खरीद EMI वारी

घणी डाउन पैमेंट करणी पयव ? कॅश कियव या क्रेडिट कार्ड जो उपयोग कियव ? एस पी सर तव्हां त ज़रूर नो इंटरेस्ट EMI जो ऑप्शन चूंडियो हूंदो ? EMI घणी बीठव ?

इहे कुछ सवाल आहिन असां जे पहिंजे निखिमिणेमल जा। जिन जा वसकारा मूं ते थिया आहिन। दरअसल अजु सुबह जो जहिं वक़त निखिमिणोमल आयो त संदस नज़र वंञी पयी मुहिंजी ट्रे डीन्ह अगु खरीद कियल नयी स्मार्ट फोन ते ? बस हुन खे इन्तिज़ार रहन्दो आहे न मोके जो सो शुरू थी वियो ?

स्टोरेज त हाणे 64 GB खां घटि छा हूंदस? रेम घणी अथस 6 GB या 8 GB ? पोट्रेट मोड़ जी सहूलियत त हूंदस पर फ्रंट कैमरा घणा अथस ? ऐं हा एस पी सर डेश चार्जिंग बि अथस न ?

सचु पुछो त दोस्तों मां त मुंझी पियुम। हिक नंढड़ी फ़ोन बाबत ऐतिरा सवाल ? गालिह ई समझ में न पे आयी ? हकीकत बस ऐतिरी आहे त मुहिंजी फोन ट्रे साल पुराणी थी चुकी हुयी ऐं घरवारी जी फोन बराबर कम न पे कियो सो हु हर हर पयी चये त हिक नयीं फ़ोन वठो। सांगे सां ट्रे डीन्ह अगु मुहिंजे हिक पुराणे स्टूडेंट पहिंजे मोबाइल्स जो नयें शोरूम जो महूरत कियो ऐं मुखे बि घुरायो।

हाणे दुकान जे महूरत ते वंञी कुछ खरीद न करण खे सुठो सुगुन न चयइबो न ? सो मां बि *हिक पत्थर सां बिन पखियिन जो शिकार* कन्दे पहिंजे पुराणे स्टूडेंट खे पहिंजी नयीं फ़ोन जी ज़रूरत जी गालिह बुधायी। हुन मुहिंजी ज़रूरत खे ध्यान में रखी पहिंजे हिसाब सां हिक सुठी फोन कढ़ी मुखे डिनी ऐं मां चेकु डयी, फ़ोन खणी खुश थींदे घर हलियो आयुम।

बिये डिन्ह ते मुहिंजे पुराणे स्टूडेंट घर अची मुहिंजी घरवारी खे नयीं फ़ोन जे बारे में बुधायो। नयीं फ़ोन जा नवां नवां फीचर बुधी हुन जो दिमाग फिरी वियो सो हुन मुहिंजी पुराणी फ़ोन में पहिंजो सिम कार्ड ऐं नयीं फ़ोन में मुहिंजो सिम कार्ड विझाये नयीं फोन मुहिंजे हवाले करे छड़ी। हाणे इन्तिज़ार आहे आरतवार जो दुकान बंद हुअण सबब मुहिंजो स्टूडेंट फुर्सत में हूंदो सो अची मुखे नयीं फोन जा इस्तेमाल करण जा तरीका बुधायीन्दो।

बस ऐतिरी कहाणी आ मुहिंजे नयें फोन जी। पहिरियूं त इहा फोन मां पहिंजे वास्ते खरीद कोन कयी हुयी ऐं जे खरीद बि कयी हुजे हां त निखिमिणेमल जेतिरियूं गालिहियूं त असुल ध्यान में अचन कोन हां ? आखिर आदत बि कुछ अहमियत रखे या न ? चाहे ज़मानो बदिलयो आहे पर अजु बि सिंधी समाज में टीचर वास्ते इज़त जो जज़्बो कायम आहे। सो मुखे त आदत आहे त चाहे कुछ बि खरीद करणो हुजे कहिं न कहिं स्टूडेंट जे दुकान ते इहो मिली वंञे सो मां बि कुछ मिनिटन में खरीददारी पूरी करे वठां।

पर एस पी सर ! इन आदत खे सुठो त न चयइबो ? चाहे तव्हां जो स्टूडेंट छो न हुजे पर आखिर आहे त वापारी न ? इहो बिलकुल मुमकिन आहे त हिकु त तव्हां खे शय महंगी मिले ऐं बियो पुराणो मॉडल बि मिले।

निखिमिणेमल जे मीन मेख कढ़ण वारे नज़रिये हिक नयीं शंका पेश कयी।

पर साईं निखिमिणामल मुहिंजी त पोयन ट्रीहन सालन खां इहा ई आदत आहे ऐं अजु डीन्ह तायीं कहिं इयें न चयो आहे त मां वधीक पेसा डिना आहिन या शय ख़राब आहे।

मुहिंजी गालिह बुधी निखिमिणोमल मुहिंजी नयीं फ़ोन हथ में खणी डिसण लगो।

फ़ोन त सुठी ऐं मॉडल बि लेटेस्ट अथव। अजु कल्ह जे हिसाब मूजिब 6 GB रेम ऐं 64 GB घणे जो चेक डयी आयो आहियो ?
निखिमिणेमल जो मुहिंजी नयीं फ़ोन बाबत इहो नावों नंबर जो नओं सवाल हुओ।

सोरिहां हज़ार अठ सउ रूपया।

छा गालिह था कियो एस पी सर ! हिन मॉडल जी त ऑनलाइन कीमत बि वीह हज़ार आहे। हिक फोन मुखे बि वठी डियो न इन अघ ते ?

साईं निखिमिणामल मुहिंजा स्टूडेंट मुखां खरीदी कीमत वठन्दा आहिन सो मां उन्हन खे कीयं चवां ? तव्हां पाण चयो भले उहे मुहिंजा स्टूडेंट हुजन पर आखिर त वापारी आहिन न ?

तव्हां सोचिया था न त EMI जी त गालिह ई कोन थी आहे पर छा थो करे सघिजे ? मुहिंजी गालिह ते नाराज़ थी निखिमिणोमल गुसे में चाहिं बि अध में छडे वियो आहे सो EMI जी गालिह खे उन जे मोटण तायीं पासीरो रखण ई बेहतर आहे।