पदम भूषण एन आर मलकानी

महात्मा गांधी जे काफी करीबी साथी, सिंध जे फेमस सिंधी फ्रीडम फाइटर ऐं नामवर समाज सेवी एन आर [नारायणदास] मलकानी जो जन्म हैदराबाद सिंध में 14 अगस्त 1890 में थियो हो। पिता रतनमल हैदराबाद ब्रह्म समाज ऐं सिंध जो हिकु नामवर शख्स हो। उन समे में इहा आम रिवायत हुयी तहिं करे नारायणदास खे हर आरतवार ते पीउ जी आंगुर पकड़े ब्रह्म समाज मंदिर या ब्रह्म समाज जे बियन सामाजिक गडिजाणिन में अीन्दो डिसी कहिं खे बि अज़ब न थींदो हो।

1905 में मैट्रिक [हाणे S.S.C.] पास करे नारायणदास वधीक पढ़ायी वास्ते पहिरियूं वड़ोदरा [ उन वक़त बड़ोदा] ऐं पोय पुणे [फर्गुसन कॉलेज] आयो। आखिर में हुन कराची जे डी जे सिंध कॉलेज में B.A. जी पढ़ायी पूरी कयी। 1912 में नारायणदास वकालत [L.LB] जो इम्तिहान पास कियो। पिता जी नारायणदास खे वकील बणायिण जी इछा जे बरख़िलाफ़ हिन कराची जे एन जे हाय स्कूल में पढ़ाहिण जे कम खे पसंद कियो।

1913 में नारायणदास मलकानी खे मुज़फरनगर बिहार जे सी बी बी कॉलेज में इकनॉमिक्स जे प्रोफेसर जी नौकरी मिली। इहो उहो कॉलेज हो जिते फेमस गाँधीवादी सिंधी समाज सेवी श्री भगवानदास जीवतराम कृपलानी बि नौकरी ते हो। इन वाक़िये नारायणदास जी ज़िन्दगी में वडो फेरो आन्दो। आचार्य कृपलानी महात्मा गांधी जे नॉन को ऑपरेशन मूवमेंट शुरू करण खां अगु मलकानी खे गांधी जी सां मिलायो। नतीज़े तौर जडहिं गांधी जी चम्पारण मूवमेंट जी शुरुआत करण बिहार आया त नारायणदास मलकानी जे घर रहिया हुआ।

महात्मा गांधी जी सलाह ते नारायणदास मलकानी गुजरात विद्यापीठ में प्रिंसीपल आसुदोमल गिडवानी सां गडु कमु करण वास्ते 1920 में अहमदाबाद वयो। इन दोर में ई हैदराबाद जे सिंधी नेशनल कॉलेज हिन खे इकनॉमिक्स जे प्रोफेसर जे ओहदे ते मुकरर कियो। लगभग 14 सालन खां पोय 1927 में नारायणदास मलकानी सिंध वापस मोटी आयो। 1928 में जडिहिं गांधी जी सिंध दोरे ते आयो त समूरे दोरे त नारायणदास गांधी जी सां गडु हो।

1930 जे नमक सत्याग्रह वक़त नारायणदास मलकानी खे गिरफतार करे पुणे जे यरवदा जेल में रखियो वियो हो जितां 1931 जे गांधी इरविन समझौते खां पोय आज़ाद कयो वयो। अक्टूबर 1931 में नारायणदास मलकानी वरी गिरफतार थियो ऐं अप्रैल 1932 तायीं जेल में बंद रहियो। किविट इंडिया मूवमेंट वक़त त 1942 में गिरफतार थिएल मलकानी खे 1945 में आज़ादी मिली। इन्हन ट्रिन सालन जी जेल खे सकारतो कन्दे हिन गांधी ऐं नेहरु जी आत्मकथा जो सिंधी में तरजुमो करण खां सिवाय बिया कुछ किताब बि लिखिया। पंहिजी आत्मकथा “निराली ज़िन्दगी ” खे मिलाये नारायणदास मलकानी कुल 20 किताब लिखिया आहिन।

विरहांङें खां पोय नारायणदास मलकानी कराची में डेप्युटी हाय कमिशनर ऑफ़ इंडिया जे ओहदे ते कमु कन्दे सिंध जे हिन्दु सिंधियिन खे सलामतीअ सां भारत मोकिलिण वास्ते तमाम मुनासिब ख़बरदारियूं वरतियूं। इन कम जे कामियाबी सां पूरे थियण खां पोय मलकानी साहिब राजस्थान में सिंधियिन खे वसायिण जे कम ते धिआनु डियण जी शुरुआत कयी। इन दोर में संदस कुटुंब पिणु लड़े भारत अची दिल्ली में रहण लगो हो।

1952 खां 1962 तायीं लागीतो डह साल [ब टर्म्स] नारायणदास मलकानी राज्य सभा जे नॉमिनेट मेंबर तौर कमु करण खां पोय १९६६ में कच्छ में खास सिंधियिन वास्ते वसियिल आदिपुर गांधीधाम में रहण जो फेसिलो करे दिल्ली खे अलविदा चयी। हिन फेमस सिंधी फ्रीडम फाइटर ऐं तैलीमदान जो सत्कार करण वास्ते भारत सरकार 1973 में नारायणदास मलकानी खे पदम भूषण अवार्ड सां नवाज़ियो। 01 जनवरी 1974 ते नारायणदास मलकानी जो सुरगवासु थियो।