पदम भूषण पंकज आडवाणी
TSW Citation
शायद त इहो भारत जे सिंधी युथ जे नुमाइन्दे पंकज आडवाणी वासिते चयो वयो आहे – शाल अहिड़ा लाल जमन – छो जो पंकज आडवाणी उहो सिंधी नवजवान आहे जेको सिंधी युथ जो आइकॉन त आहे ई पर हुन रान्दिन में देश जो वड़े में वडो अवार्ड राजीव गांधी खेल रतन अवार्ड हासिल कन्दे, सिंधियत जो परचम फहिरायीन्दे, सालन खां चयी वेन्दड इन चवणी खे हक़ीक़त जो जामो पहिरायो आहे। चवन्दा आहिन इंसान जी बुधी , सलाहियत , क़ाबिलियत ऐं सियाणप जी परीक्षा तडहिं थींदी आहे जडहिं हू पहिंजे रिवायती खेतर खे छडे कहिं बिये ग़ैर रिवायती खेतर में दाखिल थींदो आहे। शायद सिंधी कौम अकेली अहिड़ी कौम आहे जहिं वक़त ब वक़त इहो साबित कियो आहे त सिंधियन खे फ़क़त धंधे में महारत हासिल न आहे पर हू जहिं बि खेतर में कमु कन था कामियाबीअ जी चोटीअ ते पहुचन था। चाहे उहो प्रेम रामचंदानी [सेना ] या राज कुमार हीरानी [फिल्म ] या वरी एल के आडवाणी या राम जेठमलानी [सियासत ] हुजन, सिंधी सपूतन सदायीं साबित कियो आहे त उन्हन में हर खेतर में कामियाबी हासिल करण जी सलाहियत आहे। हालांकि सचु इहो आहे त के विरला सिंधी ई पहिंजे रिवायती वापार करण जे खेतर खे छडे बिये खेतर में दाखिल थियन था।
.
पंकज आडवाणी - बिलियर्ड ऐं सिनूकर- टीन ऐज सिंधी वर्ल्ड चैम्पियन
24 जुलाई 1985 ते पुणे महाराष्ट्र में जन्म वरतल पंकज आडवाणी अहिड़ो सिंधी आहे जहिं [ जी एस रामचंद – क्रिकेटर – खां पोय] स्पोर्ट्स में सिंधी कौम जो झंडो बुलंद कियो आहे। मराठी में चवणी आहे “मूर्ती लहान पण कीर्ती महान ” मतलब शख्सियत नंढी पर जसु वड़ो। पंकज हिन चवणी जो बेहतरीन मिसालु आहे। टीन ऐज [उम्र जो 13 खां 19 सालन वारो अरसो] पूरी करण खां अगु ई पंकज ट्रे भेरा वर्ल्ड चैम्पियन बणिजी चुको हो ऐं खास गालिह इहा त इन दौरान हू बिलियर्ड जे सत भेरा वर्ल्ड चैम्पियन गीत सेठीअ खे बि हाराये चुको हो।
पंकज जे जन्म वठण जे थोरे ई अरसे में पिता जी नौकरी सबब कुटुंब खे कुवैत शिफ्ट थियणो पियो पर पिता जी अकाल मौत सबब कुटुंब 1990 में भारत मोटी अची बेंगलोर में रहियो। जिते पढ़ायी जो दौर शुरू हूंदे पंकज वर्ल्ड चैम्पियन बणियो। कर्नाटक स्टेट बिलियर्ड हॉल बेंगलोर में माज़ी नेशनल चैम्पियन अरविन्द सरूर पहिरियों भेरो पंकज खे डिठो। पंकज ऐतिरो नंढो हो जो मुशकिल सां टेबिल जी ऊंचाई तायीं पहुचे पयो। अरविन्द ते पंकज जी प्रतिभा जो ऐतिरो असर थियो जो हू पंकज खे सेखारिण लगो नतीज़े तौर उमिर जा 14 साल पूरा करण खां अगु ई पंकज सउ सउ जा ब्रेक पूरा करण लगो।
2003 में 18 सालन जी उमिर में पंकज वर्ल्ड चैंपियन बणियो ऐं 2005 में जडहिं हुन वर्ल्ड चैम्पियन गीत सेठीअ खे हारायो त गीत सेठीअ चयो ” आडवाणी बिलियर्ड जी दुनिया जो राज कुमार बणिजी वयो आहे। ” 20 सालन जी उमिर जो थींदे थींदे पंकज वर्ल्ड चैम्पियनशिप ट्रे भेरा खटी चुको हो। स्पोर्ट्स माहिर अज़ब में आहिन त पंकज पहिंजे कॅरियर में घणा वर्ल्ड खटन्दो छो जो बिलियर्ड ऐं सिनूकर अहिड़ी रान्दि आहे जहिं में को बि पहिंजे कॅरियर जा 20 साल त आराम सां पूरा करे सघे थो। पंकज दुनिया में अकेलो रान्दिगर आहे जेको IBSF जी वर्ल्ड बिलियर्ड चैंपियनशिप जा बयी टाइटल्स [पॉइंट ऐं टाइम फॉर्मेट ] न रुगो हिक भेरो पर ब दफा खटी चुको आहे। सिंधी कौम जी खूबी आहे त न त असां डुखियन हालतुन में धीरज छडीन्दा आहियूं ऐं न वरी पहिंजो दिमागी मीजान जाबिते बाहिर वञणु डीन्दा आहियु। पंकज खे इहा खूबी घणो कम आयी आहे खास करे उन वक़त जडहिं हुन शुरुआत में हारायीन्दे रान्दि खटी आहे।
पंकज अडवाणी - खटियल टाइटल्स
पंकज अडवाणी जे साल दर साल खटियल टाइटल्स जी तफ़सील हेठि डिनिल आहे। 2019 तायीं पंकज जुमले 66 टाइटल्स खटी चुको आहे।
1997: संपत मेमोरियल सिनूकर चैंपियनशिप – टी ऐ सेलवराजा मेमोरियल बिलियर्ड चैम्पियनशिप – कर्नाटक राज्य जूनियर सिनूकर चैम्पियनशिप
1998: कर्नाटक राज्य जूनियर सिनूकर चैम्पियनशिप
1999 : Pot Shot आल इंडिया ट्रायएंगुलर चैम्पियनशिप – Pot Shot नॉन मेडलिस्ट चैम्पियनशिप
2000 : इंडियन जूनियर बिलियर्ड्स चैम्पियनशिप
2003 : IBSF वर्ल्ड सिनूकर चैम्पियनशिप – इंडियन जूनियर बिलियर्ड्स चैम्पियनशिप – इंडियन जूनियर सिनूकर चैम्पियनशिप
2005 : वर्ल्ड बिलियर्ड्स चैम्पियनशिप
2006 : दोहा में एशियाड गोल्ड मेडल
2008 : IBSF वर्ल्ड बिलियर्ड्स चैम्पियनशिप [Point Format]
2009 : प्रोफेशनल वर्ल्ड बिलियर्ड्स चैम्पियनशिप
2010 : एशियन गेम्स गोल्ड मेडल
2011 : वर्ल्ड बिलियर्ड्स चैम्पियनशिप [सेमी फाइनल ]
2012 : वर्ल्ड बिलियर्ड्स चैम्पियनशिप [Timed ]
2014 : वर्ल्ड बिलियर्ड्स चैम्पियनशिप [Points ]
2015 : वर्ल्ड बिलियर्ड्स चैम्पियनशिप एडिलेड में
2016 :: वर्ल्ड बिलियर्ड्स चैम्पियनशिप [Points ] – एशियन ऐं नेशनल सिनूकर -6 -रेड
2017 :: वर्ल्ड बिलियर्ड्स चैम्पियनशिप [Points ] – IBSF वर्ल्ड सिनूकर चैम्पियनशिप – एशियन बिलियर्ड्स चैम्पियनशिप – नेशनल सीनियर सिनूकर ऐं सीनियर बिलियर्ड्स – नेशनल सिनूकर -6 -रेड
2018 :: वर्ल्ड बिलियर्ड्स चैम्पियनशिप [Time & Points both Format] -IBSF वर्ल्ड सिनूकर टीम चैम्पियनशिप – एशियन बिलियर्ड्स चैम्पियनशिप – नेशनल सीनियर बिलियर्ड्स
2019 :: एशियन बिलियर्ड्स चैम्पियनशिप – नेशनल सीनियर सिनूकर
राजीव गांधी खेल रतन अवार्ड
देश जो वड़े में वडो स्पोर्ट्स अवार्ड “राजीव गांधी खेल रतन अवार्ड ” 2005 में पंकज आडवाणी खे मिली चुको आहे। अभिनव बिंद्रा [20 साल] खां पोय पंकज [21साल] अहिड़ो बियो प्लेयर आहे जहिं खे ऐतिरी घटि उमिर में इहो अवार्ड मिलियो आहे।
2005 में इन अवार्ड लाय जिन बियन बिन नालन जी सिफारिश कई वयी हुई से आहिन क्रिकेटर राहुल द्रविड़ ऐं टेनिस प्लेयर महेश भूपति। 29 -08 -2006 ते राष्ट्रपती श्री ऐ पी जे अब्दुल कलाम जे हसिते दिल्लीअ में पंकज खे हिन अवार्ड सां नवाज़ियो वियो।
2018 में पंकज अडवाणी खे पदम भूषण अवार्ड सां नवाज़ियो वियो आहे। 02 अप्रैल 2018 ते राष्ट्रपती भवन जे दरबार हाल में थियिल खास प्रोग्राम में राष्ट्रपती श्री राम नाथ कोविद जन इहो अवार्ड पंकज खे डिनो। उप राष्ट्रपती श्री वेंकैया नायडु बि, प्रधानमंत्री श्री नरेंद्र मोदी, गृह मंत्री राजनाथ सिंह, लोकसभा स्पीकर सुमित्रा महाजन ऐं बियन केतिरिन शख्सियतुन सां गडु हिन मोके ते मौजूद हुआ।
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.