मुहिंजा सिंधी देवनागरी जा नियम

हाणे फिलम जो क्लाइमेक्स मतलब हिन लेख जे लिखण जे मकसद तरफ था हलूं। मकसद आहे सिंधी भाषा बाबत गुजिरियल हिक डेढ डहाके में मुहिंजे अभियास हासिल कयल गियान जी जानकारी अयं पहिंजे देवनागरी में लिखण लाय तय किअल मुहिंजा नियम।
01. सिंधी भाषा जे हिकजहिडायी रखन वारन उचारन जिन जे वासिते अरबी लिपीअ में अलग अलग हरफ आहिन पर देवनागरी वर्णमाला में अलग अलग वर्ण न आहिन उनहन सभनी जे देवनागरीअ में लिखण वकत हिकु अयं सागियो वर्ण लिखियो वेंदो। मतलब उचार में जेको थोरो घणो फरकु आहे उन लाय न त लीक कमि आंदी वेंदी न टुबिको। मिसाल तोर
ब जे उचार वारे अरबी लिपिअ जे बिनही हरफन लाय देवनागरी लिपिअ जो वर्ण ब कमि आंदो वेंदो त स जे उचार वारे अरबी लिपिअ जे टिनही हरफन लाय देवनागरी वर्णमाला जे वर्ण स जो उपयोग थींदो।
02. सिंधी भाषा जे उचारन मूजिब लिखण जी खूबीअ ते त धियान डिनो वेंदो पर इन कबूल कयल हकीकत खे बि नजरअंदाज न कबो त भाषा चाहे कहिडी बि छो न हुजे ऐराजी बदिलजण ते भाषा जे उचारन में थोरो घणो फरकु अची वेंदो आहे।
03. सिंधी भाषा जे हरफहलत पछाडी वारो हुजण, केतिरिन ई अखरन में हरफहलत जे बेहद घटि आवाज वारे उचार खे हुजण सां गडोगडू अरबी लिपिअ में लिखण वारन जे ज़ेर ज़बर अयं पेशु जो उपयोग बंद करण जी गालिह धियान में रखी मां पहिंजे वासिते इहो नियम ठाहियो आहे त अखर जे पछाडीअ वारे हरफ सां जुडियल हरफ हलत लिखणु जरुरी न हूंदो।
04. गुजिरियल बिन टिन डहाकन में हिंदी भाषा जे लिखण ते तरीके जे असर हेठि देवनागरी सिंधी में लिखण वकत केतिरा ई अखर उनहन जे हिंदी में लिखण मूजिब लिखिया वंञन था।
मिसाल तोर मुअल शखस खे सिंधी भाषा में सुरगुवासी त हिंदी भाषा में स्वर्गवासी चयो वेंदो आहे।
अंग्रेजी अखर School सिंधी तोडे हिंदी बिनही भाषाउन में जियें जो तियें कमि अचे थो। हिंदी भाषा में इहो अखर स्कूल इन रुप में लिखियो वेंदो आहे पर सिंधी भाषा में इन रुप में लिखण सही कींअं थो थी सघे ? छाकाण त सिंधी भाषा उचारन मूजिब लिखी वेंदड भाषा आहे अयं सिंधी भाषा में इन अखर जो उचार करण वकत असां इ जो साफ साफ अयं चिटो उचार कयूं था सो सिंधी देवनागरी में लिखण वकत इहो अखर इसकूल इन नमूने लिखण घुरिजे।
अंञा हिकु मिसाल हिंदी भाषा जे सिंधी भाषा ते असर हेठि शागिरद या तालिबेइलम (student) जे वासिते हिंदी भाषा जो अखरु विद्यार्थी सिंधी अखरन में शामिल थी वयो आहे अयं जियें जो तियें लिखियो वेंदो आहे। सिंधी भाषा जी उचारन मूजिब लिखियो वंञण जी सिफत अयं इन अखर जे सिंधी उचार ते धिआनु डिजे त इहो अखर विदियारथी इन रुप में लिखणु घुरिजे।
मतलब मुहिंजो पहिंजे देवनागरी लिखण वासिते नियम इहो थियो त हिंदी भाषा जे असर हेठि अधु वर्ण लिखणु बंद। हा नालन में अचण ते इहो जरुर लिखियो वेंदो छाकाण त नाला शखसी निशानी थियन अयं नालो लिखण जो तरीको बि हर हिक जो पहिंजो पहिंजो थिये।
05.01. सिंधी भाषा में केतिरा ई हरफ घणा ई भेरा अखरन में गडु कमि अचन था। अरबी लिपीअ जे ये याकूत या ये यको (देवनागरी वर्ण य) अयं अलफु हमजडो (देवनागरी वर्ण इ) हरफन जो काफी सिंधी अखरन में गडु थियल नजर अचे थो। उचार करण वकत घणो करे य जो त साफ अयं चिटो उचार कयो वंञे थो पर इ जो उचार घटि थिये थो हालांकि केतिरा इन जी उबितड नमूने इ जो चिटो त य जो अणचिटो उचार कनि था। सो समझाइणु अयं समझायिणु बयी सही लेखिया वेंदा।
05.02. हिक सिंधी अखर अयं ते धिआनु डियो अंग्रेजी में इन सिंधी अखर लाय And त हिंदी में और जो उपयोग थिये थो। सिंधी देवनागरी में इन अखर खे उचार धियान में रखी अयं या अइं रुप में लिखणु घुरिजे पर असां रिवायती नमूने में लिखण करे ऐं लिखूं था। धिआनु डियो देवनागरी वर्णमाला सेखारिण वकत सेखारियो वेंदो आहे ऐ ऐनक का मतलब इन जे उचार में न त अ आहे न य।
मां पहिंजे देवनागरी वासिते जेको नियम ठाहियो आहे उहो आहे लिखण वकत रिवायत न पर उचार खे अहमियत डिनी वेंदी। मतलब अगिते मां ऐं न पर अयं लिखंदुम। सागिये नमूने सिंधी हरफ वासिते हिंदी वर्ण जी चूंड करण वकत उन वर्ण तोडे सिंधी उचार खे धियान में रखी वर्ण जी चूंड कयी वेंदी।
हिकु भाषा विगियानी या मकबूल साहितकार न हुजण खां पोय बि मां सिंधी देवनागरीअ जे लिखण जा नियम तियार करण जी हिमथ सिरफ इन करे कयी आहे जो मां इहे नियम बियन जे वासिते न पर सिरफ पहिंजे देवनागरी लिखण वासिते ठाहिया आहिन। तवहां सां शेयर करण जो मकसद सिरफ ऐतिरो आहे जो तवहां खे मुहिंजो लिखियल पढिहण में सहूलियत थिये। बियो इहो मुमकिन आहे त मुहिंजी हीय पहिंजे सिंधी देवनागरी लिखण में हमजिंसायित आणिण जी कोशिश थी सघे थो सिंधी देवनागरी लिखण जे नियमन ठाहिण जी शुरुआति साबित थिये।