सिंधी धारमिक विशवास Sindhi Religious Faiths

दसम पिता गुरु गोविंदसिंह साहिबन जे सिखी पंथ जे बरपा करण जे केतिरिन ई डहाकन पोय तायीं बि सिंधी समाज अयं पंजाबी समाज में पूजा पाठ करण जे तरीके में को निफाक न हुओ पर सिखी पंथ जे सिख धरम जे रुप में सामाजिक कबूली वधण खां पोय कुझु निफाक या यकराय न हुजण सामहूं अचण शुरु थिया।
इन निफाक जो बियो वडो सबब शायद इहो रहियो जो गुरु नानक देव साहिबन खे रुहानी रहबर पूजिण वारो सिंधी समाज सिखी पंथ या धरम मूजिब धारमिक हलत हलण खां परे रहियो। बुनियादी फरकु इहो बि समझ में अचे थो त सिंधी समाज पहिंजी घण पांथायी रिवायत ते हलंदो आयो पर पंजाबी समाज, सिंधी समाज जी इन गालिह खे कबूल करण लाय तियार न थियो।
नतीजो गुरु साहिबन जी बेअदबी जे रुप में सामहूं आयो। सिंधी समाज पहिंजी रिवायत मूजिब पंहिंजन मंदिरन में बियन देवी देवताउन अयं आराधिय देवता झूलेलाल साहिबन जी मूरतिन खे विराजमान कंदे पूरी शिरधा, सिदक अयं विशवास सां धन सिरी गुरु गिरंथ साहिब विराजमान कंदे नियमन सां पूजा कंदो रहियो। सिंधिन जे विशवास शिरधा जो इहो वडो सबूत आहे त घणा सिंधी परिवार शादीअ जहिडे खुशीअ जे मोके तोडे मोत ते बारिहे खां अगु पाठु रखाइण जी रिवायत जो त पालन कंदा आहिन पर गडोगडु सोनी दरबार अमिरतसर वंञण वारन सिखन खे पहिंजे शहर जे रेलवे इसटेशन ते लंगर खाराइण जी सेवा सिंधी कंदा आहिन।
इहा हकीकत त भारत में जगह जी घटितायीअ केतिरिन ई साधन पंहिंजन घरन जे बहिरियें कमरे खे दरबार जो रुप डयी धन सिरी गुरु गिरंथ साहिब विराजमान किया आहिन, बि शायद सिंधी समाज अयं पंजाबी समाज जे निफाक जो सबब बणी। इहो निफाक ऐतिरो वधियो जो पंजाबी समाज धन सिरी गुरु गिरंथ साहिब खणी वंञण लाय वडी तादाद में – मेड रुप में – सिंधी दरबारुन में पहुचण शुरु कियो।
सिंधी समाज पंहिजे इतिहास जे शुरुआति खां सामाजिक रुप में ठहकी हलण वारे तोडे अगिरायी न करण वारे समाज जे रुप में मशहूर रहियो आहे सो निफाक अयं जोर जबरदसती टारिण वासिते बेशुमार सिंधी दरबार पहिंजी दिल दुखाये बि पूरे पूरे अदब सां धन सिरी गुरु गिरंथ साहिबन खे पहिंजे पहिंजे शहर जे मुखिय सिख गुरदुआरे में जमा कराये अचण जी मजबूरी कबूल कयी।
सुवाल जेको बाकी रहिजी वियो उहो आहे त छा कडिहिं पंजाबी सिख समाज इहो अहसास कंदो त सिंधी दरबारुन में धन सिरी गुरु गिरंथ साहिबन जे विराजमान न हुजण खां पोय बि सिंधी समाज जे गुरु नानक देव महाराजन में विशवास अयं शिरधा में का कमी ईंदी छा ? धियान में रखण जी गालिह इहा बि आहे त सिंधी समाज, पंजाबी समाज वांगुर अमिरत छके सिखी धरम कबूल किअल समाज न आहे।