संत बाबा आसूदाराम

सिंधी संत – सखी बाबा – संत आसूदाराम
संत बाबा आसूदाराम पहिंजी सजी हयाती गुरु (संत कंवर राम साहिब) सेवा में अर्पण करे छड़ी हुयी। संतन पहिंजी हयाती में पन्नो अकील गोठ ऐं आसपास जे बियन गोठन / शहरन में सामाजिक सुधार ऐं आमु इंसान जे फायदे जा केतिरा ई कम कया हुआ। हिन मशहूर सिंधी संत बारन जी तैलीम वास्ते “पाठशाला”, आमु माणुहुन जी तंदरुस्ती जी संभाल वास्ते अस्पताल (मेडिको केअर सेंटर) ऐं बुजुर्गन ऐं बे घरन जी संभाल वास्ते बुढा आश्रम – बरपा कया आहिन। पन्नो अकील गोठ उहा जगह आहे जिते संत बाबा आसूदाराम साहिबन जी दरबार हुयी।

लोक सेवा जे इन्हन कमन ऐं बिना सुवारथ जी सेवा – सभु कुछ लोक अर्पण करण जी भावना सबब संदन जसु वधन्दो रहियो ऐं उन्हन जी सखावत सबब माणुहुन संतन खे सखी बाबा जो लक़ब डयी छडियो। संत आसूदाराम जो जन्म जटों गोठ (पन्नो अकील तहसील जिलो सखर, सिंध) में 03 अप्रैल 1895 ते भाई लुधरोमल ऐं चैनीबाई जे सुपुत्र जे रूप में थियो हो। सजो गोठु हिन बालक जी रवाजी बलकन खां निराली हलत मतलब वक़तसार व्यवहार में ओचितो बदल जी जगह ते हमेशा शांत रहण ते मोहित हो। बालक फ़क़त चोथें दरिजे तायीं स्कूली तैलीम हासिल कयी।

बालक जो आध्यात्मिक सफर सिंधु जे संत शिरोमणी – संत कंवर राम साहिबन जे गुरु – सतराम दास साहिबन सां संदस घर खां फ़क़त हिक किलोमीटर परे वारे गोठ हाजी गांव में मुलाकात थियण ते शुरू थियो। बालक जो हिन दुनिया में चाह न डिसी पिता लुधरोमल सतराम दास साहिबन खे वेनंती कयी त संत बालक खे पहिंजी सेवा जो मोको डियन। संतन इहो चवण चयो त हिन बालक सिर्फ ऐं सिर्फ गुरु सेवा वास्ते ऐं आमु इन्सानन जे उद्धार वास्ते जन्म वरतो आहे। इहो बुधी त पिता बि वायडो थी पयो। सतराम दास साहिबन पिता खे चयो त हीअ बालक संतन जो आहे ऐं बालक जे जवान थियण ते उनखे वठी रहरकी दरबार अचिजो।

इहा शायद त सतराम दास साहिब जी महर हुयी जो गोठ वापस अचण खां पोय आसूदाराम जो सजो वक़त प्रभु प्रार्थना में गुजारिण लगो। हू पहिंजी पसगिरदायी जी हर हलचल खे धियान डिसण समझण में वक़त गुजारिण लगो। आसूदाराम जे जवान थी रहरकी दरबार पहुचण वक़त रहरकी दरबार संत कंवर राम साहिब सम्भालिन पिया।

कंवर राम साहिब हिन खे दरबार जे सेवक जे रूप में कबूल कन्दे गोशाला जी संभाल करण जो कमु डिनो। आश्रम में आसूदाराम जे सुमहण जी जगह हुयी साईं सतराम दास साहिब जो समाधी वारो कमरो। आसूदाराम त पको फेसिलो करे चुको हो त सजो जीवन गुरु भगिती ऐं सेवा में गुजारिणो आहे तहिंकरे उनखे हीअ गालिह हिकु वरदान महसूस थी। भगत साहिब बि आसूदाराम जी निष्काम निसुवारथ सेवा ते खुश थी उनखे शिव स्वरुप (भगवान शिव जहिडो) चवण लगा।

गुरु भगत कंवर राम जे हुकुम मूजिब आसूदाराम गिरहसथ आश्रम में दाखिल थिया। गुरु जी आज्ञा मूजिब संतन, भगत साहिब जे खास सेवादारी भाई मोतीराम जी कन्या बैंसर बाई सां विवाह कियो। 1940 में आसूदाराम साहिब वापस पन्ना अकील गोठ अची उते दरबार बरपा कयी। वक़त सार संत आसूदाराम साहिब जो जसु ऐं संदन सामाजिक कमन जी चर्चा घर घर थियण लगी ऐं संतन जो नालो सिंध ऐं हिन्द जे केतिरन ई शहरन में मशहूर थी वियो।

जन्म वांगुर [राम नवमी] बाबा आसूदाराम साहिब फानी दुनिया खां किनारो करे जिसमानी बंधनन खां आज़ाद थी सुरगुवासी थियण वास्ते 04 सितम्बर 1960 [अनंत चतुर्थी] जो बारिहांमाओ डिण वारो डींहुं चूंडियो । रिवायती अंतिम संस्कार जी रसमुन खां पोय 15 सितम्बर 1960 ते पिता जी आध्यात्मिक गदीअ ते साईं चांड्रूराम साहिब खे विराजमान करायो वियो।

हिन वक़त साईं चांड्रूराम साहिब लखनउ जे शिव शान्ती आश्रम जी मदद सां पिता जे अधूरन कमन खे पूरो करे रहिया आहिन। शिव शान्ती आश्रम जो उदघाटन (शुरुआत) भगत कंवर राम साहिब जे सुपुत्र साईं पेसुराम जन 03 सितम्बर 1971 ते कियो हो।