संत बाबा जयरामदास

सिंधी संत – जग्यासी कुटुंब – अहमदाबाद
अहमदाबाद जे मशहूर सिंधी संत बाबा जयरामदास जी वाणी पीढ़ियिन जे कठे थियिल ज्ञान खे डेखारे थी। सभु खां वधीक मञता बारे हिन आध्यात्मिक गुरु जो जन्म 1912 में पीर गोठ सिंध में थियो हो। जग्यासी कुटुंब में भाई संत सिंह जे घर जन्म वठण सबब कुदरती रूप में बालक जो लाडो गुरबाणी ऐं गुरुनानक देव महाराज जी सिखियाउन डान्हुँ हो। नंढी उमर में ई बालक खे गुरबाणी समझण ऐं गुरु ग्रंथ साहिब जी सेवा करण जो ज्ञान माता अतुरबाई वटां मिलियो। जवान थींदे थींदे जयरामदास जे जीवन ते गुरुनानक देव जे जीवन ऐं सिखियाउन जो एतरो गहिरो असर थियो जो हू गुरु ग्रंथ साहिब जो पाठु वरी ऐं वरी करण लगो। नतीज़े तौर जयरामदास जग्यासी कुटुंब जी उन्हन चूंडियल शख़्सियतुन में शामिल थी वियो जिनखे समूरो गुरु ग्रंथ साहिब ज़ुबानी याद हो। अहमदाबाद जा माणुहू हिन गालिह ते अज़ब ज़ाहिर कन पिया पर दर हकीकत में इहो बाबा जन जो गुरु ग्रन्थ साहिब में विशवास ऐं संदन आत्मा जो परमात्मा सां लागापो डेखारे थो।

उमिर वधण सां जयरामदास साहिब पाण में हिकु बदिलाव महसूस कियो सिज जी रोशनी संदस अंदर में हिकु करिश्मायी असर पैदा करण लगी। संत सिज जी पूजा करण शुरू कयी। बाबा जयरामदास जी हयाती जो मूल मंत्र हो “सूर्या शरणम।” विशवासु करण डुखियो आहे पर बाबा जयरामदास जी रोज़ानो ज़िंदगीअ जो अटूट हिसो हो सुबूह शाम पहिंजे आराधिय देव सूर्य जी किलाकन जा किलाक जी पूजा कन्दा हुआ। इन दौरान हू उघाड़ी अखियुन सां सिज डान्हुँ डिसन्दा रहन्दा हुआ। विज्ञान मूजिब सिजु धरती ते शक्ती [ऊर्जा ] जो वसीलो आहे पर हिक आम इन्सान लाय सिज खे हिकु मिनट डिसण बि सवलो कोन आहे। हिते त बाबा जयरामदास जन किलाकन जा किलाक सिज डान्हुँ डिसन्दा हुआ। इहो मुमकिन हो छो जो हू किन चूंडियल सभागी आत्माउन मां हिक हुआ। बाबा जयरामदास एतरो सादो जीवन गुजारीन्दा हुआ जो विरहांङें वक़त उन्हन खे अहमदाबाद जे रिफ्युज़ी कैंप में रहण में बि का तकलीफ कोन थी। संतन जो गुरुनानक देव जन जे भाईचारे जे सिद्धांत ते अटूट विशवास हो, उन्हन जे मूजिब सभु धार्मिक पंथ अलग अलग रसिता आहिन जेके हिक ऐं फ़क़त हिक परमात्मा सां मिलायिन था। संतन जो चवण हो

“एक जोति सर्व व्यापक। “

संत बाबा जयरामदास साहिब संस्कृत, फ़ारसी, हिंदी, गुजराती ऐं सिंधी भाषा जा जाणू त हुआ ई गडोगडु वेद उपनिषद ऐं पुराणन समेत लगभग सभनी धर्म ग्रन्थ जो गहिरो अभ्यास बि संतन कियो हो। सन्तन जो चवण हो त हर आत्मा ईश्वर आहे। असां खे पसुन पखियिन वास्ते दया हुअण घुरिजे छो जो इहे बेजुबान पहिंजा दुख रंजिशियूं ज़ाहिर कोन करे सघन था।

बाबा जयरामदास जन जी ज़िन्दगी कमल वांगुर हुयी जीयं कमल जल में रही बि जल खां निर्लेप रहे थो तीयं संत बी दुनिया में रहन्दे बि दुनिया खां निर्लेप हुआ। बाबा जयरामदास जी शादी देवीबाई सां थी हुयी। चालीहन सालन जी उमिर तायीं उन्हन गिरहसथ आश्रम जा फ़र्ज़ बि पूरा किया हुआ। संत एितरो निवडत वारा हुआ जो झुकन्दड श्रद्धालु संतन जा चरण स्पर्श करे उन खां अगु ई संत झुकी श्रद्धालु खे रोके छड़ीन्दा हुआ।

संतन पहिंजे स्वर्गवास वास्ते 27 अप्रैल 1996 जो डींहुं चूंडियो ऐं सिजु उभिरन्दे ई हू हिन फानी दुनिया खे छड़े विया। श्रद्धालु मिली हर साल 27 अप्रैल ते अहमदाबाद में संतन जो वरसी उत्सव धाम धूम सां मालिहायिन था। वरसी उत्सव जे दोरान इहो महसूस थींदो आहे त अहमदाबाद शहर वडो वापारी मरक़जु न पर को तीरथु इसथानु आहे। अहमदाबाद शहर जी व्वयस्था सम्भालीन्दड खाते जहिं रोड ते सूर्या मंदिर आहे तहिं जो नालो बदिलाये संत बाबा जयरामदास रोड रखियो आहे। हिन वक़त सूर्या मंदिर जी सम्भाल जी जवाबदारी संतन जे सुपुत्र संत स्वामी प्रकाश ते आहे।