कर्जु मतलब शाही खर्चु

अजु निखिमिणेमल जो आवाज़ गुसे भरियो हुओ हीउ छा लिखियो अथव एस पी सर त असां जे देश में त धर्म बि कर्जु या ओधर वठण में मददगार आहे ? मुखे त तव्हांजी इहा हलत बिलकुल बि समझ में न थी अचे हिक पासां करजु वड़ो मरज़ु जहिड़ा पहाका था पोस्ट कियो त बिये पासे अहिड़ा लेख था लिखो जो माणुहुअ जे मन में कर्जु या ओधर वठण जी लालच पैदा थिये।

साईं निखिमिणामल शांत वेही चाहिं पियंदे मुहिंजी गालिह बुधन्दा त सवलायी सां समझी सघन्दव।

ठीक आ अजु खुलियिल मैदान अथव पर बिहो पहिरियूं भाभी खे बी चाहिं ठाहिण वास्ते चवां आखिर मुखे बि तव्हां जो इहो लम्बो लेक्चर बुधण वास्ते होसिलो घुरिजे या न।

त साईं निखिमिणामल तव्हां पाण चवन्दा आहियो न त ओधर या कर्जु वठण हिक कला आहे ? मां त सिर्फ हिकु कदम अगते वधी इहो चवण जी कोशिश कयी आहे त वरतल ओधर या कर्जु वापस न करण बि हिक कला आहे ऐं असां इन कला में माहिर आहियूं।

इहो त सही आहे एस पी सर त कर्जु वठण हर हिक जे वस जी गालिह न आहे पर कर्जु न मोटियायिण ….

अजु मां निखिमिणेमल जो किरदार निभाइन्दे गालिह विच में कटे चयो।
मां सचु थो चवाँव ऐं इतिहास बि इन गालिह जो गवाह आहे त असां भारतीय इन कला में माहिर आहियूं ।

छा गालिह था कियो एस पी सर ! छा इतिहास में बि कर्जु वापस न करण जा मिसाल आहिन ? मां त पियो समझां त तव्हां ताजे हादसन खे मतलब कर्जु वठी बिना मोटायिण जे विदेश भजी वंञण खे ध्यान में रखी पिया चवो।

बिलकुल साईँ निखिमिणामल इतिहास गवाह आ ! तव्हां खे बालपणे में बुधल पढ़िहियल तेनालीराम जूं आखणियूं याद अथव ?

तेनालीराम जूं त न पर अकबर बीरबल जूं चंगियूं कहाणियूं अजु बि याद आहिन। हा इहो ज़रूर खबर आहे एस पी सर त दुनिया जा जेके विरला मशहूर सियाणा आहिन उन्हन में तेनालीराम बि शामिल आहे।

त साईं निखिमिणामल ध्यान डिजो। हिकु भेरो छा थियो जो तेनालीराम जी घरवारी बीमार थी पयी सो इलाज वास्ते हुन राजा खां पंज सउ मोहरूं उधारियूं वरतियूं। घरवारी त ठीक थी वयी पर तेनालीराम मोहरूं वापस डियण जो नालो न वठे छो जो इहे मोहरूं वापस करण जो तेनालीराम जो न इरादो हुओ ऐं न नियत ।
राजा जा तकादा वधन्दा पिया वंञन छो जो असुल त परे पर वियाज़ बि न डियण सबब कर्जु अची बीणो थियण ते पहुतो। राजा जे वधन्दड़ तकादन खां तंग थी तेनालीराम बीमार थी पियो ऐतिरो जो शाही हकीम राजा खे चयो तेनालीराम जी बीमारी त समझ में न थी अचे पर संदस हालत डिसी लगे थो त अंत घड़ी वेझो अची पहुती अथस।
राजा बीमार तेनालीराम जे घर पहुतो त तेनालीराम जी घरवारी चयुस राजन तव्हां खां वरतल क़र्ज़ ई मुहिंजे मुड़स खे बीमार करे छडियो आहे डीन्ह रात सिर्फ हिकु विचार पियो करे त राजा खे मोहरूं कीयं वापस कियां। राजा विचार कियो त तेनालीराम जहिड़े सियाणे खां सिवाय उन जी राज दरबार अधूरी लगंदी सो अंदर वंञी बीमार तेनालीराम जे भरसां वेही चवण लगो।

तेनालीराम मुखां वरतल ओधर ऐं उन जे वियाज़ जी चिंता न कर ! तोखे वापस करण जी ज़रूरत न आहे तुहिंजो इहो कर्जु माफ़ कियो थो वंञे।

बस कमाल थी वियो , जहिं तेनालीराम वास्ते शाही हकीम जी राय हुयी त बस कुछ डीन्हन जो मेहमान आहे सो इहा क़र्ज़ माफ़ी जी गालिह बुधी ट्रिपो ड़यी उथी नचण लगो।

तव्हां बराबर चवो था एस पी सर त ओधर या कर्जु वापस न करण बि हिक कला आहे। मां समझी वयुम त कर्जु वापस न करण वास्ते तेनालीराम बीमार थियण जो बहानो करे राजा खे कर्जु माफ़ करण वास्ते मज़बूर कियो। पर हाणे ओधर ऐं धर्म जी गालिह।

डिसो साईँ निखिमिणामल असां जे देश में हिंदु घणाई में रहन था ऐं हिंदू वरी जन्म वठण में विश्वास कंदा आहिन न ?

बिलकुल सही था चवो एस पी सर ! अलाये कहिड़े जन्म जो फलु आहे जो रोज़ तव्हां जी चाहिं पियो थो पियां।

त साईँ कर्जु ओधर डियण वारो बि इन विश्वास ते पेसा ड़यी थो छड़े त जे हिन जन्म में वापस न मिलिया त बिये जन्म में ज़रूर वसूल थी वेन्दा।

हाणे हिक बी गालिह बि समझायो त हीउ चाहिं जो बियो कोप पियण जो लुतफ अची वंञे। हीउ जेको सरकार हर हर किसानन जो कर्जु माफ़ करे पयी थी छा इहो मुनासिब आहे ऐं छा किसानन जी क़र्ज़ माफ़ी जी घुर बि कहिं कला सां लगापो रखे थी ?

इहो त तव्हां पाण फेसिलो कियो साईं निखिमिणामल ! हकीकत इहा आहे त फ़सल वास्ते न त को किसान ऐतिरो कर्जु वठे थो न उन खे मिलण मुमकिन आहे जो कर्जु न चुकाये सघण जी मज़बूरी में किसान आत्महत्या करण वास्ते मज़बूर थिये।

मज़बूरी जी गालिह ते याद आयो एस पी सर त असां जे देश जा घणा सियासतदान तोड़े उन्हन जा मिट्र मायट्र, इन मज़बूरी में त असां जे देश में खेती मां थियल कमाई ते का इनकम टैक्स कोन्हे, किसान आहिन।

सही रुख में विचार पिया कियो। विचार कन्दा रहन्दा त सही नतीजे ते ज़रूर पहुचंदव।

निखिमिणोमल त विचार करण जो वायदो करे हलन्दो थियो आहे। उमीद त तव्हां बि ज़रूर विचार कन्दा ऐं पहिंजे हासिल नतीजे सां मुखे बि वाकिफ कराइन्दा।