Script of Sindhi Language सिंधी भाषा जी लिपी

इहा ऐतिहासिक हकीकत आहे त वेदिक जुग में सिंधु नदी किनारे रहण वारन, पहिंजी अलग भाषा, जिंदगी जियण (Life Style) जो कुझु जुदा तरीको अयं शखसी अयं सामाजिक हलत जा अलग नियम हुजण वारन शखसन जे मेड खे सिंधी समाज जे रुप में सुंञाणप डिनी वयी।
इहो सिंधी समाज हुआ जहिं सिंधु नदीअ वसीले बियन देशन सां समुंडी वापार करे बेइंतिहा आरथिक तरकी हासिल कयी। शायद इहा बियन देशन जा वापार अयं वापारी कामियाबी जी जरुरत हुयी जहिं करे सिंधिन पहिंजी भाषा सां गडु बियूं भाषाउं बि सिखियूं।
पहिंजी खास जगिराफी बीहक सबब भारत ते काह करे अचण वारन गेर हिंदुन जे भारत जे हमले जो पहिरियों शिकार सिंध बणी। इहे हमलावर गेर हिंदू त हुआ ई पर इनहन जी भाषा बि जुदा हुयी।
कहिं बि भाषा जी इहा सिफत थींदी आहे त उहा पहिंजी पसगिरदायी जी बियन भाषाउन सां अखरन जी डे वठु कंदी आहे नतीजो इहो थींदो आहे जो भाषा जो अखर खजानो वधंदो रहंदो आहे अयं बियन भषाउन जा कुझु अखर उन भाषा में पहिंजे अखरन तोर शामिल थींदा रहंदा आहिन सागिये नमूने इहो बि मुमकिन आहे त वापर (उपयोग Use) जे आधार ते कहिं बी लिपी खे उन मकानी भाषा जी लिपी तोर कबूलियत हासिल करे वठे।
मुलक जे विरहाङे जे शुरुआति दोर जे पहिरियिन पंजन छहन डहाकन में सिंधी समाज जहिं लिपी जे निफाक खे मुहं डिनो उन जी बुनियाद इनहन गेर हिंदू हमलावरन, मुगलन अयं अंगिरजन जी हुकूमत जे दोरान पयी।
सिंधु नदी वसीले विदेशन में वापार करण जे अरसे में पंहिजे वापार जूं गालिहियूं गुझियूं रखण लाय सिंधी समाज हटवाणिकी लिपी जो उपयोग कियो जहिं करे किन जो रायो आहे त सिंधी भाषा जी असल लिपी हटवाणिकी आहे।
हेठि डिनल बिन जुमिलन ते धिआनु डियो
(अ) बाबो अजमेर वियो।
(आ) बाबो अजु मरी वियो।
हाणे जे इहे जमीला हटवाणिकी में लिखन त समझ में अचे थो त बिनही जे लिखण में सागिया हरफ़ साजिये सिलसिले में मतलब
ब ब अ ज म र व य
रुप में लिखणा पवंदा।
सिंधी भाषा जी खास खूबी आहे त उहा पहिंजे उचारन मूजिब लिखी वेंदी आहे अयं इहे बयी जुमिला अयं उनहन जे लिखण जो तरीको बुधाये थो त हटवाणिकी लिपी जो सिंधी भाषा जी असली लिपी हुजण नामुमकिन आहे। इहा लिपी सिंधिन सिरफ अयं सिरफ वापार लाय कमि आंदी हुयी।
सिंधी भाषा जी असली लिपी बाबत मोंझारो निफाक इन गालिह सबब बि वधी आहे त मोहन जोदडो जी लिपी अजु तायीं को बि भाषा विगियानी पढी समझी न सघियो आहे। बेहद वडे अरसे अठ डह सदियूं तायीं बियन जी हुकूमत हेठि रहण अयं इनहन हुकुमिरानन जे सिंधी समाज जे इतिहास नास करण सबब सिंधी समाज जे अदबी भाषायी वरसे बाबत के बि लिखित सबूत न था मिलन।
सिंध ते मुग़लन जी हुकूमत जे अरसे में सिंधी भाषा में न सिरफ बेशुमार फारसी, अरबी अयं उरदू अखर शामिल थिया पर सिंधी भाषा पंजाबी (गुरमुखी) सां गडु उरदू अयं अरबी लिपी में लिखण जी शुरुआति थी वयी।
समझण जी गालिह इहा आहे त भाषा जा बी हिसा बोली अयं लिपी थींदा आहे। बोली भाषा जा उचार आहिन त लिपी उहो तरीको आहे जहिं में उचार लिखिया वंञन था।