स्वामी राज प्रकाश

राज कुमार जा माता पिता माया देवी ऐं मुरलीधर बयी प्रेम प्रकाश पंथ जा पका श्रद्धालु हुआ। बयी नियम सां प्रेम प्रकाश आश्रम में रोज़ वेंदा हुआ। हिते बालक राज कुमार स्वामी जय प्रकाश सां मिलियो ऐं जल्दु ही स्वामी जन जी कृपा जो पात्र बणिजी पियो। स्वामी जन जे सात्विक जीवन जो बार जे मन ते ऐतिरो असर थियो जो हू स्वामी जन वांगुर संत थियण जा सपना डिसण लगो।

1982 में सिर्फ सालन जी उमर में प्रेम प्रकाश मंडल जे सभ खां पवित्र स्थान अमरापुर आसथान जयपुर में राज कुमार हिक संत जे रूप में प्रेम प्रकाश मंडल में शामिल थियो। हिन संदस ज़िन्दगी बदिले छड़ी । कुछ ई सालन में हुन न फ़क़त बियन आश्रमन जहिड़ो कि हरिद्वार वगैरह में सेवा कयी पर सागिये वक़त स्वामी शान्ती प्रकाश महाराजन खां संस्कृत ऐं वेदान्त जो ज्ञान बि हासिल कियो।

राज कुमार जेको हाणे संत राजूराम जे नाले सां मशहूर थी वयो हो तहिं संस्कृत आचार्य जी पदवी पिणु हासिल कयी। 2001 संत राजूराम जी ज़िन्दगीअ जो अहमियत वारो साल आहे छो जो इन साल में खेस वड़ोदरा जे प्रेम प्रकाश आश्रम में सेवा जो कम मिलियो। बड़ोदा आश्रम में रहन्दे संत राजूराम स्वामी अशोक प्रकाश जन जे गहरे लागापे में आयो। 2005 में स्वामी अशोक प्रकाश खेस सनियासु दीक्षा डयी संदस नालो बदिलाये स्वामी राज प्रकाश रखियो।

2001 खां 2009 तायीं जेके नवं साल स्वामी राज प्रकाश वड़ोदरा आश्रम में गुजारिया से संदस शख्सियत जे वाधारे ऐं मोक्ष पद जी राह ते तरकीअ जे लिहाज खां तमाम मुफ़ीद साबित थिया। स्वामी अशोक प्रकाश जी संगत में रही हिन सादी ज़िन्दगीअ जी अहमियत समझण सां गडोगडु आमु माणुहुन सां आसरायिते नमूने गुफ़्तगू करण जो गुण त सिखियो ई पर आमु माणुहुन खे सवली ऐं समझण जोग भाषा में आध्यात्मिक राह ते हलण जी प्रेरणा डियण में भी महारत हासिल कयी। वड़ोदरा आश्रम में थींदड हफतेवार सत्संग ऐं हर महीने जन्म चोथि मलिहायिण जहिड़न गालिहिन स्वामी राज प्रकाश खे सतगुरु स्वामी टेऊँराम जे जीवन खे समझण में भरपूर मदद कयी। स्वामी अशोक प्रकाश न सिर्फ खेस बियन शहरन ऐं आश्रमन में गडु वठी वेंदा हुआ पर श्रद्धालुन खे उपदेश डियण जो, सत्संग करण जो हर मुमकिन मोको बि डीन्दा हुआ नतीज़े तौर स्वामी राज प्रकाश आमु माणुहुन खे रुहानी राह ते हलण जी प्रेरणा डियण वास्ते पहिंजो खास तरीको गोलिहिण में कामियाब थिया।

वड़ोदरा जे वेझो सूरत शहर जे प्रेम प्रकाश आश्रम जी संभाल हिकु ट्रस्ट कन्दो हुओ। उते नियम सां सत्संग कारण वास्ते को संत बि न रहंदो हो। रामनगर सूरत जा श्रद्धालु स्वामी अशोक प्रकाश खे केतिरा ई भेरा आश्रम जी जवाबदारी खणण बाबत वेनंती करे चुका हुआ। 2004 में आयल बोडि वक़त ऐं उन खां पोय स्वामी राज प्रकाश सूरत अची मदद जो कमु संभाले चुका हुआ। सूरतवासी बि स्वामी जन खे पियारु करण लगा हुआ इहो डिसी 2009 में स्वामी अशोक प्रकाश जन स्वामी राज प्रकाश खे सूरत में रही आश्रम सम्भालिण जी जवाबदारी डिनी।

28 जून 2012 जो डींहुं प्रेम प्रकाश मंडल लाय वडो दुखदायी साबित थियो छो जो अजमेर जे वेझो कार एक्सीडेंट में स्वामी अशोक प्रकाश, स्वामी राज प्रकाश ऐं स्वामी किशोर प्रकाश [फरीदाबाद आश्रम] हिन फानी दुनिया खां पासो करे अमरापुर वासी थिया।