संत बाबा गेलाराम

जलगांव – गोदड़ीवाला धाम – फेमस सिंधी संत
12 मार्च 1930 ते सिंधु में जन्म वरतल बाबा गेलाराम जन संत बाबा हरदासराम जिनखे गोदड़ी वारो संत बि सडिबो आहे जा सचा शिष्य हुआ। गेलाराम जो विवाह बिंद्रा देवी सां थियो हो। मुल्क जे विरहाड़ें वक़त जोड़े खे हिक धीउ ऐं हिक पुट्र जे रूप में ब बार हुआ। भारत में अचण खां पोय गेलाराम पहिंजे माउ पीउ ऐं कुटुंब सूधो छतीसगढ जे भाटापारा में थाईंको थियण वास्ते दुकान खोलियो। हालांकि हू धंधो पयो करे पर ज़िन्दगीअ जी हर गालिह ऐं हलत में आध्यात्मिक जीवन लाय चाहु तोड़े परमपिता परमात्मा में अटूट विशवास नज़र अचण डुखियो कोन हो। गेलाराम तमाम सदी ज़िन्दगी गुज़ारीन्दे सभनी सां निवडत भरी हलत हलन्दो हो। दुनियावी तौर मुकमिल गेलाराम जो दिल ऐं दिमाग बेआराम हुआ छो जो संदस दिली चाहत हुयी त समाज जे बुजुर्गन जी सेवा ऐं समाज जे पुठिते पयल तबके जी सेवा वास्ते हू कुछ कमु करे। समाज में फैलियिल कुरीतियन ऐं सामाजिक बुरायिन खे दूर करण जे कम में बहरो वठे।

बाबा हरदासराम ऐं गेलाराम जी पहिरियीं मुलाकात हिक अजीब संजोग हो छो जो गेलाराम जो विचार हो त खेस राह डेखारिण वास्ते सचो गुरु मिलियो आहे त बाबा हरदासराम जी नज़रुन में पहिंजो वारिस ऐं दरबार संभाले सघन्दड मिलण जी ख़ुशी हुयी। गेलाराम खे पहिंजो वारिस ज़ाहिर करण खां अगु बाबा हरदासराम संदस अलग अलग हालतुन में परीक्षा वरती। ख़ुशीअ जी गालिह जो हर भेरे गेलाराम पहिंजी क़ाबिलियत साबित करण में कामियाब थियो। 18 अक्टूबर 1977 ते जडिहिं संतन फानी दुनिया खां चालिणो कयो त गेलाराम खे संदन वारिस ऐं जलगांव दरबार जे संत जी गदीअ ते विराजमान किया वियो। गेलाराम साहिब न सिर्फ बाबा हरदासराम जे शुरू कियिल कमन खे अगते वधायो पर पहिंजे गुरु ऐं रुहानी रहबर जो नालो अमर रखण वास्ते केतिरन ई शहरन में गोदड़ीवाला धाम बरपा किया जेके सामाजिक सुधार ऐं समाज जे पुठिते पयल तबके जे वाधारे जा कम कन पिया था।

बाबा गेलाराम साहिब जलगांव जी सेवा समिति खे संत कंवर राम ट्रस्ट जे रूप में बदिलायो जीयं न सिर्फ मंदिर जी संभाल थिये पर बाबा हरदासराम जा शुरू कियिल कम लागीतो हलन्दा रहन। बाबा गेलाराम जे बेशुमार सामाजिक कमन मां के मुख्य आहिन –
गरीब कुटुंबन खे नियाणी जे विवाह वक़त माली मदद,
तंदरुस्ती जी संभाल वास्ते हाणोके जुग जी डॉक्टरी सहूलियत मयसर करें डियण,
बुजुर्गन खे आराम दायक जीवन गुजारिण में मदद मिले इन लिहाज खां जलगांव ऐं बियन शहरन जे बुढा आश्रमन में सहूलियतूं वधायिण
विवाह जे वक़त समाज जे पैसे जो ग़ैर उपयोग टारिण जे मकसद सां सामुदायिक विवाह जी रीत शुरू करण।

जलगांव शहर में बाबा गेलाराम जन जी रुहानी शकतिन बाबत केतिरियूं गालिहियूं बुधण लाय मिलन थियूं। संत गेलाराम साहिबन जो डींहुं सुबूह जो नियम सां गुरु ग्रंथ जी बाणी जे पाठ सां शुरू थींदो हो। सजो डींहुं कमु कन्दे बि गुरबाणी जो जाप हलन्दो रहंदो हो। चवन था शायद इन्ही जो ई असर हो जो संतन जी वाणी में परमात्मा जो निवास थी वियो संत जेको बि चवन्दा हुआ सो सचु थी पवंदो हो। हिकु भेरो सतसंग वक़त दरबार जे कहिं सेवादारी कहिं बिये शहर में रहन्दड हिक श्रद्धालु खे अध रंग थियण बाबत संतन खे बुधायो तहिं ते बाबा गेलाराम साहिब सतसंग जे विच में ई चयो त हू उन श्रद्धालु खे पहिंजियूं प्राथर्नाऊँ मोकिलिन था ऐं प्रभु कृपा सां हू ठीक थी वेंदो। अज़ब जी गालिह आहे जो जहिं खे डॉक्टर बि जवाब डयी चुका हुआ सो न सिर्फ ठीक थी वियो पर बाकी सजी उमर वरी कडिहिं बीमार कोन थियो।

08 दिसंबर 2008 ते बाबा गेलाराम साहिब जो स्वर्गवास थियो। रिवायती अंतिम संस्कार खां पोय संतन जी हाठियिन जा चार हिसा किया विया। हिक हिसो हिक वड़े कलश में अजु बि जलगांव दरबार में संतन जी समाधी जे रूप में मौजूद आहे। बाकी ट्रिन मां हिकु हिकु हिसो हरिद्वार में गंगा में, नासिक में गोदावरी में ऐं इलाहाबाद में संगम [गंगा जमुना ऐं सरस्वती] जे पवित्र जल में परवाहु कयो वयो।