पदम श्री रमेश सिप्पी

बॉलीवुड सिंधी – फिल्म शोले – मशहूर डायरेक्टर
रमेश सिप्पी जो जन्म 23 जनवरी 1947 ते कराची में, बॉलीवुड या हिन्दी फ़िल्मुन जी दुनिया में सभ खां वधीक कामियाब प्रोडयूसर डायरेक्टर्स में शुमार थींदड गोपालदास सिप्पी [जी पी सिप्पी ] जे पुट्र जे रूप में थियो आहे। रमेश सिर्फ छहन सालन जो हो जो हिन खे फिल्म जे सेट ते वञण जो वझु मिलियो। उहो मोको हो संदस पिता जी फिल्म “सज़ा” जी शूटिंग जो। जल्दु ई रमेश जो फ़िल्मी सफर बि शुरू थियो छो जो इन फिल्म सेट ते अचण जे वाक़िये जे ट्रिन सालन खां पोय फिल्म “शहंशाह” में रमेश, उन समे जी मशहूर एक्ट्रेस अचला सचदेव जे पुट्र जो रोल कियो।

सतन सालन तायीं पिता, नामवर प्रोडूसर डायरेक्टर जी पी सिप्पी जी सरपरस्तीअ में कमु करण खां पोय 1971 में जडिहिं रमेश सिप्पीअ, शम्मी कपूर, हेमा मालिनी ऐं राजेश खन्ना जहिडियिन मशहूर कलाकारन खे खणी फिल्म “अंदाज़” डायरेक्ट कयी त इहा फिल्म सुपर हिट साबित थी।

1975 में रिलीज़ थियिल “शोले ” न सिर्फ रमेश सिप्पी वास्ते कामियाबी जा दरवाजा खोले छड़िया पर बॉलीवुड या हिंदी फ़िल्मुन जी बॉक्स ऑफिस कामियाबी / कमायी जो हिक नवों इतिहास ठाहियो। अजु भले कहिं फिल्म जो कामियाब थियण मतलब कुछ सउ करोड़ रूपियन जी कमायी करण हुजे पर जडिहिं बि हिंदी फ़िल्मुन जी कामियाबी जी गालिह निकरे थी त उन सिलसिले में शोले जे नाले जो शुमार ज़रूर थिये थो।

शोले खां पोय 1980 में रमेश सिप्पीअ “शान” जो डायरेक्शन कियो। हिन फिल्म में बि अमिताभ बच्चन, शशी कपूर, सुनील दत्त, शत्रुघन सिन्हा, बिंदिया गोस्वामी ऐं परवीन बॉबी जहिडा नामवर कलाकार हुआ। शोले जे गब्बर वांगुर हिन फिल्म में पिणु विलेन “शाकाल” जो रोल निभायीन्दड कुलभूषण खरबंदा टाडियूं खटी वियो। न सिर्फ कुलभूषण खरबंदा पर शान में “अब्दुल” जो किरदार निभायीन्दड मज़हर खान जे फ़िल्मी कॅरियर वास्ते बि अहमियत वारी साबित थी। अंदाज़, शोले ऐं शान कामियाब फ़िल्मुन जे हिन सिलसिले रमेश सिप्पी खे नामवर अदाकारन जे डायरेक्टर तौर मशहूर करें छडियो।

1982 रमेश सिप्पी जी बेमिसाल कामियाबी जो साल हो जो हुन हिंदी फ़िल्मी दुनिया जे बिन मोतिबर एक्टर्स दिलीपकुमार ऐं अमिताभ बच्चन खे पहिंजी फिल्म “शक्ती ” में कमु करण वास्ते राज़ी कियो। दिलीपकुमार हरदिल अज़ीज़ कलाकार हो त इहो उहो दौर हो जो अमिताभ बच्चन जो मतलब हो हिट फिल्म। फ़िल्मी दर्शक बिन्ही जी अदाकारी जा दीवाना हुआ ऐं अजु बि आहिन। इहा फिल्म टेलीविजन ते हर हर सिर्फ इन करे डेखारी वेन्दी आहे जो माणुहू दिलीपकुमार ऐं बिग बी जी अदाकारी जो इहो बेमिसाल मुक़ाबिलो वरी वरी डिसण चाहिन था।

हिंदी फ़िल्मी दुनिया में कची उमर जे प्यार जी फिल्म वास्ते अजु बि ऋषि कपूर ऐं डिम्पल कपाड़िया जी पहिरियीं [Debut] फिल्म बॉबी खे याद कियो वेन्दो आहे। इन जोड़ी जी रुमानियत खे वरी फ़िल्मी परदे ते आणिण जो कमु बि रमेश सिप्पी कियो जो हुन इन्हन बिन्ही अदाकारन खे 1985 में रिलीज़ फिल्म “सागर” में पेश कियो।

फिल्म्स डायरेक्ट करण खां सिवाय 1987 में दूर दर्शन ते डेखारी वेन्दड मशहूर ऐं कामियाब सीरियल “बुनियाद” जेका मुल्क जे विरहांङें जे विषय ते हुयी तहिं जी डायरेक्शन पिण रमेश सिप्पी कयी हुयी। रमेश सिप्पी जे डायरेक्शन में तैयार थियिल भ्रष्ट्राचार, अकेला ऐं ज़माना दीवाना जी नाकामयाबी सबब हिन हिक किसम सां डायरेक्शन करण बंद करे छडियो।

2003 में रमेश सिप्पी वापस फ़िल्मुन जो रुख कियो पर हिन भेरे फिल्म “कुछ ना कहो ” जहिंजो डायरेक्टर संदस पुट्र रोहन सिप्पी हो जे प्रोडयूसर तौर। 2009 में रिलीज़ थियिल फिल्म “चांदनी चौक टू चाइना” जहिं में अक्षय कुमार ऐं दीपिका पादुकोण कमु कियो हो। जहिंजो डायरेक्टर निखिल आडवाणी हो सा रमेश सिप्पी जी प्रोडयूस कियिल आखिरी कामियाब फिल्म हुयी। हालांकि इन खां पोय बि रमेश सिप्पी “दम मारो दम” जहिडियिन किन फिल्म्स जो प्रोडयूसर रहियो आहे पर इन्हन मां का बि कामियाब कोन लेखी वेन्दी आहे।

2005 में रमेश सिप्पी खे हिंदी फ़िल्मी दुनिया में सभ खां वधीक अहमियत वारे “फिल्म फेयर अवार्ड” सां नवाजे हिन जो सत्कार कियो वियो। इहो अवार्ड हिन खे गुजिरियिल 50 सालन जी सभ खां वधीक कामियाब फिल्म शोले वासिते डिनो वियो। भारत सरकार बि रमेश सिप्पी खे “पदम श्री” अवार्ड सां नवाजे चुकी आहे।