संत हिरदाराम

संत हिरदाराम – भोपाल बैरागढ़ वारो फेमस सिंधी संत – समाज सुधारक
भारत जे वधि में वधि मशहूर सिंधी संतन में शामिल संत हिरदाराम जन जो जन्म 21 सितम्बर 1906 ते सिंध जे नवाबशाह जिले जे भिरयान गोठ में इंदुमती [माता] ऐं सहजराम [पिता] जे घर थियो हो। हिन बालक जो नालो रामचंद रखियो वयो। बालक जे जन्म ते खुश थियण वारा सभु मिट्र मायट्र अणजाण हुआ त हीउ बालक सिर्फ उन्हन थोरन माणुहुन जे चेहरन त न पर हज़ारे लखे दुखियिन जे चेहरन ते मुस्कान आणिण वास्ते जन्म वठी आयो आहे।

बालक रामचंद बियन बारन खां निरालो हो छो जो फ़क़त 14 सालन जी उमर में खेस दुनियावी सुख ऐं बियूं गालिहियूं बेमतलब लगण लगा। पहिंजो पाण खे सुञाणिण समझण जी चाह बालक रामचंद खे मशहूर संत बाबा हरिराम साहिब वटि वठी आयी। चवन पिया त उन खां अगु बालक रामचंद संत कृपाराम ऐं भगत वाधुमल जी संगत में बि वकतु गुजारे चुको हो। संत हरिराम जो शिष्य बणिजी हु गुरु सेवा करण में ऐं आध्यात्म खे समझण में लगी वयो।

बालक रामचंद जी सेवा भगिती ऐं दुखायल मानवता लाय कुछ करण जी इच्छा डिसी संत हरिराम साहिबन बालक खे फक्त 18 सालन जी उमर में ई सनियासु दीक्षा डिनी। संतन संदस नालो बदिलाये संत हिरदाराम – मतलब जहिंजे ह्रदय में राम जो निवास हुजे – रखियो। इन वक़त दौरान गुरु सां गडु हुन खे केतिरा ई भेरा हरिद्वार अचण जो वझु मिलियो ऐं संदस दीन दुखियिन जी सेवा करण जो इरादो – भारतीय सभ्यता ऐं संस्कृति खे महफूज़ रखण जी चाह वधीक ऐं वधीक ताकतवर थींदी रही।

मुल्क जे विरहांङें खां पोय संत पहिरियूं जोधपुर अची रहिया पर जलदु ई पहिंजो निवास पुष्कर अजमेर खे बणाये मानवता जी सेवा जा कम करण लगा। 1950 में पुष्कर में संतन जी झोपडी हिक सेवा केंद्र बणिजी पयी। 1962 में संत हिरदाराम भोपाल – मध्यप्रदेश जी राजधानी – जे वेझो वसियिल सिंधी कैंप बैरागढ़ जे दोरे ते आया। मकानी सिंधियन सिक विशवास ऐं प्यार सां संत जो न सिर्फ स्वागत कियो पर हमेशा हमेशा वास्ते बैरागढ़ में रहण जी वेनंती बि कयी। संत हिरदाराम साहिब उन वक़त त को जवाब कोन डिनो पर 1965 में बैरागढ़ भोपाल में रहण जो फेसिलो कयो। इहा संतन जी मानवता जी सेवा हुयी जहिं सबब अख्तियारीअ वारन मज़बूर थी सिंधियन जी घुर मंज़ूर कन्दे बैरागढ़ जो नालो बदिलाये [तारीख जी पक न आहे पर घणो करे 5 जून 1995 ] संत हिरदाराम नगर कियो।

बैरागढ़ भोपाल में संत हिरदाराम साहिबन जी प्रेरणा ऐं रहबरी हेठि “संत हिरदाराम शिक्षा एवं सामाजिक विकास समिति ” जे नाले सां हिक संस्था [NGO] बरपा करे तैलिमी खेतर सां गडोगडु सामाजिक ऐं सांस्कृतिक कमन जी शुरुआत कयी वयी। हिन संस्था जो नज़िरयो आहे त मकानी माणुहू मरद तोड़े मायूं न सिर्फ रिथायिते नमूने समाज सेवा में बहरो वठन पर उन्हन खे पहिंजन वसीलन [resources] ऐं उन्हन जे कारायिते उपयोग जी बि जाण हुजे।

संत हिरदाराम साहिबन जी सिखिया ऐं ज्ञान खे जे हिक जुमले में बियानु करणो हुजे त “बलिदान सनातन आहे बिये पासे जिसमानी सुखन सहूलियतुन जी चाह ई सभनी दुखन जो मूल आहे।” खां सुठो जुमलो मिलण डुखियो आहे। संत हिरदाराम जन जी सभनी सिखियाउन जो मरक़ज़ आहे प्रभु राम जी सची सेवा आहे दीन दुखी दुरिबलन ऐं घुरिजाऊ इंसानन जी मदद करण। संत सजी हयाती तंदरुस्ती, पढ़ायी, राष्ट्र भक्ति, भारतीय सभ्यता ऐं संस्कृति जे महफूज़ रखण ऐं वाधारे जी सिमत में कमु कन्दा रहिया।

21 दिसंबर 2006 ते पहिंजे बैरागढ़ आश्रम में 101 सालन जी उमर में संतन हिन फानी दुनिया में आखरीयन सुवास खंया।