सतगुरु स्वामी सर्वानंद

प्रेम प्रकाश मंडल जा संत – अमरापुर आश्रम – जयपुर – फेमस सिंधी संत कवी
सिंध जे भित गोठ जे ईश्वरीबाई ऐं शेवकराम जे जोड़े जी इहा खुशकिस्मती हुयी जो हुनन खे प्रेम प्रकाश मंडल जे फेमस संत स्वामी सर्वानंद जे बालपणे जो आनंद माउ पीउ जे रूप में माणिण जो वझु मिलियो। स्वामी सर्वानंद जेके प्रेम प्रकाश पंथ बरपा कन्दड़ संत शिरोमणी महान संत कवी स्वामी टेऊँराम साहिब जी रुहानी शकतिन ऐं गदीअ जा वारिस बणिया तिन जो जन्म 12 अगस्त 1897 ते थियो। हू स्वामी टेऊँराम जो भाणेजो हुओ ऐं संदन नालो सीरुमल रखियो वयो हो।

बालक न सिर्फ मामे स्वामी टेऊँराम साहिब जी रुहानी रहबरी हेठि पर सिंध जे बियन नामवर संतन महात्माउन जी रूह रुहाण वारे माहोल में वडो थियो पर संदन तैलीम स्वामी टेऊँराम जी नज़रसानी हेठि थी। स्वामी जन सिंध जे मुख़तलिफ़ शहरन ऐं गोठन जे दोरे ते बि बालक सीरुमल खे पाण सां गडु वठी वेन्दा हुआ। हू बि शान्ती सां स्वामी जन जी सेवा पयो कन्दो हो।

जडहिं सीरुमल जहिंजो नालो हाणे स्वामी सर्वानंद थी चुको हो स्वामी टेऊँराम साहिब जे वारिस तोर प्रेम प्रकाश मंडल जी गदी संभाली त हिन जो चेहरो हिक रुहानी चमक सां चमकण लगो। इहो डिसी श्रद्धालुन खे विशवास थी वयो त स्वामी टेऊँराम पहिंजियूं रुहानी ताकतूं बि हिन खे बख्शे वया आहिन। टंडो आदम जो अमरापुर आश्रम सम्भालीन्दे स्वामी जन आम इंसान खे धर्म जी सही मायना समझायिण ऐं इंसानी जीवन जे मकसद जी जाण डियण वास्ते दोरा करण लगा। 1947 जे मुल्क जे विरहांङें सुवामी जन खे भारत – पहिंजी असली कर्म भूमी ते अचण लाय मज़बूर कयो।

1952 में स्वामी सर्वानंद जयपुर में अमरापुर स्थान बरपा कयो जेको हिन वक़त प्रेम प्रकाश मंडल जी मशगूलिन जो जाबितो रखन्दड मरक़ज़ आहे। अजु पंथ जे श्रध्दालुन ऐं सेवकन में जयपुर जी उहा ई अहमियत आहे जेका कहिं समे टंडो आदम जी हुयी। जयपुर जे अमरापुर आश्रम में हर साल अप्रैल में चैत्र मेलो वास्ते सजी दुनिया मां हज़ारें श्रध्दालू जयपुर अीन्दा आहिन।

स्वामी सर्वानंद जन सुठा लेखक ऐं हिंदी जा विद्वान हुआ हुनन प्रेम प्रकाश ग्रन्थ जी रचना कयी। प्रेम प्रकाश पंथ मञींन्दडन वासिते हिन ग्रन्थ जी उहा अहमियत आहे जेका सिखन वासिते श्री गुरु ग्रन्थ साहिब जी आहे। सतगुरु स्वामी टेऊँराम जी जीवनी लिखण खां सिवाय स्वामी सर्वानंद खे यमराज नचिकेता जहिडियिन पुरातन धार्मिक वाक़ियन खे पहिरियों भेरो हिंदी कविता जे रूप में लिखण जो जसु हासिल आहे।

भगतन जा दुख दर्द चिंता मिटायिण वास्ते स्वामी सर्वानंद जे रुहानी शकतिन जे उपयोग जा केतिरा ई वाकिया भगतन जी ज़ुबान ते आहिन। चवन था ब्यावर जे हिक श्रध्दालुअ जे नवजवान पुट्र जी आवाज़ हली वयी। डॉक्टरन बि जवाब डिनो त को इलाज मुमकिन न आहे सो हू जयपुर आयो। स्वामी जन खे अरजु कियायीं। स्वामी जन पीउ पुट्र खे स्वामी टेऊँराम जी समाधी ते प्रार्थना करे जल खणी अचण वास्ते चयो। इहो जल स्वामी जन पुट्र ते छंडे सतनाम साखी चवण वासिते चयो जडहिं सुवामी जन पंजो भेरो चयो त हुन आहिस्ते सां सतनाम साखी इहो लफ्ज़ उचारियो।

स्वामी सर्वानंद जो नियम हो त हू साल में हिकु भेरो देस विदेश जे हर प्रेम प्रकाश आश्रम / मंदिर जो दोरो ज़रूर कन्दा हुआ। अहिड़े ई हिक दोरे ते स्वामी जन मनिला में गंगाराम दादलानी खे चयो त हीउ संदन आखिरी विदेश दोरो आहे। स्वामी जन श्रध्दालुन ते आसीस करण वासिते बि स्वामी शान्ती प्रकाश खे मुकरर कयो।

21 जुलाई 1977 ते स्वामी सर्वानंद जो सुरगुवास थियो। संदन इछा मूजिब स्वामी जन जे नाशवंत सरीर खे गंगा जे पवित्र हरिद्वार में जल समाधी डिनी वयी।