खुश रहण या फेरो 99 जो

मुखे हिक गालिह त बिलकुल समझ में न थी अचे एस पी सर ! आखिर असां सिंधी खुश रहण सिखंदासीं कडिहिं ? हाणे डिसो न को इन करे खुश न आहे त फलाणे पहिंजे पुट्र जी शादी ते बेलगाम हलत हलन्दे, सामाजिक रिवायतुन जे बरख़िलाफ़ कॉकटेल ऐं नॉन वेज जी आलीशान मजिलस छो सजायी त को इन करे खुश न आहे त शहर खां बाहिर शानदार सुहांयिते ऐं महंगे रिसोर्ट में थियल इन जलसे में मुखे छो न घुरायो वियो ?

मां कुछ चवण पे चहियो पर निखिमिणेमल जी वाणी रुपी बुलेट ट्रैन मुखे को नंढो वड़ो गैर ज़रूरी स्टेशन समझी बिना बीठे हलंदी थी।

बियो त परे सोशल मीडिया ते बि सिंधी खुश न आहिन ? को इन करे नाराज़ आहे त ग्रूपन में बेहद घणा मैसेज पोस्ट पिया थियन, कहिंजी नाखुशी जो सबब आहे त बिया मुहिंजे पोस्ट कियिल वीडियोस ते ध्यान छोङ न था डियन त को इनकरे खुश न आहे त माणुहु कहिं हिक या किन खास शख्सन जी पोस्ट खे वधीक अहमियत छो डियन था ?

निखिमिणेमल चाहिं ढुक भरिण वास्ते कोप हथ में खयों सो मुखे चप चोरिण जो मोको मिली वियो।

छा आहे साईँ निखिमिणामल जो माणुहू फाथल आहे 99 जे फेर में। हर को तो चाहे न बस हिकु बियो मिले त सउ पूरो थिये। इहा जेका सउ पूरे करण जी चाहत आहे न बस इन्ही ई माणुहु खे ख़ुशी खां परे करे छाड़ियो आहे।

इहा गालिह त सभनी सां जुड़ियल आहे न एस पी सर ! मुहिंजो सवाल आहे असांजी सिंधी कौम बाबत ?

साईं निखिमिणामल सिंधी कौम खे शायद त इहो वरु मिलियल आहे या को पारातो जो को बि सिंधी इनकरे डुखी न आहे त पाण वटि का घटितायी अथस हू त डुखी आहे त बियन वटि वधीक छो आहे ? हुअं बि साईं बियन खे नाखुश करण आहे सवलो पर कहिं खे खुश करण डुखियो आहे। हाणे हालतुन सां ठहकी हलण ऐं धंधे वास्ते मशहूर सिंधी कौम सवलो कमु छडे डुखियो करे त छो करे ? कुदरती नतीजे तोर खुश सिंधी गोलिहिण का सवली गालिह न आहे। हिक बी गालिह बि आहे त असां सिंधी सवलायी सां पहिंजी ख़ुशी बिये जो हिकु अखर बुधी विंञाये विहूं था।

इहो त तव्हां बराबर था चवो एस पी सर त असां सिंधी पहिंजे डुख सबब न पर बियन जे सुख सबब नाखुश आहियूं पर मुखे इहा गालिह समझ में आयी त नाखुश करण या बिये खे 99 जे फेर में फासायिण सवलो कीयं आहे ?

डिसो साईं हिकु राजा रोज़ सुबह जो मॉर्निंग वाक ते वेन्दो हो। राजा डिसन्दो हुओ त दरबान हमेशा खिली राजा जो स्वागत कन्दो हुओ। राजा खे चिंता वठी वयी त मां वटि हेडो धन दौलत हूंदे बि मां हमेशां खिलमुख न थो रही सघां त आखिर दरबान वटि अहिड़ो छा आहे जो हमेशा खुश रहे थो ?

इहो सचु आहे एस पी सर त असांजे सिंधी समाज में बि उन्हन जो तादाद वधीक आहे जेके ख़ुशी खे धन दौलत सां जोड़े डिसन था।

हिक डींहुं राजा वज़ीर खे चयो त दरबान जे हमेशा खुश रहण जो राज़ गोल्हे लहु। वज़ीर जवाब डिनो त इहो त तमाम डुखियो कमु आहे हा जे राजा चाहे त 24 किलाकन में दरबान खे ना खुश ज़रूर करे सघिजे थो। वज़ीर जी सलाह ते राजा घोषणा कयी त दरबान खे शाम जो इनाम डिनो वेन्दो।

शाम जो दरबान खे हिकु ढकियल थाल ड़यी चयो वियो त हीउ तुहिंजो इनाम आहे पर इहो तूं सुभाणे डिसी सघन्दे। अजु रात जो इहो ढकियल थाल तुहिंजे घर जे अंगण में सेना जे पहिरे में रखियो वेन्दो ऐं सुभाणे सिज उभरण खां अगु तुहिंजे हवाले कियो वेन्दो।

पोय त वेचारे दरबान जी निंड्र ई हराम थी वयी हूंदी न एस पी सर !

बिलकुल साईं ! प्रभात वेले दरबान सेना जे ओहदेदारन खां थाल वठी घर अंदर अची डिसे त थाल में सोन जूं मोहरूं आहिन। दरबान गणिण शुरू कियो हिक — डह – नवानवे। दरबान वरी मोहरूं गणियूं पर हाणे बि उहे 99 हुयुं। दरबान सोचियो राजा त पक ई पक सउ डिनियूं हूंदियूं पर शायद सेना जे ओहदेदार हिक मोहर कढ़ी वरती आहे। हाणे इहो सोचे त हुन वटि को सबूत त आहे कोन जो राजा खे शिकायत डिये दरबान जो चिंता में मुहं लही वियो।

उन डींहुं राजा मॉर्निंग वाक वास्ते निकतो त छा डिसे त हमेशा खिली स्वागत करण वारो दरबान मुँह लाहे चिंता में ऐतिरो गरकु आहे जो ध्यान ई कोन्हेस त राजा बाहिर

मुहिंजी गालिह पूरी बि कोन थी हुयी जो निखिमिणोमल चाहिं बि अध में छड़े उथी हलन्दो थियो। पुछण ते चयांयीं त सुभाणे गालिहायिबो हाणे त मुखे वंञी हिसाब किताब करणो आहे त आखिर मुहिंजी प्रॉपर्टी आहे केतिरी ?

त दोस्त तव्हां खुश आहियो या तव्हां वटि बि 99 आहिन ? बुधाइजो ज़रूर।