NCPSL ऐं राज्यन जूं सिंधी अकादमियूं

इन किसम जी संस्थाउन जो हिकु मकसद हूंदो आहे त समाज में सिंधी भाषा वास्ते, सिंधी साहित्य वास्ते सुजागी पैदा करण। हाणे जे इन्हन सिंधी संस्थाउन जे खिलाफ नाराज़गी भरियो आवाज़ वज़ूद रखे थो त इहो त कबूल करण घुरिजे त इहे संस्थाउं सुजागी आणिण जे मकसद में कुछ हद तायीं त ज़रूर कामियाब आहिन। हाणे जे इन्हन लेखन जो विचार कजे त इहे हिकु त हिक सिंधी पहाके साये खे सहे कोन सखणे खे डिये कोन जो बेहतरीन इजिहार महसूस थियन था ऐं बियो असां सिंधी समाज जी आम खूबी सिर्फ पाण खे सही ऐं बियन सभनी खे गलत समझण जो हकीकी इजिहार आहिन।

चाहे इन्हन संस्थाउन में ओहदन पहुतल शख्स कीयं बि ओहदो हासिल करण में कामियाब थिया हुजन। चाहे सिंधी भाषा ऐं सिंधियत जे वाधारे जे विषय में उन्हन जी योजनाउन सां असां सहमत न हुजउं या इन्हन लेखन मूजिब इन्हन ओहदेदारन ते फ़िज़ूलखर्ची जी तोहमतूं सही बि छो न हुजे पर इहो त ज़रूर ऐं ज़रूर कबूल करण घुरिजे त इहे ओहदेदार पहिंजी सोच ऐं सलाहियतुन मूजिब सिंधी भाषा ऐं सिंधियत जे वाधारे लाय कमु करे रहिया आहिन।

हिते मां हिक गालिह जो ज़िकुर ज़रूर करण चाहियां थो। आशा चाँद ऐं मां [एस पी सर] तकनीकी वाधारे जो सहारो वठी गुजिरियिल अटकल बिन डहाकन खां वठी भारत जे सिंधी समाज में सिंधी भाषा ऐं सिंधियत जे वाधारे वास्ते सुजागी आणिण जी कोशिश करे रहिया आहियूं। मज़े जी गालिह आहे जो आशा चाँद जन जो पूरो ज़ोर अरबी सिंधी ते आहे त मां देवनागिरी सिंधी जो हिमायती आहियां मतलब असां जो मकसद सागो हूंदे बि असां हिक बिये जा उबतड क़ुतुब आहियूं। आम सिंधी रिवायत थियण इहो घुरिजे त असां हिक बिये जा रक़ीब हुअण घुरिजूं पर हकीकत में असां हिक बिये सां विचारन जी डे वठु कन्दा आहियूं त बियो छा करे सघिजे थो? ऐतिरो ई न पर मुखे त इहा बि खबर मिली आहे त आशा चाँद जन भारत जे जहिं बि शहर में वञन द सिंधु वर्ल्ड डॉट कॉम मुहिंजी वेबसाइट जी साराह ज़रूर कन्दा आहिन। इहो सिर्फ इन करे मुमकिन आहे छो जो असां बयी आम रिवायत मूजिब सिर्फ पाण खे सही न समझी हिक बिये कोशिशिन जो क़दुर कयूं था छो जो चाहे असां जूं राहूं अलग छो न हुजन पर मंज़िल ऐं मकसद त सागो आहे।