सोरठ राय डियाच
सिंध जो ट्रैजिक रोमांस – सोरठ राय डियाच
सिंधी साहित्य – शाह जूं सत सुहिणियूं – सिंधी लोक कहाणी – शाह जो रिसालो
सिंधी साहित्य जे अमोलक नज़राने शाह जो रिसालो में शामिल ऐं सिंध जे ट्रैजिक रोमांस जो हिसो लेखी वेन्दड सोरठ राय डियाच जी हीअ मशहूर सिंधी लोक कहाणी जडिहिं तव्हां पढ़ी पूरी कन्दा त ज़रूर मुहिंजी इन विचार सां यकराय थींदा त दर हकीकत में सोरठ राय डियाच जी कहाणी कहिं इशक जी दास्तां घटि ऐं संगीत जे पैदा कियिल मदहोश करण वारे असर हेठि पहिंजो सभु कुछ कुरबानि करण जे जज़बे ऐं पुराणे समे जे माणुहुन जी पहिंजे वचन ते कायम रहण जी दास्तां आहे। सोरठ राय डियाच कहाणी आ हिक औरत [सोरठ ] जे इशक में कुरबानि थियण जे जज़बे त बी औरत [बीजल जी जाल ] जे बेहद लालची सुभावअ जी। सोरठ बेहद खूब सूरत हुयी तहिं करे सोरठ खे शाह जी सतन सुहिणिन में शामिल करण त समझ में अचे थो पर हिन कहाणी खे सिंध जे ट्रैजिक रोमांस में शायद त सिर्फ कहाणी जे दर्दनाक आखिर सबब कियो वियो आहे। मां तव्हां खे इहो ज़रूर बुधायिण चाहीन्दुम त हीअ कहाणी मां पहिंजे बालपणे में पहिंजे पिता जे वातां बुधी हुयी जेका तव्हां वासिते लिखण जी कोशिश कयां थो।
सिंध जो ट्रैजिक रोमांस – सोरठ राय डियाच
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.
बीजल जो जनम
जूनागढ़ जे राजा राय डियाच जी भेण खे जे कायी चिंता को दर्द हो त उहो इहो त शादी जे केतिरन सालन खां पोय बि हुअ बेऔलाद हुयी। सागिये वकत हुअ भाउ राय डियाच खे बि बेहद चाहीन्दी हुयी सो पहिंजी उदासी लिकाये भाउ जे सामहूं सिर्फ इन सबब खुश नज़र जी कोशिश कन्दी हुयी त किथे उन खे उदास डिसी राय डियाच खे चिंता न थिये। हिक डीहं हिक सूफी संत अगकथी कयी त जल्दु ई हुन खे हिकु पुट्र जमन्दो इहो बुधी हुन जी ख़ुशी आसमान में न पयी समायिजे पर उन वकत ई संत बी अगकथी कयी त इहो छोकरो राय डियाच जी मौत जो सबब बणजन्दो बुधी हुन जी हालत उहा थी वयी जणु बरन्दड टांड़न ते थधे पाणीअ जा वसकारा थियन। हुन इहा गालिह सभनी वेन्दे पहिंजे मुड़स खां बि लिकाये रखी। बार जे जन्म वठन्दे ई उन खे हिक टोकरी में विझी नदी परवाहु करे छडियो छो जो हुन जो विचार हो त अीयें करण सां विधीअ जो विधान बदिलिजी वेन्दो ऐं संदस भाउ राय डियाच जी हयातीअ खे को खतरो न रहन्दो। बार वारी नदीअ में वहन्दड टोकरी बकिरार दमी ऐं संदस जाल खे मिली। उन्हन बार खे पालिण जो फेसिलो करे उन जो नालो बीजल मतलब बी औरत जो जावल रखियो।
सोरठ जो जनम
राय डियाच जे राज जे भरि वारे इलाके ते राजा भोग जी हुकूमत हुयी। राजा भोग खे छह धीउर हुयुं ऐं हिन भेरे बि जडिहिं राणीअ खे वरी धीउ जायी त दुखी ऐं निरास राणीअ पाण खे बदनसीब समझी इन न घुरिजन्दड छोकिरीअ खे टोकरी में रखी टोकरी नदी परवाहु कराये छड़ी। जेका रतनो नाले कुंभर खे मिली बेऔलाद रतने ऐं संदस घरवारीअ इन छोकिरीअ खे पहिंजी धीउ वांगुर पालिण जो फेसिलो करे उन खे सोरठ नालो डिनो।
नवजवान बीजल
वकत सार बीजल वडो थियो ऐं जानवरन खे चरायिण जंगल में वठी वञन लगो। हिक डीहुं जंगल में सुरग जो आनंद डियण वारे संगीत जा सुर बुधी अज़ब में पयल बीजल इन संगीत जे रचीन्दड जी गोलिहा में लगी वयो। आखिर हुन गोलिहे कढ़ियो त इहो संगीत वण ते लटकियल हिरण जे सुकुल आंड्रे जी खल मां उन वक़त पैदा थिये थो जहिं वक़त हवा लगे थी। बीजल इहा खल वण तां लाहे घर खणी आयो। इन खल मां हुन हिक नओं बांसुरीअ जहिडो साज ठाहियो फरक सिर्फ ऐतिरो हो जो संगीत पैदा करण वास्ते बीजल खे साज में लगियिल तार खे छुअणो पवन्दो हो। मुनासिब वक़त ते दमी ऐं संदस घरवारीअ बीजल जी शादी कराये पहिंजो माउ पीउ जो फरज़ु पूरो कियो।
सोरठ जी सूंह
सोरठ जे बालपणे जी हद ट्रपी जवान थियण खां अगु ई संदस बेमिसाल सूंह बाबत घर घर में गालिहियूं थियण लगियूं ऐं उन जी सूंह बाबत राजा अनीराय खे बि खबर पयी। राजा अनीराय सोरठ जी सूंह जी ऐड़ी साराह बुधी जो हुन बिना डिठे सोरठ जे पीउ खे सोरठ सां शादी करण जो पैगाम मोकिलियो। पहिंजी हैसियत जो विचार कन्दे रतनो ख़ुशी ख़ुशी इहा शादी करायिण वासिते तियार थी वयो। सोरठ जी शादी अनीराय सां करायिण वासिते हू मंञ खणी अनीराय जे शहर डांहु रवाना थियो।
सोरठ, अनीराय ऐं राय डियाच
सोरठ जी मंञ जडिहिं जूनागढ़ अची पहुती त राय डियाच खे सजी हकीकत जी खबर पयी। हुन सोरठ जे पीउ खे लाचार करे सोरठ सां शादी कयी। जडिहिं इहा गालिह अनीराय खे खबर पयी त हुन इन गालिह खे बेइजती समझी जूनागढ़ ते हमलो कयो पर पहिंजी बेइजती जो बदिलो कोन वठी सघियो। हमले जी नाकामियाबीअ सबब गुसे ऐं बेइजती जी बाहि में बरन्दे अनीराय ज़ाहिर कियो त जेको राय डियाच जो सिरु कटे आणे डीन्दो उन खे बेशकीमती हीरन जवाहरन ऐं माणिक मोतिन सां भरियल थालु बतोर इनाम डिनो वेन्दो। हर खासोआम खे इन बाबत जाण डियण वास्ते अनीराय ढिंढोरची खे घुराये, इनाम जे बेशकीमती हीरन जवाहरन ऐं माणिक मोतिन सां भरियल थालु खणन्दड सिपाहिन खे साणु वठी गोठ गोठ में वंञी ढिंढोरो डियण जो हुकुम डिनो।
बीजल जी जाल हिक तमाम वधीक लालची औरत हुयी पर खेस पहिंजे मुडुस जे संगीत जे जादू ते बि भरोसो हो सो जडहिं हिन ढिंढोरो बुधो त बीजल जे घर में न हूंदे बि मतलब बीजल खां बिना पुछे सिर्फ पहिंजी लालच जे वस थी थालु लहिराये पहिंजे घर रखियो। सिपाहिन खे चयायीं त संदस घोटु बीजल राय डियाच जी सिसी कटे आणे अनीराय खे डीन्दो। सिपाहिन खेस समझाईण जी कोशिश कयी त ना कामियाबी जो मतलब आहे सजे कुटुंब जी मौत पर हुन लालच जी अंधीअ कोन बुधी।
बीजल जो मोंझारो
घर मोटी अचण ते जाल जी करतूत ऐं राजा राय डियाच जी सिसी कटे आणिण जी गालिह बुधी बीजल जा होश ई जणु खता थी विया। केतिरी देर त सदमे जी हालत में शांत वेठो रहियो। बीजल खे जाण हुयी त राजा राय डियाच जहिंजो असली नालो खंघर हो सो सिर्फ पहिंजे दानी सुभावअ ऐं गरीब गुरबन जी मदद करण जी आदत सबब बतौर राय डियाच मशहूर आहे। राय डियाच पहिंजे राज में रहन्दड हर खास आम खे पहिंजो बारु समझी उन्हन जी संभाल कन्दो हो। हू बहादुर ऐं पहिंजे कौल [डिनिल वचन] ते कायम रहण तोड़े संगीत जे जुनून वासिते बि मशहूर हो। बीजल मोंझारे में पयजी वियो हिक पासे हुयी संदस घरवारी जेका चाहे पयी बिये बीजल राय डियाच जी सिसी कटे खणी अचे त बिये पासे बीजल अहिड़े राजा राय डियाच जी मौत जो सबब न पियो बणिजण चाहे। बीजल जी इन कशमकश में डीहं पिया गुजिरन, लालची घरवारी त रोज़ पयी हिमथाईन्दी हुयी। आखिर कुटुंब जी मौत जे भव सबब बीजल तैयार थियो ऐं हुन जूनागढ़ जो सफर शुरू कियो।
राय डियाच जो पंहिंजो वायदो पूरो करणु
जूनागढ़ पहुची बीजल किले जे बाहिरां हिक वण हेठां वेही पंहिजो ठाहियल साजु वजायुण शुरू कियो। जीयं बीजल जी उम्मीद हुयी राय डियाच हुन खे महल अंदर घुरायो। बीजल राय डियाच जे सामहूं लागीतो छह रातूं महल में साजु वजाये गाईन्दो रहियो ऐं हर रात राय डियाच जे पहिरियूं खां वधीक आशियिल धन दौलत, माल असबाब खे वठण खां इंकार कन्दो रहियो। आखिर बीजल जे संगीत ते रीझजी राय डियाच हुन खे वचन डिनो त बीजल जी हिक इच्छा राय डियाच ज़रूर पूरी कन्दो मतलब बीजल जेको कुछ बि घुरन्दो सो राय डियाच खेस डीन्दो। बीजल राय डियाच जी सिसी जी घुर कयी। राय डियाच जे वजीरन ऐं राणी सोरठ बीजल खे तरह तरह जूं लालचूं डयी समझायिण जी हर मुमकिन कोशिश कयी पर बीजल बियो कुछ वठण लाय तियार कोन थियो। आखिर राय डियाच पहिंजो वचन पूरो करण वासिते पहिंजे हथन सां पहिंजो सिरु कटे धड़ खां धार कियो। राय डियाच जे हुकुम मूजिब वजीरन राय डियाच जो सिरु बीजल खे डिनो।
सोरठ राय डियाच: दर्दनाक अंत
राय डियाच जी सिसी खणी बीजल अनीराय राठौर जी दरबार में पहुतो। राय डियाच जो कटियिल सिरु डिसी खुश थियण बदिरां राय डियाच जहिड़े दानी ऐं बहादुर राजा जी हिन किसम जी मौत सबब अनीराय बि गुसे में अची वियो। अनीराय बीजल खे पहिंजो राजु छड़े वञण जो हुकुम डिनो। अफ़सोस ऐं पछतावे सां भरियल बीजल वापस जूनागढ़ पहुतो जिते सोरठ मुड़स जे धड़ सां चिता में वेही पहिंजी जान डियण वासिते तियार वेठी हुयी। बीजल राय डियाच जो सिरु सोरठ खे डिनो जेका चिता में जियरे जली सती थी। किन जो इहो बि चवण आहे त बीजल बि सागी चिता में दाखिल थी पहिंजे जीवन जो अंत कियो।