वधीक बेहतर नमूने केर थो समझी सघे ? पर मुखे इहो जाणे ख़ुशी थी त चाहे कहिड़े बि सबब छो न हुजे पर सिंधी नवजवान सिंधी संगीत पसंद कनि था। बिलकुल उहा ख़ुशी जेका मुखे मिलन्दी आहे जडिहिं को नवजवान सिंधी भाषा जे वापर ऐं सिन्धियत जे वाधारे बाबत जाण हासिल करण वास्ते मुखे फोन कंदो आहे।

मां समझां थो त मूहिंजे हिन लेख तव्हां जे बाबा वेलनटाईन जे डीन्ह जे प्रोग्राम में रुखिनो कोन पैदा कियो हूंदो। हाणे तव्हां जे ऐं बाबा वेलनटाईन जे विच मां पाण खे परे करण जी मोकल घुरां थो।