मोको परचाणी डियण जो

चवंदा आहिन त माणुहुअ खे मसाणन में वञण सां वैराग या सचे ज्ञान जो अहसास थींदो आहे। असां मां हर हिकु पहिंजी हयाती में केतिरा ई भेरा मसाणन जे रस्ते ते मुसाफिरी करे थो। आखिर इंसान सामाजिक जीव आहे ऐं बियन जी अंतिम यात्रा में शामिल थियण हिक सामाजिक जवाबदारी आहे।

परचाणी डियण बि हिक कला आहे पर असां जे पहिंजे निखिमिणेमल चवण आहे  त बियन कलाउन वांगुर लागीते रियाज़ सां इन कला में महारत हासिल न थी करे सघिजे। मतलब चाहे तव्हां सालन जा साल परचाणी डियण वेंदा हुजो पर इहो बिलकुल मुमकिन आहे त तव्हां खे परचाणी डियण जी कला जी क जी बि खबर न हुजे।

परचाणी डियण या पेर पायिण जी रीत जी शुरुआत इन करे थी हुयी त जे को अंतिम यात्रा में शामिल न थी सघे त उहो पोय अची गमी वारे कुटुंब खे विछोड़े जो डुख सहण वास्ते आथत डयी सघे। परचाणी बाबत असां जे पहिंजे निखिमिणेमल जा खियाल ई निराला आहिन। हुन जो चवण आहे त

जीयं सिंध में सिंधी भाषा में उर्दू, अरबी ऐं फ़ारसी भाषाउन जो इस्तेमाल थींदो हो तीयं भारत में हिन्दी भाषा जे शब्दन जो सिंधी में उपयोग थिये थो ऐं इन लिहाज़ खां डिसजे त परचाणी हिंदी जे बिन पर [बियन] ऐं चर्चा [विचार] शब्दन जे मेल मां ठहियिल महसूस थिये थी। परचाणी डियण वञण जो मतलब आहे बियन जी चर्चा करण वञण।

इहो त तव्हां बि डिठो हूंदो त पेर पायिण आयलन में वधीक तादाद उन्हन जो हूंदो आहे जेके अची हथ जोड़े विहण खां पोय हिक बिये सां गालिहायिण में या पहिंजी मोबाइल में मशगूल थी वेंदा आहिन। सिर्फ आयलन खे डोहु डियण बेमानी आहे छो जो गमी वारे कुटुंब जा बि केतिरा मेहमान मोबाइल ते रूधल पिया नज़र अचन। इन्हन मेहमानन जो पहिंजो तर्क थिये छा कजे किलाक ब विहणो आहे टाइम पास करण बि ज़रूरी आहे न ?

निखिमिणोमल त परचाणी डियण जी कला में माहिर आहे। हाणोके माणुहुन वांगुर न जेके वञन त परचाणी डियण था पर हथ जोड़े का कुंड डिसी वेही रहन था। पंज पंदिरिहां मिनिट चुपचाप वेही – फेसबुक ते स्टेटस अपडेट करे या व्हाट्सप्प जा मेसेज पढ़ी ब चार मेसेज बियन खे फॉरवर्ड करे हथ जोड़े उथी खड़ा थियन ऐं समझन था परचाणी डियण जी रसम अदायगी थी वयी।

निखिमिणेमल जो चवण आहे त एस पी सर जे परचाणी डियण वञण खां पोय बि इहा खबर न हुजे त – स्वर्गवासी मौत खां अगु कहिड़े अस्पताल में इलाज पियो कराये ? घणा डीन्ह उते रहियो कहिडिन माहिर डॉक्टरन उन जो इलाज कियो ? घणो बिल आयो ? जे घर में रहन्दे गुजारे वियो त स्वर्गवास खां अगु खाधो त नेम टेम सां खाये पियो या न ? – पोय परचाणी डियण वञण जो को मतलब कोन्हे।

एस पी सर परचाणी डयी मोटण वक़त असां खे इहा बि खबर हुअण घुरिजे त स्वर्गवासी जा पुट्र अगते गडु रहन्दा या धार थिंदा ? छो जो जे धार थींदा त सामाजिक बदिलाव ईंदो ऐं सामाजिक जीव हुअण सबब असां खे समाज जे बदलाव जी जाण हुअण ज़रूरी आहे।

त दोस्तों इहो फैसिलो मां तव्हां ते तो छड़ियाँ त अगते जहिं वक़त परचाणी डियण वञो उन वक़त आदत मुजीब फेसबुक / व्हाट्सएप्प जे वापर या सेल्फी कढ़ण पहिंजी आदत कायम रखो या निखिमिणेमल मूजिब पाण खे सामाजिक बदलाव जी जाण हासिल करण वारो शख्सु बणायो ?