साधु वासवानी

मशहूर सिंधी संत – सिंधी फिलॉसॉफर – तैलीमदान – आध्यात्मिक ज्ञान जो माहिर
साधु वासवानी [थांवरदास लीलाराम वासवानी] जो जन्म 25 नवम्बर 1879 ते हैदराबाद सिंधु में थियो आहे। हिन समे में साधु वासवानी जो जन्म डींहुं सजी दुनिया में “मीट लेस डीहं” जे रूप में मलिहायो पयो वंञे। संदस पिता श्री लीलाराम देवी माता जो पको श्रध्दालू हो त माता वर्णाबाई जो गुरबाणी में अटूट विशवास हो। माता साहिब रोज़ सुबूह जो सवेल उथी गुरबाणी जो पाठु कन्दी हुयी। घर जे हिन धार्मिक वातावरण जो साधु वासवानी जे बालपणे वारे मन ते गहिरो असर थियो।

साधु वासवानी हिकु होशियार बारु हुओ। स्कूल जे शुरुआती डीहंन खां ई होनहार विद्यार्थी लेखियो वेन्दो हो। मैट्रिक जे इम्तिहान में हू सजे सिंध सूबे में पहिरियों नंबर आयो हो। घर जे धार्मिक वातावरण जे असर हेठि विद्यार्थी जीवन में स्कूली किताबन सां गडु हिन्दु धर्म ग्रंथन भगवत गीता ऐं गुरबाणी जो काफी उनिहो अभियासु कयो। नतीज़े तोर हुन जे सुभावअ में प्रार्थना में विशवासु करण जो लाडो पैदा थियो। हू गडु पढ़हंदडन बियन विद्यार्थिन खे बि प्रार्थना करण ऐं विशवास रखण वास्ते हिमथायिण लगो।

M.A. पास करण खां पोय साधु वासवानी खे कलकता जे मेट्रोपोलिटिन कॉलेज में प्रोफेसर जे रूप में कमु करण जो वझु मिलियो पर जल्दु ई हू पाकिस्तान जे हिक वड़े शहर लाहौर जे मशहूर दयाल सिंह कॉलेज में प्रिंसीपल जे पद ते कमु करण लगा। तैलिमी खेतर में कमु कंदे साधु वासवानी जो घणो धिआनु विद्यार्थिन जे चरित्र निर्माण ते हूंदो हो छो जो हुनन जो रायो हो

“चरित्र निर्माण ई राष्ट्र निर्माण आहे।”

30 सालन जी नंढी उमर में बर्लिन जी “वर्ल्ड कांग्रेस ऑफ़ रिलिजन ” में बहरो वठण साधु वासवानी जी सिआणप ऐं संदस भारत जे धार्मिक ग्रंथन जे गहरे अभियास जो सबूत आहे। हिन बर्लिन दोरे ते न फ़क़त हर को साधु वासवानी जे ज्ञान ऐं अभ्यास जो मुरीद थी पियो पर साधु वासवानी खे पहिंजे मिशन वास्ते कुछ साथी बि मिलिया।

साधु वासवानी जी आध्यात्मिक यात्रा में संदस 40 सालन जी उमर में माता जो सुरगवासु हिक क्रांतिकारी थियणी [घटना] साबित थियो। उन्हन डींहन में साधु वासवानी किताब ऐं लेख लिखण में मशगूल हो। संदस लेखणी ऐतिरी असिरायिती हुयी जो महात्मा गांधी जी अख़बार “यंग इंडिया ” जे पहिरियें पेज ते साधु वासवानी जो लेख छपजियो हो। साधु वासवानी जो अटूट विशवास हो त राष्ट्र निर्माण में युवा शक्ती जो बहरो निहायत ज़रूरी आहे तहिंकरे हुन “शक्ती आश्रम ” बरपा कियो। शक्ति जो हुन लाय मतलब हो आध्यात्मिक शक्ती जो वाधारो ऐं सही उपयोग।

साधु वासवानी जी समाज खे डिनिल नायाब सूखड़ी आहे 1933 में तैलिमी खेतर में शुरू कियिल “मीरा मूवमेंट ” ऐं 1962 में पुणे में बरपा कियिल सेंट मीरा कॉलेज फॉर गर्ल्स। साधु वासवानी जी समूरी हयाती खे संदस हिक विचार
” शक्तिवान थियो – पुरुषवान थियो। पहिंजी शक्तिअ जो उपयोग गरीबन ऐं दुखायलन जी सेवा में कयो”
जे चौगिरद फिरन्दड मुसाफिरी बि चयी सघिजे थो। साधु वासवानी जी आध्यात्मिक यात्रा ते मशहूर संत मीराबाई जो वडो असर नज़र अचे थो छो जो कविता जे रूप में ज़ाहिर कियल संदस हर विचार, जेको हाणे “नूरी ग्रंथ” में शामिल आहे, भगवान श्रीकृष्ण खे अर्पण कयल आहे।

साधु वासवानी बालपणे में हिकु भेरो कासाई जे दुकान ते वियो हो। उते मास वास्ते मारियो वेन्दड जानवरन जूं कीकूं बुधी न सिर्फ पाण मांसाहार छड़े वेठो पर सजी उमर बियन खे बि मांसाहार छड़िण वास्ते हिमथाईन्दो रहियो। नतीज़े तौर अजु सजी दुनिया में संदस जन्म डींहुं मीट लेस डे तोर मलिहायो वेंदो आहे। हर साल हज़ारे माणुहू मांसाहार छड़िण जो प्रण कनि था।

भारत सरकार हिन सिंधी कौम में जावल महान तैलीमदान, आध्यात्मिक माहिर ऐं फिलॉसॉफर जी इज़त अफ़ज़ाई वास्ते 25 नवंबर 1969 ते संदस फोटो वारी पोस्टल टिकट ज़ारी कयी। जेतोणिक साधु वासवानी 16 जनवरी 1966 ते हीअ फानी दुनिया छड़े विया आहिन पर संदस कम हर दिल अज़ीज़ दादा जशन वासवानी जी रहबरी में साधु वासवानी मिशन जे रूप में शुरू आहिन।