दादी हरीदेवी

जे बालिका जे बालपणे जो विचार कजे त हिकु मासूम चेहरो जहिं ते दिलकश मुस्कराहट हुयी नज़र अचे थो। इहा मुस्कराहट आमु तोर नेणन जे गोड़िहन जे परदे में लिकी वेंदी हुयी छो जो दीन दुखियीन खे डिसी बालिका जे कोमल ह्रदय खे चोट रिसन्दी हुयी ऐं संदस नेण जल सां भरजी वेन्दा हुआ। बालिका जी स्कूली सिखिया कराची जे सेंट जोसफ कान्वेंट में शुरू थी। संदस ग़ैर रवाजी सियाणप जो पहिरियों सबूत नज़र आयो हू अंग्रेजी गालिहायिण में एितरो त होशियार हुयी जो संदस टीचर मज़बूर थी उनखे अंग्रेजी कविता पढिहण वासिते चयो। बालिका 14 साल जी हुयी जो पिता जो सुरगुवास थियो ऐं बालिका जी जवाबदारी साधू वासवानी खे संभालिणी पयी। हैदराबाद सिंधु में स्कूली इम्तिहान में छोकिरिन में पहिरियों नंबर हासिल करे हुअ सिंधी स्कॉलर जे नाले सां मशहूर थी।
डॉक्टर बणी दुखी गरीबन जी सेवा करण जे मकसद सां बायोलॉजी विषय खणी हरी देवी मशहूर डी जे सिंध कॉलेज में दाखिला वरती। डॉक्टर थियण वास्ते खेस केंचुये (ज़मीन जे सापे) ऐं डेडर जहिडिन जीव जे सरीर जी चीरफाड़ करण ज़रूरी हो। संदस दयालु ह्रदय परमात्मा जे बणायल कहिं बि जीव खे नुकिसान पहुचायिण लाय तैयार कोन हो सो हुन पहिंजे डॉक्टर थियण जे सपने जो तियागु करे B.Sc. जी डिग्री हासिल करे संतोष कियो।
हरी देवी जी पढ़ायी पूरी कन्दे / डिग्री हासिल कन्दे कन्दे साधू वासवानीअ छोकिरिन जी पढ़ायी वास्ते मीरा मूवमेंट शुरू कयी। हरी देवी P.P.C.M. गर्ल्स स्कूल हैदराबाद में पहिरियूं सहकारी तौर ऐं पोय हेड मिस्ट्रेस तौर कमु करण लगी। स्कूल में कम कन्दडन वास्ते हिक नवजवान जो स्कूल जे हेड जे रूप में कमु करण अज़ब जी गालिह हुयी पर जल्दु ई हरी देवी जे स्कूल सम्भालिण जे तरीके, सिक भरिये व्यवहार जा सभु कमु कन्दड़ तोड़े विद्यार्थी कायिल थी पिया। पियार ऐं आदर भाव सां सभु हरी देवी खे दादी -वडी भेण चवण लगा।
विरहांङें खां जडिहिं पुणे मीरा मूवमेंट जी वरी सां शुरुआत थी त हिन भेरे स्कूल जे इन्तिज़ाम जी जवाबदारी बदिरां दादी हरी देवीअ साधन वासवानी मिशन जे कमन ऐं पहिंजे रुहानी रहबर साधू वासवानी जे सन्देश खे दुनिया जी हर कुंड में पहुचायिण जे कम खे पसंद कियो। हुन देश विदेश जा केतिरा ई दोरा किया। दादी हरी देवीअ दीन दुखियीन दूरिबलन खे डिसी पैदा थींदड असंतोष खे पहिंजन लेखन वसीले ज़ाहिर करण शुरू कियो। ” A Saint of Our Time ” संदस लिखियिल पहिरियों किताब हो जो साधू वासवानी जे बालपणे जी फोटो बायोग्राफी हो। हरी देवी अंग्रेजी ऐं सिंधी में केतिरा ई किताब लिखिया आहिन जिन में सभ खां वधीक अहमियत वारो आहे साधू टी एल वासवानी समूरी जीवनी।
16 जनवरी 1966 ते साधू वासवानी जे हिन फानी दुनिया खां पासो करण दादी हरी देवी वासिते ज़िन्दगी बदिलाइण वारी घटना साबित थी। हुअ हाणे बाल कुंज शुरू करे बारन जे संग में वधीक वक़तु गुजारिण लगी। संदस मन मोहीन्दड मुस्कान ऐं दैवीय चमक वारो सभाझो चेहरो बारन जी कशिश जो मरक़ज़ बणिजी पियो ऐं खेस “गुरु मां ” इहो नओं नालो मिलियो। चवन था इन दौर में दादी हरी देवी वक़त ब वक़त चवन्दी हुयी त

प्यार ऐं सेवा जी रोशनी खे पहिंजी ज़िन्दगी में जगह डयी पहिंजी ज़िन्दगी ख़ूबसूरत बणायो।
मुखे अज़ब थिंदो आहे त माणुहुन वटि नफरत करण वास्ते वकतु आहे छो जो हकीकत में ज़िन्दगी पियार करण वासिते बि नंढी आहे।

13 जून 2007 ते जडिहिं हुन पहिंजो जिसमानी सफर पूरो कियो त न सिर्फ साधू वासवानी मिशन हिक मज़बूत आधार खां महरुम थियो पर हज़ारें बारन जी गुरु मां बि नेणन जे दायिरे खां परे थी वयी।