सुहिणी मेंहार
सुहिणी मेंहार - सिंधी लोक कहाणी - हिंदी फिल्म - सोहनी महिवाल
सिंधी साहित्य – शाह जूं सत सुहिणियूं – सिंधी लोक कहाणी – शाह जो रिसालो
सिंध जे सतन ट्रैजिक रोमांस में शामिल ऐं लासानी सिंधी अदीब शाह साहिब जे शाह जो रिसालो जो हिकु सुर [अध्याय] सुहिणी मेंहार वधीक मशहूर आहे शायद त इन करे बि जो सिंध जे भरि वारे पंजाब में बि सोहनी महिवाल जो किसो घर घर जी दास्तां आहे। पंजाबी ऐं सिंधी लोक कहाणी में फरकु सिर्फ ऐतिरो आहे जो पंजाबी में नदी आहे चिनाब त सिंधी में इहा इन्डस [सिंधु] आहे। जठ कबीले में जावल सुहिणी जे सचे प्यार जी हीउ कहाणी ऐतिरी त असिरायिती आहे जो हिन कहाणी जे आधार ते १९५८ में भारत भूषण ऐं निम्मी जी त १९८४ में सनी देओल ऐं पूनम ढिलो जी हिंदी फिल्म, जिन बिन्ही जो नालो हो सोहनी महिवाल, ठही चुकियूं आहिन।
सिंध जो ट्रैजिक रोमांस – सुहिणी मेंहार
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.
शुरुआत
हीउ कहाणी आहे अडिरिहीं [18] सदी जी जहिं समे सिंध ते मुग़लन जो राज हो। तुला नाले कुंभर पहिंजन मिटीअ जे थांवन खास करे सूराहिन ऐं पियालन ते दिलकश चित्रकारी करण वासिते मशहूर हुओ। सुहिणी इन तुला कुंभर जी तमाम वधीक खूब सूरत धीउ हुयी। हिनन जे ठाहियल मिटीअ जे बरतनन जो वडो हिसो राजा खरीद कन्दो हो तहिं करे बियन कुंभरन जी भेट में हीउ कुटुंब काफी वधीक अमीर हो।
पहिरियीं मुलाकात
हिक भेरे बुखारा जो शहज़ादो इज़्ज़त बेग -जेको अगते हली मेंहार जे नाले सां मशहूर थियो – पहिंजे धंधे जे कम सां हिंदुस्तान आयो हो सो तुला कुंभर जे दुकान ते आयो। इहो पहिरियों भेरो हो सुहिणी ऐं मेंहार हिक बिये खे डिठो पर इहा पहिरियीं ई मुलाकात बिन्ही जी दिलिन में पियार जी जोति जगाये वयी। इशक जो मारियो इज़्ज़त बेग बुखारा वापिस वञण जी जगह ते उते ई रहण लगो। पहिंजे प्यार जी खातिर हुन कुंभर जे घर नौकर थी कम करण शुरू कियो। तुला इज़्ज़त बेग खे पहिंजिन मेंहुन जी संभाल जो कमु डिनो। इन कम सबब ई इज़्ज़त बेग मेंहार जे नाले सां मशहूर थी वयो । सुहिणी ऐं मेंहार मेंहुन जे वाड़े में मिलण लगा ऐं कुझु वक़त गडु गुजारिण लगा।
सुहिणीअ जी शादी
थोरे वक़त में न सिर्फ तुला कुंभर खे इन्हन मुलाकातुन बाबत जाण पयी पर संदस ज़मात में बि चाहे ढकियिल लफजन में छो न पर सुहिणी ऐं मेंहार जे इशक जूं गालिहियूं थियण लगियूं । तुला हिकु सियाणो पीउ हो चव पचव जी गालिह अगते वधे उन खां अगु ई हुन नदीअ जे बिये भरि रहन्दड पहिंजी ज़मात जे छोकिरे दम सां सुहिणीअ जी शादी कराये छड़ी। मेंहार जी त जणु दुनिया ई लुटिजी वयी खेस हर तरफ अंधेरो ई अंधेरो पियो नज़र अचे। हुन सभु कुछ छड़े डिनो – केतिरा त इहो बि चवन था हू फ़क़ीर थी वियो – ऐं नदीअ किनारे ते झोपडी ठाहे उते रहण लगो।
गुझियूं (लिकियल) मुलाकातूं
मेंहार जे नदी किनारे रहण खां पोय सुहिणी ऐं मेंहार हर रात गुझे नमूने मिलण लगा। सुहिणी हिक मटके जो सहारो वठी नदी पारि करे अीन्दी हुयी। कुझु वक़त मेंहार जे संग में गुजारे वापस मोटी वेन्दी हुयी। हिक डींहुं सुहिणी जी निणान [सिस्टर-इन-लॉ] खे न सिर्फ इन्हन गुझियिन मुलाकातुन जी खबर पयी पर उन उहा जगह डिसी वरती जिते सुहिणी पहिंजो मटको लिकाये रखन्दी हुयी। हुन बियो कुछ त न कियो पर चुपचाप सुहिणी जे पके मटके जी जगह ते कची मिटीअ जो मटको रखी छड़ियो।
मेंहार जो नियम हो त जडिहिं बि सुहिणी हुन सां मिलण अीन्दी हुयी उन डीहं ते हू सुहिणी वासिते मछी रधीन्दो हो। चवन था त मटकन जी अदिला बदलीअ खां कुझु ई डीहं अगु सुहिणी जे अचण जे डीहं ते बुखार सबब मेंहार मछीअ पकिणिण कोन वंञी सघियो हो सो हुन पहिंजी जंघ जे मथियें हिसे मां मासु कटे मछी जी जगह ते ठाहियो हो।
तूफ़ान में सुहिणी
सुहिणी खे बि पहिंजी निणान जी करतूत जी खबर कोन हुयी सो हुअ हमेशा वांगुर उंदहिं जो सहारो वठी पहिंजी मटके रखण जी गुझी जगह ते पहुती ऐं मेंहार सां मिलण वास्ते मटके जो सहारो वठी नदी पारि करण लगी। सुहिणी जी शायद त इहा बि बदकिसिमती हुयी जो उहा हिक तूफ़ान जी रात हुयी। नदी में बि बियन डीहंन जी भेट में घणो ऐं वधीक तेज़ वहकरे वारो पाणी हो। सुहिणी विच नदी में हुयी जो मटके जी कची मिटी गरण लगी घबिरायल सुहिणी खे बियो कुछ त समझ में न आयो पर हुअ मेंहार – मेंहार पुकारिण लगी।
दर्दनाक अंत
सुहिणी जी मदद जी पुकार बुधी जंघ जे ताजे ज़ख़्म सबब सूर में तड़फन्दड मेंहार उथी खड़ो थियो ऐं बिना इहो विचार किये त खेस तरणु कोन अीन्दो आहे सिर्फ सुहिणी खे बचायिण खातिर हुन उन मौत मार तेज़ वहकरे वारी नदी में वठी ट्रिपो डिनो। सुहिणी जी मदद जी पुकार बुधी बिया केतिरा माणुहू बि नदीअ जे बिन्ही किनारन ते अची कठा थिया हुआ उन्हन मेंहार खे सुहिणी तायीं पहुचंदे त ज़रूर डिठो पर नदीअ जो तेज़ वहकरो बिन्ही आशिकन जे जिसमन खे वहाये खणी वियो।