फुरसत में

आरतवार 7 जनवरी 2018 साल जो पहिरियों आरतवार हुओ। हुअं बि आरतवार छुटिअ जो डीहुँ थिये सो सुबह जो सवेल उथण जो को मतलब कोन हूंदो आहे ऐं मथां वरी हिन महीने जे घर जे राशन पाणिअ जी खरेदी बि बुधर डीहुँ पूरी थी वयी सो फुरसत ई फुरसत हुयी।

सोचियुम त हिन भेरे त पक ई पक सुबह जो सतें बजे तायीं सवड जो सुख माणिबो। हुअं बि सियारे जो सिजु त खणु पाउ में पूरो थी वंञे न। छंछर रात जो टी वी ते को खास प्रोग्राम बि कोन हो हालांकि आपकी अदालत में आम आदमी पार्टी जो कवी नेता कुमार विशवास अचण हो पर आखिर त उहो आम माणुहु आहे ऐं हाणे आम आदमी पार्टी बि आम माणुहुअ जी पार्टी किथे रही आहे ? सो विचार कियो त सुभाणे त फुरसत आहे सुबह जो आराम सां वेही 10 बजे खां रिपीट टेलीकॉस्ट डिसबी।

पर हाणे आदत जो छा कजे ? रिटायर माणुहू सवेल सुमहण ऐं रोज़ सवेल उथण वारो – सो देर तायीं सुमहण सवलो बि त कोन हो ? हुअं बि वारिस शाह त चयी वियो आहे आदत त जियरे छडिजे कोन सो रोज़ जी आदत 4 बजे अँखियूं खोले छडियूं। कोशिश त घणी कयी पर निंड्र गरीब जी माशूका बणजण जो जिदु छडे ई कोन पयी सो लाचारीअ में 5 बजे पाण खे सवड जे सुख खां पाण खे महरूम करणो पियो। हुअं बि हाणे सवडूं बचियूं किथे आहिन फैशन या तरकी जी बाहि इन्हन खे कंबल जी शिकिल डयी चुकी आहे सो कंबल वेडहे पासीरो रखियुम ऐं चाहिं जो लुतुफु वठण लगुमु। बाहिर त मुल्क में मौजूद नौकरी जे मोकन वांगुर टेम्प्रेचर घटि हुओ सो घरवारी जी सलाह ते विराहन्डे  में विहण बदरां स्वेटर पाये दर दरी खोले ओतक में वेही चाहिं जी गरमी सां सरीर गरम करण जो प्रोग्राम शुरू कियो।

बियो कोपु हथ में हुओ जो निखिमिणेमल जो आवाज़ आयो। अज़ब जी गालिह हुयी नवजवान वांगुर रात जो 12 बजे रोटी खायिण वारो ऐतिरो सवेल उथियो हो ? खैर जवाब त डियणो हो आखिर निखिमिणेमल मुखे बिना खरच दुबई जी सैर करायिण जी गालिह ते विचार करण जो वायदो कियो हो।चाहिं त तैयार हुयी सो हुन खे मिली। बिना पूछे ई हू शुरू थी वियो

खबर अथव एस पी सर ब डीन्ह अगु डॉक्टर मुहिंजो चेकअप करे कुछ रिपोर्ट्स कढ़ायूं हुयूं ऐं चयांयीं त कोलेस्ट्रॉल वधी वियो अथव सो मॉर्निंग वाक ज़रूरी अथव।

मूं दिल में खियाल कियो इन खे चयिबो आहे लाचारी ! हुअं त निखिमिणोमल कहिंजी बुधे कोन पर सेहत बराबर रखणी आहे त डॉक्टर जी बुधण बि ज़रूरी आहे। सुठो थियो मुहिंजो खरचु बचियो सुभाणे खां ई अख़बार बंद कियाँ थो। हे वॉक ते छा वेन्दो सुबह साण अची मुल्क जूं ख़बरूं बुधायिण वेही रहन्दो। 

तव्हां सोचे रहिया आहियो न ? मुहिंजो अखबार जो खरचु बचियो या चाहिं जो खरचु वधियो ? निखिमिणेमल कुमार विशवास जे आपकी अदालत में गालिहायिण ते छा चयो या हुन जे विचार मूजिब लालूप्रसाद खे सजा छो मिली ? इन सजा जो मुल्क जी सियासत ते कहिड़ो असर पवन्दो ? बिलाशक तव्हां सोचिण वास्ते आज़ाद ऐं खुदमुखितियार आहियो पर मुहिंजो त न सिर्फ फुरसत जो वक़त पूरो थी वियो आहे पर गडोगडु इंटरनेट वास्ते मुकरर वक़त बि पूरो थी वियो आहे। वाच बधाये पयी त 8 थी विया आहिन सो बाकी गुफ्तगु वरी बी कहिं फुरसत में।