संत चांड्रूराम

लखनउ जा सिंधी संत – शिव शान्ती आश्रम
9 सेप्टेम्बर 1947 ते सिंध जे सखर जिले जे पन्नो अकील गोठ में संत चांड्रूराम साहिब जो जन्म थियो। जीयं त उन डीहं ते जन्माष्टमी हुयी तहिं करे आमु माणुहू संतन जे जन्म खे भगवान श्रीकृष्ण जी कलजुग ते कृपा जे रूप में बि डिसन्दा आहिन।

बालपणे खां ई संत चांड्रूराम साहिब वेदांत ऐं बियन धर्म ग्रंथन जे अभ्यास डांहु खास चाहु डेखारिण शुरू कियो। हू टीन ऐज [उणवीहन सालन] पूरी करण खां अगु ई हू गुरु ग्रंथ साहिब जी गुरबाणी, श्रीमद भगवत गीता ऐं रामायण जो काफी गहिरो अभ्यास ऐं उन्हन जो ज्ञान हासिल करे चुका हुआ। पिता आसूदाराम जी रहबरी हेठि हू पुरातन सनातन हिन्दु संस्कृति, सभ्यता ऐं आध्यात्मिक प्रथाउन ऐं विरसे खे न सिर्फ चंगी तरह सां समझण लगा हुआ पर गडोगडु आमु माणुहुन जे रोजाने जीवन में इन्हन खे वरी शामिल करण ऐं इन्हन जी अहमियत सां आमु माणुहुन जी वाकफियत करायिण जी सिमत में कमु करण जो फेसिलो बि वठी चुका हुआ।

1970 में चांड्रूराम साहिबन भारत में रहण जो फेसिलो कियो ऐं उत्तर प्रदेश जी राजधानी लखनउ में 3 एकड़ ज़मीन ते आलीशान शिव शान्ती आश्रम ठाहिरायो। शिव शान्ती आश्रम में हाणोके जुग जी सभनी सहूलियतुन वारा 5 हाल ऐं 150 कमरा आहिन। शिव शान्ती आश्रम फक्त हिक आध्यात्मिक विद्या जो मरक़ज़ या को धार्मिक मंदिर / स्थान न आहे पर हकीकत में हिन आश्रम मां संत चांड्रूराम साहिब पहिंजी मानवता जे वाधारे जी योजनाउन, दरिद्र नारायण जी सेवा जे कमन जी निगाहबीनी कन्दा आहिन। केतिरियूं ई सामाजिक संस्था संत कंवर राम साहिब सेवा मंडल, संत बाबा आसूदाराम सेवा समिति, सखी बाबा युवा मंडल ऐं संत बाबा आसूदाराम आइडियल सिंधी मास मैरिज ब्यूरो वगैरह शिव शान्ती आश्रम मां ई कमु करे रहियूं आहिन। वेझिड़ायी में एन सी पी एस एल पारां सिंधी बारन खे सिंधी विषय खणी आय ए एस जहिड़ा वड़न ओहदन वारा इम्तिहान डियण जी तयारी करायिण वारे सेन्टर जे रूप में बि शिव शान्ती आश्रम मशहूरी हासिल करे चुको आहे।

संतन ते मधुर पुरसुकून आवाज़ जे रूप में परमपिता परमात्मा जी विशेष कृपा आहे। आमु इन्सानन जे सुमिहियल मन खे संत, मशहूर आध्यात्मिक गुरुन, फिलॉसॉफर, सन्तन फ़कीरन ऐं दरवेशन जा शब्द गाये जागायीन्दा आहिन। पंहिंजे सत्संग ऐं प्रवचन जे दौरान संत हमेशा आलमी भाईचारे ते ज़ोर डीन्दा आहिन। संतन जी इच्छा आहे त संदन शिष्य ऐं श्रद्धालु सामाजिक समानता, बधी ऐं शान्ती वास्ते कमु कन। संत चांड्रूराम साहिबन जो अट्टू विशवासु आहे त

गुरु अनेक पर सतगुरु एक

ऐं गुरु कृपा सभ खां वडी आहे। शायद इहो ई सबब आहे जो जडहिं अमरावती में अमर शहीद संत कंवर राम साहिब जो [100 करोड़ रूपियन जी लागत सां] आलीशान स्मारक ठाहिण जो विचार थियो त संत चांड्रूराम साहिब सभु खां अगु पाण डोनेशन डिनो।

पंहिंजे सत्संग ऐं प्रवचन जे दौरान संत हमेशा सामाजिक बुरायिन, वक़त ख़ारिज रीती रिवाजन प्रथाउन जेके समाज खे खोखलो कनि पयूं खे बदिलायिण ते ज़ोर डीन्दा आहिन। संतन जी इच्छा आहे शिव शान्ती आश्रम जूं शाखाऊँ वधन जीयं मानवता जी सेवा जे कम जो वधीक फैलाव [विस्तार] थी सघे। असां टीम द सिंधु वर्ल्ड परमपिता परमात्मा जे चरणन में वेनंती कयूं था त संतन ते वडी आरजा जी महर कन जीयं संत लम्बे अरसे तायीं दरिद्र नारायण जो भलो कन्दा रहन।