लोकशाही जा रंग - Colours of Democracy

अजु जहिं निखिमिणेमल सां मुलाकात थी सो पूरी तरह सां बदीलियिल हुओ न सिर्फ संदस आवाज़ में गुसो हुओ पर आवाज़ जो सुर ताल लय बि हमेशा खां जुदा हुआ।

एस पी सर आखिर कोई त बुधाये त असां जे मुल्क में हीउ थी छा रहियो आहे? अधि रात खां पोय कोर्ट में कम पियो थिये। जेके सियासी पार्टियूं पहिंजन चूंडियिल ऐवजिन खे हिक किसम सां क़ैद करे वेठियूं आहिन – मां त इहो बि बुधो आ एस पी सर त इन्हन चूंडियिल ऐवजिन खे पहिंजन घरवारन सां बि गड़िजण त परे पर तन्हायी में फ़ोन ते गालिहायिण जी बि मोकल न आहे – उन्हन खां लोकशाही जो डिनिल बुनयादी हकु आज़ादी खसे वेठियूं आहिन से ई कोर्ट में तोड़े रसतन ते लोकशाही जे खतरे जूं गालिहियूं पयूं कनि ?

हीउ त उहा ई गालिह थी वयी एस पी सर जेका मां कहिं समे पढ़ी हुयी लोकशाही में गढ़ह आज़ाद आहिन त बीठे बीठे या लेटे लेटे जेतिरी मर्ज़ी पवेन ओतिरो गाहु चरन छो जो लोकशाही गाह खे बि पहिंजी मन मर्ज़ी जी वाधि पायिण जी आज़ादी डिये थी।

हिक गालिह त बुधायो एस पी सर बराबर लोकशाही असां खे आज़ादी डिये थी पर छा इन आज़ादी सां का जवाबदारी जुडियिल न आहे ? हाणे जे राज्यपाल कहिं पार्टी खे सरकार ठाहिण वास्ते घुरायो बि त सिर्फ कसम खणण सां त उन पार्टी जी सरकार ठही कोन वेंदी न ? आखिर त उन जी सरकार ठहन्दी तडहिं न जडिहिं उहा पहिंजी घणायी साबित करे। इहो सही आहे एस पी सर त मुखालफत कन्दड़ सियासी पार्टीयिन खे हकु आहे पर असां जे संविधान राज्यपाल खे बि त कुछ हक डिना आहिन न ? छा तव्हां मुखालफत करे उहे हक खसिण जी कोशिश न था कियो ?

निखिमिणोमल गालिहायिण बंद करे सवाली निगाहुन सां मुखे निहारिये रहियो हो सो मां हिन विरले मिलियिल मोके जो फायदों वठन्दे चयो।

साईं निखिमिणामल इहो बराबर आहे त लोकशाही में असां खे जेतिरी आज़ादी आहे ओतिरी जवाबदारी बि आहे या मां चवां त आज़ादी घटि आहे ऐं जवाबदारी वधीक त बि गलत न थिंदो।

मुहिंजी गालिह पूरी थियण खां अगु ई हमेशा वांगुर निखिमिणोमल शुरू थी वियो।

मां समझी वियुम एस पी सर त अजु असां जे मुल्क में हर हिक आज़ादी जो हकु त माणिण चाहे थो पर जवाबदारी बियन जे वास्ते छडे थो। बिलकुल असां दोस्तन जी पार्टी जे बिल भरिण जे  TTMM [तुहिंजो तूं मुहिंजो मां ] जे खिलाफ मतलब हक मुहिंजा जवाबदारी तुहिंजी जहिड़ो आहे।   

पहिंजी गालिह पूरी करे बिना इन गालिह जो अहसास कन्दे त जे खेस गालिहायिण जी आज़ादी आहे त मुहिंजी गालिह बुधण संदस जवाबदारी आहे, निखिमिणोमल उथी हलन्दो थियो।  

हाणे इहो फेसिलो मां तव्हां ते छड़ियां त जे तव्हां खे हीउ लेख पढ़िहण या न पढ़िहण जी आज़ादी आहे त इन विषय ते पहिंजी राय मुखे बुधायिण तव्हां जी जवाबदारी आहे या न ?