सतगुरु स्वामी हरीदासराम

स्कूली तैलीम जी शुरुआत खां वठी इहा लालचंद जे रोजाने जी रवाजी या नेमाईती गालिह थी पयी त हू स्कूल में सिंधी, हिंदी, गुरमुखी भाषा तोड़े बियन विषयन जी सिखिया हासिल कंदो ऐं घर अची मेहमान तोर आयल संतन जे संग में वकतु गुजारीन्दो हुओ। अहिड़े माहोल में वडे थियण वारे लालचंद खे बि खबर बि न पयी हुन कडिहिं भजन लिखणु शुरू करे छडियो। घर जो पवित्रता ऐं समरसता (हिकु थियण जो अहिसासु) जो वातावरण लालचंद खे हिमथाईन्दो हुओ इन सिरजनातमक कम वासिते वधीक वकतु डियण वासिते।

स्वामी सर्वानंद जन लालचंद खे सतगुरु स्वामी टेऊँराम जे दोरन ते वठी वञणु शुरू कयो। थोरे ई वक़त में लालचंद जी भगिती ऐं आध्यात्म जी राह ते हासिल लासानी तरकी ज़ाहिर थियण लगी। लालचंद वासिते त इहा गालिह बेहद सवली ऐं बिना के खासि कोशिशूं करण वारी हुयी छाकाण सतगुरुन जहिड़ियूं शख़्सियतूं पहिंजे आचरण वसीले संदस राह रहबरी कनि पयूं। पहिंजी बालपणे जी उमिर पूरी करे जवानी में कदम रखण खां अगु ई लालचंद खे इहो अहिसासु थो चुको हुओ त हुन रवाजी इंसानी ज़िंदगी गुजारिण लाय जनमु न वरतो आहे पर संदस जीवन जो मकसद कुझु बियो आहे।

21 सालन जी उमिर में लालचंद दुनियावी जीवन छडे सनियासु वठण जी इछा ज़ाहिर कयी। स्वामी सर्वानंद जन इहो कबूल कन्दे संदस गुरु पद जी जवाबदारी खयीं। प्रेम प्रकाश मंडल जी इहा रिवायत रही आहे त संत मंडलियूं अलग अलग गोठन में वञी पंथ जे श्रध्दालुन खे सतसंग वसीले धार्मिक तरकी जी राह ते रहबरी कंदियूं आहिन। इन्हन मंडलिन सां गडु वञण वारो लालचंद हरीदासराम जे नाले सां मशहूर थियण लगो। 1975 में जडहिं स्वामी सर्वानंद जन स्पेन जे दोरे ते वया त उन्हन सां गडु वयल संत मंडली में संत हरीदासराम, संत अर्जन दास ऐं संत मनोहरलाल हुआ। लॉस पालमास में इन मंडली जो जोश भरियो सुवागत थियो पर इहो दोरो सिक, पंहिजायिप, पियार ऐं भगिती जे लिहाज खां कमाल जो आज़मूदो साबित थियो।

1977 में सतगुरु स्वामी सर्वानंद जन जे परलोक पधारिण खां पोय स्वामी शान्ती प्रकाश जन सतगुरु जी गदी ते विराजमान थिया। स्वामी शान्ती प्रकाश जन पंहिंजे बरपा कयल उल्हासनगर आश्रम जी शुरुआती सार संभाल ऐं वाधारे तोड़े बियन सामाजिक मशगूलिन में रुधियिल हुआ सो उन्हन न सिर्फ अमरापुर स्थान पर जयपुर राजस्थान जे आश्रम जी जवाबदारी संत हरीदासराम जन खे डिनी। 15 अगस्त 1992 ते शान्ती प्रकाश महाराज जे फानी दुनिया खां किनारो करे वञण खां पोय 30 अगस्त 1992 ते स्वामी हरीदासराम जन पंथ जे चोथें सतगुरु जे रूप में गुरु गदी ते विराजमान थिया।

सतगुरु स्वामी हरीदासराम साहिब पंहिजे रुहानी रहबर स्वामी सर्वानंद जन जी बायोग्राफी लिखी। पंथ जे विशवासुन जी राह रहबरी वासिते देश विदेश जा दोरा करण शुरू कया। सतनाम साखी इहे अखर इन्हन दोरन जे दरमियान न सिरफ वधीक मशहूर थिया पर पंथ जे विशवासुन जे रोजाने जीवन जो हिसो बणिजी पया।

स्पेन, पाकिस्तान, हांगकांग, यु ऐ ई ऐं साउथ अफ्रीका सुवामी जन जे विदेशी दोरन में मुख्य रहिया आहिन। अहिड़े ई हिक स्पेन जे दोरे ते 26 अगस्त 2000 ते स्वामी हरीदासराम जन जो सुरगवासु थियो।