गोगल वीर

पुराणे समे में कहिं वक़त राजा गोपीचंद तो ठटे ते राजु हुओ ऐं संदस राजधानी पीर पठे में हुयी। हिक डींहुं राजा गोपीचंद जी कुंआरी धीउ वाछल बाई पहिंजे महल जी दरीअ मां सिंधु दरियाह में हिकु अलग ई किसम जो गुल डिठो। हुन दासिन खे मोकिले इहो गुल पाण वटि घुराये वरतो। इहो गुल दरअसल में कहिं सतपुरुष जे वीर्य मां ठहियल हुओ सो इन गुल खे सुंघण सबब इहो वीर्य वाछल बाई जे सरीर में दाखिल थी वियो ऐं हुअ गर्भवती थी पयी।राजा गोपीचंद इहा गालिह बुधी लोक निन्दा जे भव सबब चिंता में पयजी वियो। आखिर राजा सेवकन खे हुकुम डिनो त गर्भवती वाछल खे घाटे जंगल में छडे अचन। 

चवन था जहिं वक़त सेवक वाछल खे छड़िण पे विया त बैलगाड़ीअ जो हिकु बैल नांग जे चक पायण सबब मरणकी हालत में वंञी पहुतो। उन वक़त वाछल जे गर्भ मां आवाज़ आयो त बैल खे रस्ते जे किनारे ते उभरियिल ड्रभु [सनिहो नाज़ुक गाहु ] सुंघायिण सां बैल जो जीवन बची वेन्दो। सेवकन इहो कियो ऐं पोय वाछल खे घाटे जंगल में छडे बैलगाड़ी समेत वापस अची समूरी हकीकत राजा गोपीचंद खे बुधायी।

गर्भ जो अरसो पूरो थियण ते वाछल हिक पुट्र खे जन्म डिनो ऐं बालक  गुफा में जन्म वठण सबब खेस गोगल चवण लगी। गुफा हिकदम घाटे जंगल जे विच में हुयी ऐं आसेपासे में सिर्फ नांग रहन्दा हुआ। गोगल पहिंजे तोड़े नांगन वास्ते हिक खड़ खोट्रे पाणी जो बंदोबस्त कियो जहिं करे नांगन जे जीवन जी रखिया थी ऐं उहे गोगल खे पहिंजो राजा मंञी खेस पहिंजो विष [ज़हर ] पियारिण लगा। नांगन जो ज़हर पी वड़ो थियण वारो गोगल काफी सघारो थी पियो ऐं जंगल जे बियन जानवरन खां नांगन खे बचायिण लगो। नांगन बि तरह तरह सां सेवा करे खेस खुश रखण लगा पर पहिंजी उमिर जे बारन सां न खेड़ी सघण सबब गोगल वक़त ब वक़त उदास थी वेन्दो हुओ। 

हिक डींहुं जंगल मां हिकु वड़ो काफ़िलो लंघियो। सभु उञं सबब बेहाल हुआ ऐं गोगल जी खोट्रियल खड़ में पाणी डिसी खुश थिया पर नांगन जे हुअण सबब को बि पाणीअ वेझो वंञण जी हिमथ कोन पियो करे। गोगल चयुन त जेकडहिं काफिले वारा गोगल जी उमिर जे कुछ बारन खे उते छडे वंञण जी गालिह कबूल कनि त हू नांगन खे परे मोकिले सघे थो।

काफिले जे वंञण खां पोय बारन सां रांदि करे त गोगल खुश थियो पर बारन जे खाधे जो विचार करे चिंता में पयजी वियो। हुन नांगन खे इन्हन बारन खे बि ज़हर पियारिण वास्ते चयो। नांग चिंता में पयजी विया त ऐतिरो ज़हर किथां आणिन जो सभनी जो पेटु भरिजे। आखिर नांगन गोगल खे मारिण जो फेसलो कियो वड़ी मुशकिल सां हिकु नंढे कद वारो हणुखुण नांग तियार थियो पर उन वटि ऐतिरो ज़हर कोन हुओ जो गोगल मरी सघे सो अज़गर हुन खे पहिंजो बि ज़हर डिनो।चवणी आहे त तहिं समे खां वटि अज़गर नांग गैर ज़हरीला थी पिया। 

हणुखुण खे खबर हुयी त गोगल जी नज़र पवण ते बेहद खतरनाक ज़हर बि बेअसर थी वेन्दो आहे सो हुन गोगल खे गिचीअ पुठियाँ कियाडीअ ते कंध हेठां डंघु पातो। डिसी न सघण करे गोगल ज़हर जे असर हेठ मरी वियो। मरण खां अगु हुन नांगन खे चयो त जे तव्हां बिना सबब माणुहुन खे चकु न पायिण जो वायदो कियो त मां तव्हां खे वरु डियां त इंसान तव्हां जी पूजा करे तव्हां खे खीर पियारिन्दों ऐं जेकडहिं इन्सान पूजा खां पोय सगिड़ो ठाहे पाण खे ऐं पहिंजन जानवरन खे बधन्दो त उन्हन खे नांगन खां बचाउ मिलन्दो।