संत बाबा हरदासराम

जलगांव वारो संत – गोदड़ी वारो घनशाम – मशहूर सिंधी संत
05 दिसंबर 1904 सूमर जे डीहं खे सिंधु जे इतिहास में अहमियत हासिल आहे छो जो प्रभु परमात्मा जी भक्ति में लीन हिक आत्मा इन डीहं ते नवाबशाह जिले जे हालाणी भालाणी गोठ में रहंदड रिजंकाबाई ऐं साबूराम जे घर पुट्र जे रूप में जनमु वरितो हो। हिन बार हरदासराम जी स्कूली तैलीम 1910 में शुरू थी। जडिहिं हू चौथें दरिजे में हो त हुन पहिंजे स्कूली उस्ताद सां वायदो कयो त “मां कडिहिं बि कहिं शख्स या गालिह जी डांह न डीन्दुम ऐं हमेशा जेको मुखे मिलन्दो उन ते राज़ी रहन्दुम।” 1921 में मैट्रिक जो ऐं 1923 में जूनियर प्राइमरी टीचर कोर्स करण खां पोय हरदासराम स्कूल टीचर जी सरकारी नौकरी शुरू कयी। 1924 खां 1930 जे विच में हू रोहरी जी तीर्थ यात्रा ते वसण घोठ दरबार जा दर्शन करण वियो जिते हिन पहिरियों भेरो भगत कंवर राम साहिब जा दर्शन किया। भगत साहिब खे डिसण शरत संदस ह्रदय मां आवाज़ आयो त हिअ ई उहा मूरत आहे जा मुखे हिन भव सागर मां पारि पहुचाये आत्म दर्शन कराये सघे थी। हरदासराम भगत साहिबन जो शिष्य बणी भगत साहिबन जी टोलीअ सां गडु घुमण लगो।

हरदासराम साहिब जो जीवन सिद्धांत हो सचु ऐं हमेशा सचु गालिहायो। सुठन कर्मन ऐं बियन जे भले वास्ते हमेशा तैयार रहो। स्कूली डीहंन खां संत पसुन पखियिन खास करें कुतन खे खाधो खारायीन्दा हुआ। वड़े थियण खां पोय बि नियम सां पहिंजे रोजाने खाधे मां हिकु हिसो कुतन वास्ते धार कन्दो हो। दया जी इन भावना जो विस्तार गरीबन दूरिबलन नेत्रहीन ऐं समाज जे बुजुर्गन जी सेवा जे रूप में थियो। बाबा जन जो चवण हो त असां सभु मुसाफिर आहियूं तहिं करे दुनियावी आराम जो विचार छड़े रुहानी मुकती जे मकसद पूरे थियण ते धियान डियण घुरिजे। सन्तन जे कुल्हन ते हमेशा गोदड़ी [बिस्तरो] हूंदी हुयी शायद तहिं करे घणा ई श्रद्धालु संतन खे गोदड़ी वारो संत करे याद कन्दा आहिन। आमु तौर जडिहिं बि संत कहिं श्रद्धालु ते राज़ी थींदा हुआ त हिकु टुंगरु पेसो डयी चवन्दा हुआ “सतनाम सहाई कमी न कायी। “

विरहांङें खां पोय बाबा हरदासराम जा बिया भाउर त भारत आया पर संतन पाकिस्तान में ई रहण पसंद कियो। 1949 में संत हरदासराम साहिब भारत जे दोरे ते आया हुआ पर वीजा जी मुदति अंदर वापस मोटी विया। 1953 में जडिहिं भगत कंवर राम साहिब जा सुपुत्र साईं पेसुराम साहिब सिंध जे दोरे ते विया त उन्हन जी सलाह ते बाबा हरदासराम ऐं साईं गोबिंदराम दायमी तौर भारत अचण जो फेसिलो कयो। अमरावती में संत हरदासराम साहिब पाण खे बे आराम महसूस पे कियो सो उन्हन अमरावती छड़िण फेसिलो कियाउं। कुछ वक़त अहमदनगर में नंढे भाउ प्रभदास वटि बि रहिया पर आखिर में अची जलगांव शहर में रहण जो फेसिलो करे उते संत कंवर राम सेवा मंडल ट्रस्ट बरपा करें सेवा जे कमन में मशगूल थी विया।

हिकु भेरो हिक श्रद्धालु संतन खां शादीअ बाबत पुछियो त जवाब मिलियुस मुखे ब धर्मपतनियूं आहिन हिक गुरु सेवा जेका मुहिंजे ह्रदय में निवास करे थी ऐं बी सम्पति [पेसो] जेका मुखे गरीबन घुरजाउन जी सेवा करण में मदद करे थी। बाबा हरदासराम साहिब श्रद्धालुन खे चवन्दा हुआ त पहिंजी कमायी मां कुछ हिसो ट्रस्ट में दानु कियो। जेतोणिक संत चमत्कार जी पुठ भरायी न कन्दा हुआ पर जलगांव में अजु बि उहो खूह आहे जहिं मां कहिं समे मुशकिल सां अठ डह बालटियूं पाणी निकरंदो हो पर संतन जे हिक लोटे पाणी विझण खां पोय सागियो खूह पाणीअ जे अखुट भंडार में बदिलिजी वियो।

18 अक्टूबर 1977 ते बाबा हरदासराम साहिब फानी दुनिया खे छड़े सुरग लोक पधारिया। जिसमानी तोर भले अजु संत ग़ैर मौजूद नज़र अचन था पर संदन शुरू कियिल सेवा जा कम अजु बि हलन पिया। हर साल हज़ारें श्रद्धालु सिक ऐं पियार सां गोदड़ी वारे घनशाम बाबा हरदासराम साहिब जो वरसी उत्सव जलगांव, महाराष्ट्र में, धाम धूम सां मलिहाये पहिंजे गुरु रुहानी रहबर खे श्रद्धा सुमन अर्पण कन्दा आहिन।