अथुल पुथल वारो सालु18

ब आरतवार अगु सुबह खां शाम तायीं बाजार में वधीक चहल पहल हुयी। नौकरी करण वारन लाय सिराध साल में हिकु भेरो न पर हर महीने हूंदा आहिन छो जो हर महीने जा पोयां डीन्ह उन्हन वास्ते सिराधन जा मतलब खरेदी न करण वारा डीन्ह थींदा आहिन। पर हिन आरतवार जी गालिह ई निराली हुयी। चाहे इहा महीने जी आखिरी तारीख हुयी पर हर हिकु शख्सु खरीद करण में रुधियिल पियो नज़र अचे।

तव्हां चवंदा आरतवार में कहिड़ी खास गालिह हुयी ? आरतवार त हर हफते पियो अचे ऐं इहो बि त अजूबो न आहे त महीने जो आखिरी डींहुं बि आरतवार थिये। सो इहा कहिड़ी वड़ी गालिह थी ? तव्हां शायद ध्यान न डिनो आ। इहो आरतवार सिर्फ महीने जो न पर साल जो बि आखिरी डींहुं हुओ। हाणे जिन इन डीन्ह जी तैयारी अगुवाठ कोन कयी हुयी उन्हन वास्ते त सिज लथे खां अगु पूरो बंदोबस्त करे खणणु ज़रूरी थी वियो हो न ? सो कुदरती तोर बाजार में चहल पहल वधियिल हुयी।

हलवायी त हाणे बचिया कोन आहिन पर डेली नीड्स वारा दुकानदार त रुगो बाजार में न पर हर घिटिअ में वज़ूद रखन पिया। हर कहिं इन डीन्ह ते पहिंजे वित आहार न सिर्फ नमकीन जे पैकेट्स ऐं कोल्ड ड्रिंक जो स्टॉक कियो हो पर गडोगडु खास घटायल कीमत ते विकिण जा ऑफर्स बि रखिया हुआ। रुगो इन्हन ते पर गिफ्ट आर्टिकल्स ऐं चॉक्लेट्स ते बि खास छूट हुयी। छूट न हुयी त सिर्फ हिक दुकान ते ऐं उते ही वधीक ख़रीददार जमा थीयिल नज़र पे आया।

तव्हां चवंदा एस पी सर इहो त हर साल थिये पियो पोय हिन साल कहिड़ी खास गालिह ?

दोस्तों तव्हां शायद त ध्यान न डिनो आहे ब सूमर अगु खां वठी 2018 मतलब 21 सदी जो सालु 18 [अड़िहरों] शुरू थी वियो आहे। हिंदी में हिक चवणी आहे एक तो करेला ऊपर से नीम चढ़ा सो ब हफ्ता अगु इहो सिर्फ आरतवार, महीने जो या साल जो आखिरी डींहुं कोन हो पर इहो मोको हुओ सालु 18 [अड़िहरों] जी शुरुआत जो स्वागत करण जो।

अंग्रेजन जे हिसाब सां इहो इंसानी ज़िन्दगी जे गोल्डन पीरियड टीन ऐज जे खतम थियण वारे 19 साल खां अगु वारो साल आहे त असां हिंदुस्तानिन जे हिसाब सां इहो सालु 18 इंसान जे बालिग थियण जी निशानी आहे। आखिर भारत में चाहे वोट डियण जो हकु हुजे या ड्राइविंग लाइसेंस मिलण जो मुमकिन थियण हुजे हर शहरी इन वास्ते तडहिं क़ाबिल लेखिजे थो जडिहिं उन जी उमिर 18 साल हुजे।

चवन था टीन ऐज इंसानी हयाती जो सुनहरो अरसो थिये ऐं 18हों  सालु मतलब इन सुनहरे अरसे जी पछाडीअ खां अगु वारो साल वड़ी उथल पुथल वारो सालु लेखियो वेन्दो आहे। हाणे डिसो न इहो केतिरो सही आहे। 2018 जी शुरुआत मस थी जो महाराष्ट्र में दलित ऐं मराठा निफ़ाक़ जे खूह में किरन्दा नज़र आया। बंगाल में ब्राह्मणन जा सम्मेलन शुरू थी विया। उहो बंगाल जिते दुर्गा पूजा जे डीन्हन में खास डीन्ह ते मूर्ती विसर्जन ते रोक लगायी वयी हुयी। बियो त परे 18हें साल पहिरियों हफ्तो मस पूरो कियो हो जो सुप्रीम कोर्ट जा जज बि इतिहास में पहिरियों भेरो प्रेस जे सामहूं अची बीठा।

हाणे जे इहो चयो पियो वञे त अड़ीहिरों सालु वड़ी उथल पुथल वारो सालु थिये त छा गलत आहे ? मुखे त बस हिंदी जी हिक बी चवणी याद पयी अचे
इब्तिदाये इश्क़ है रोता है क्या, आगे आगे देख होता है क्या ?

खैर हाणे इहो सभु पासिरो रखी तव्हां सभनी खे साल 2018 जूं करोड़ कऱोड या अरब अरब – छो जो हिन समे में लख त गरीबन वटि बि आहिन न – वड़ो मिसाल आहे असां जा सियासतदान चाहे उन्हन वटि कार बि न हुजे पर मिलकियत 80 – 90 लखन खां वधीक हूंदी – वाधायूं।

तव्हां सोचे रहिया आहियो न त एस पी सर गालिह पूरी करण ते अची पहुतो आहे पर निखिमिणोमल किथे आहे। मुखे बि प्रोफेसर राम पंजवानी जन जो गायाल बाबो अञा न आयो मंगिणो अधूरो थो लगे  याद पियो अचे।
अजु हिंदी चवणिन जो दौर आहे सो
शैतान को याद करो और वो सामने हाज़िर।

2018 जे नयें साल जी पहिरियीं सुबह हुयी अञा सिजु देवता बि रात जे नयें साल जे सेलिब्रेशन जी खुमारी खां पूरी तरह बाहिर कोन निकतो हुओ पर निखिमिणोमल मुहिंजे सामहूं हुओ।

एस पी सर ! व्हाट्सप्प जे हिकु मेसेज पियो थो फॉरवर्ड थिये चाहे कैलेंडर हाणे बदिलिबो पर सिंधी नवों साल त मार्च में शुरू थींदो सो नयें साल जूं वाधायूं बि पोय डिजो। 

मां चवण चाहियुम त गालिह त बरोबर आहे पर निखिमिणोमल ऐतिरो भरियो वेठो हो जो मुहिंजी गालिह खे नक ते वेठल मखि खे उड़ायिण वांगुर पासीरो करे शुरू रहियो।

एस पी सर इन मेसेज लिखण वारे या हर हिक फॉरवर्ड करण वारे खां सिर्फ ऐतिरो त पुछो अरे पहिंजी नानीअ जे नियाणे जा पुट्र जे तूं जन्म खां वठी मरण तायीं , पहिंजे धंधे धाड़ी वियाज़ वठे जो समूरो हिसाब इन कैलेंडर जे हिसाब सां करीं पियो थो त पोय इहो नवों साल तुहिंजो छो न आहे ?

हाणे मूं में त हिमथ कोन आहे जो सोशल नेटवर्किंग साइट्स ते फॉरवर्ड करण वारन रथिन महारथिन खां मां इहो सवाल पुछी सघां ? जे तव्हां वटि हिमथ हुजे त बिलाशक हीउ फॉरवर्ड कियो पर दास खे आयल जवाब जी जाण ज़रूर डिजो।