वड़े शहर जी नूंह

वक़त जो फेरो दालि बि बणिजे सीरो। मतलब सभु वक़त जी बलिहारी आहे ऐं अजोके समे में वड़न शहरन जी ज़िंदगी जी वड़ी कशिश आहे सो हाणे छोकरिन जी पसंदगी जी तरजीह बि बदलिजी वयी आहे। को समो हो जो छोकिरियूं डॉक्टर इंजीनियर जहिड़े छोकरे ते बिना मीन मेख कढ़ण जे राज़ी थी वेंदियूं हुयूं पर हाणे त नंढे शहर जी हुजे या वड़े शहर जी हर छोकरी चाहे थी त छोकिरो वड़े शहर में वड़ी पघार ते नौकरी करण वारो हुजे। आखिर छोकरी खे पहिंजी पढ़ाई सकारिती करण वास्ते मुनासिब नौकरी वड़े शहर में ई त मिलन्दी। थोरे में चयजे त अजु दौर आहे वड़े शहर जी नूहं जो।

अजु जहिं वक़त निखिमिणोमल आयो त मां अकेलो कोन हुयूम मुहिंजी भर वारी कुर्सी ते भागनवारी बि वेठी हुयी। चाहिं जी चुस्की वठन्दे मुखे घूरिण वारे निखिमिणेमल जी नज़रून जे मरकज़ खां पाणु बचायिण लाय उन वास्ते इहो ज़रूरी हुओ।

हीउ आहे भागनवारी।

मां निखिमिणेमल सां मुखातिब हुयुम।

मुहिंजी उम्मीद जे खिलाफ भागनवारी हथ जे चाहिं जे कोप खे टेबल ते रखी उथी निखिमिणेमल सां गडिजी। मुखे अहसास थियो त मां नज़रुन जे मरकज़ी दायरे खां बाहिर निकरण में नाकामियाब थियो आहियां।

साईं निखिमिणामल भागनवारी मुहिंजे संढूह जे साले जे नंढे भाउ जी इकलोती छोकरी आहे। हिन पोयें साल एम बी ऐ जी पढ़ायी पूरी कयी आहे ऐं हाणे वक़्तगुज़ारी वास्ते इंटीरियर डेकोरेशन जो डिप्लोमा करे रही आहे।

मां इहो महसूस करे त नज़रून जो मरकज़ मूं तां हटी वियो आहे ऐं निखिमिणेमल भागनवारी सां गालिहायिण शुरू कियो आहे सुख जो साहु खणी पाण खे चाहिं जी चुस्की जे स्वाद में गरकु करण खे पसंद कियो।

निखिमिणोमल मुहिंजन सभनी मिट्रन मायट्रन सां चंगी तरह सां वाकिफ आहे सो खेस खबर आहे त भागनवारी जो पीउ ऐं वड़ा भाउर हिक मुशकिल सां हिक लख जी आदमशुमारी वारे शहर में आलिशान कपड़े जे शो रूम जा मालिक ऐं फ्रूट मंडी जे कामियाब कमीशन एजेंट्स में शामिल आहिन।

नि :: त बेटा भागनवारी ……..
भा :: न न अंकल भागनवारी न ! तव्हां त शिकिल सां ई मॉर्डन लगो पिया ऐं हाणोके समे जा सभु मुखे लक चवंदा आहिन। 
नि :: त लक तूं हिते घुमण आयी आहियीं या को बियो मकसद आ तुहिंजो ?
भा :: अंकल मुहिंजो विचार त शादी खां पोय हिन शहर में रहण जो आहे सो सोचियुम त हिते रहण जी सहूलियत आहे घरां बि सवलायी सां मोकल मिलन्दी त छो न कुछ डीन्ह हिन वड़े शहर जी ज़िन्दगी जो लुतुफ माणे वठां। आखिर नंढे शहर में त शादी करणी कोन आहे सो जे वड़े शहर जी ज़िंदगी जो कुछ आज़मूदो मुफ्त में मिले त नुकसान कहिड़ो ?
नि :: तूं बिलकुल सही फेसिलो कियो आहे लक ऐं हिकदम सही शहर में आयी आहियीं।
भा :: त अंकल तव्हां मुखे शहर जा डिस्को जॉइंट्स, मॉल ऎं मल्टीप्लेक्स घुमण में मदद कंदा न ?
नि :: छो न कंदुम ! पर पहिरियूं वड़न शहरन जी ज़िंदगी जे बारे में कुछ गालिहिन ते ध्यान डियण ज़रूरी आहे।

मां त पाण खे चाहिं जी चुसकी जे सुवाद में गरकु करे वेठो हुयुम पर भागनवारी खे चप चोरिण जी कोशिश कन्दे डिसी निखिमिणेमल चयो।

न न पहिरियूं मुहिंजी सजी गालिह ध्यान बुध पोय तोखे बि मोको मिलन्दो। डिसु वड़े शहर में वडी पघार ते नौकरी करण वारे सां शादी करण जो मतलब आहे

[1] हर महीने पघार जो लेखे जोग हिसो घर जे किराये जे रूप में खरचु करण।
[2] वड़े शहर में पहिंजो फ्लैट खरीद करण जो मतलब आहे पुराणी समूरी बचत खरच करण, माउ पीउ भाउरन खां मदद वठण ऐं मथां वरी 15 -20 साल होम लोन जी किस्त भरिण जी जवाबदारी।
[3] घर खां ऑफिस अचु वञ जो खरचु ऐं लगन्दड़ वकतु वधण छो जो जे सुठे रहवासी माहोल में घर खपे त उहो ऑफिस जे वेझो मिलण हिक किसम सां नामुमकिन आहे।
[4] घर जे वधियिल खरचन खे मुहं डियण वास्ते इहो ज़रूरी आहे त ज़ाल मुड़स बयी नौकरी / धंधो कनि मतलब हिक बिये सां गडु गुजारे सघण वारे वक़त में कहिं बिये खे भायीवार करण।
[5] ऑफिस जे कमन जी थकावट सबब महीने में बियो न त 8 -10 डीन्ह होटल मां खाधो घुरायिण। सुबह जे नाश्ते त पैक्ड फ़ूड जे वापर खां सिवाय बियो को इलाज कोन आहे।
[6] बाहिरियों खाधो खायिण सबब तंदुरस्ती बिगड़जण ऐं एनर्जी रिच फ़ूड तोड़े जिम वगैरह जो खरचु वधिजण।
[7] आरतवार छुटी जे डीन्ह ते घर जी हफ्तेवार साफ सफायी,शयुन खे ठाहे ठुके रखण मतलब ऐतिरी थकावट जो शाम जो घुमण वञण जी जगह ते बिसातिरे ते आराम करण पसंद करण।

मुहिंजी चाहिं खतम थी चुकी हुयी ऐं भागनवारी खे निखिमिणेमल जूं गालिहियूं ध्यान सां बुधन्दो डिसी ख़ुशी थी रही हुयी। मुखे इहा बि खबर आहे त तव्हां मुखे हिक रूखने जे रूप में डिसी रहिया आहियो। खैर त निखिमिणेमल जो चवण हुओ।

वड़न शहरन में वड़ी पघार ते नौकरी करण वारे जी भेट में नंढे शहर में रहण वारे घटि पढ़िहियिल पहिंजो धंधो करण वारे ऐं सुठी कमायी करण वारे छोकिरे सां शादी करण जा केतिरा ई फायदा आहिन।

[1] आम तौर हिते घरु पहिंजो थिये मतलब न सिर्फ भाड़े या होम लोन जी किशत भरण खां आज़ादी पर ज़ाल मुडुस बिनहीं जी नौकरी / कम करण जी ज़रूरत न।
[2] वक़त हुअण सबब होटल जे अनहेल्दी खाधे या पैक्ड फ़ूड खां मुक्ती मतलब खाधे सबब तंदुरस्ती बिगड़जण जो घटि खतरो।
[3] पढ़िहियिल लिखियिल हुअण सबब साहुरन में नूहं जे रुतिबे में वाधि।
[4] मुडुस जे दुकान खां पोय वारे वक़त ते पूरी पूरी हुकूमत।
[5] घर जी साफ सफायी ऐं ठाहे ठुके रखण जे कम में वधीक भाती हुअण सबब घटि थकावट।

मां डिसां पियो त निखिमिणेमल जी गालिहिन जे असर हेठ भागनवारी जे चेहरे जा रंग बदिलिजन पिया। मुहिंजे वास्ते त इहा बि अज़ब जी गालिह हुयी त हिकु मिनटु चुप करे न वहण वारी भागनवारी निखिमिणेमल जी गालिह पूरी थियण ते बिना चप चोरिण जे हले वयी।

तव्हां खे छा थो लगे हुअ पहिंजी ज़िंदगी कहिड़े रूप में गुजारिण जो फेसिलो कन्दी ?

भागनवारी जे रूप में
या
लक जे रूप में ?