सिंधी नुख़ (गोत्र) Sindhi Nukh (Gotra)

इन बाबत छंड छाण कन्दे जा पिछड़ी वारन सिंधी सरनेम ते धिआनु वयो सो समझ में आयो त इहो बिलकुल मुमकिन आहे त जा पछाड़ी वारा सरनेम दरअसल नुख़ आहिन जेका सरनेम जे रूप में कमि पयी आन्दी वञे। इन बाबत जेका जानकारी मिली सघी आहे उन मूजिब कराची जे ऐतिहासिक नालन में क्रोकोला, कुरुक, करक बंदर जहिड़ा नाला पिणु शामिल आहिन इन आधार ते नुख़ कुकड जा वज़ूद में आयी हून्दी। इहा बि जाण मिली त कुकड जा नुख़ में मोर कुकड ऐं ठेंग कुकड इहे उपनुख़ूं हुंदियूं आहिन। अज़ु जेको असां कुकरेजा या कुकड़ेजा वापिरायूं था सो हकीकत में इन कुकड जा जो बदिलियल रूप आहे मतलब इहो त कुकरेजा उहे सिंधी आहिन जिन जा पुरखा कराची ऐं आसपास जी ऐराजी जा रहण वारा हुआ।

हिक आम सिंधीअ खां जेकडहिं सरनेम बाबत पुछिजे त अलग अलग जवाब मिलंदा आहिन। को सरनेम खे डाडे परडाडे जे नाले ते, को अबाणन जे नाले ते त को नाले या या रहण जी जगह खे  रखियल हुजण बुधाये थो। मुखे जेका जाण मिली सघी आहे उन मूजिब सरनेम पुरखन या वडेरेन जे नाले जी आखिर में नी या जा जोडे रखियो वेंदो आहे। असां खे पाण खां अगु वारिन टिन पीढ़ियिन खे पीउ – डाडो – परडाडो चवण जी रिवायत जी जानकारी आहे।  इनहन टिन  पीढीयुन खां अगु वारन खे वडेरा ऐं वडेरन खां अगु वारिन सभनी पीढ़ियन खे  पुरखा चयो वेंदो। कहिं बि परिवार जो सरनेम संदस कहिं न कहिं वडेरे या पुरखे जे नाले जे आधार ते रखियल हूंदो आहे।             

नुख़ ऐं सरनेम बाबत हिक बेहद अहमियत वारी गालिह ते धिआनु डियण ज़रूरी आहे ऐं इहा गालिह आहे त इहो बिलकुल ज़रुरी न आहे त सागियो सरनेम वापिरायिण वारन जी नुख़ बि सागी हुजे छो जो इहो मुमकिन आहे त अलग अलग नुख़ वारन जे वडे जन्हि जे नाले ते सरनेम रखियो वियो हुजे तिन जा नाला सागिया हुजन। नुख नानाणी बि थिये त डाडाणी बि मतलब पीउ पुट्र ऐं पोट्रे जी डाडाणी नुख त सागी थिये पर नानाणी नुख अलग अलग थिये छो जो इहा पिणु रिवायत रही आहे त सागी नुख वारन में शादी करण जी मनाही आहे। सिंधियिन में शादी खां अगु पुडा मटायिण जी रसम थींदी आहे इहो हकीकत में हिक बिये खे पंहिंजी पंहिंजी नुख़ जी जाण डियण आहे।

सिंधी कौम बुनियादी तोर हिन्दु आहे सो गोत्र जी गालिह करण खां सिवाय हीउ लेखु पूरो करण सही महसूस न थो थिये। हुअं बि सिंधी पिणु नुख़ खां गोत्र जो ई उपयोग कंदा हुआ। पुरातन समे में अंगिरा, कश्यप, वशिष्ठ ऐं भगु इन्हन चैयन महर्षीन जे नाले ते गोत्र जी शुरुआत थी अगते हली जमदगनि, अत्री, विश्वामित्र ऐं अगस्त्य महर्षीन जा गोत्र मिली करे हिन्दुन जा शुरुआती अठ गोत्र बणिया। समे आहार बियन महर्षीन / ऋषिन जे गोत्रन जी शुरुआत थियण सबब गोत्रन जो तादाद वधन्दो रहियो आहे।

सिंधियिन में नुख़ जी ऐं बियन हिन्दुन में गोत्र जी इहा रिवायत केतिरी मज़बूत आहे इन जो मिसाल मुखे महाराष्ट्र में बि मिलियो आहे। हितां जा मकानी माणुहू शादी जी पक करण खां अगु हिक सुवाल ‘तुमचा मूल गांव’ तव्हांजो असली गोठु कहिड़ो आहे ज़रुर पुछंदा आहिन।