सतगुरु स्वामी शान्तीप्रकाश
Introductory
सुवामी शान्तीप्रकाश महाराज न सिर्फ प्रेम प्रकाश मंडल जा पर भारत जा सभ खां वधीक मशहूर सिंधी संत हुआ। प्रेम प्रकाश पंथ जा सुवामी जन ट्रियां सतगुरु ऐं उल्हासनगर में प्रेम प्रकाश आश्रम बरपा करण वारा हुआ। स्वामी शान्ती प्रकाश महाराजन सिंधी समाज जे आध्यात्मिक वाधारे सां गडु सामाजिक वाधारे ऐं इंसानियत जी सेवा जे खियाल खां जनता जनार्दन परिषद, सुंदर सेवक सभा, राधेश्याम गो शाला, स्वामी सर्वानंद हॉस्पिटल ऐं बियूं केतिरियूं ई संस्थाउं बरपा कयूं।
बायोग्राफी - सतगुरु स्वामी शान्ती प्रकाश
प्रेम प्रकाश मंडल – फेमस सिंधी संत – उल्हासनगर
प्रेम प्रकाश मंडल जे ट्रियें अध्यक्ष सतगुरु स्वामी शान्ती प्रकाश जन जो नालो ई इन्सान खे दुखन जे अंधिकार मां कढ़ी शान्ती ऐं सुखन जी रोशनीअ डान्हुँ वठी वेन्दड आहे। हिंदी भाषा में शान्ती मतलब बिना चिंता वारी हालत ऐं प्रकाश मतलब रोशनी आहे। स्वामी जन जो जनमु सिंध जे सखर जिले जे चक गोठ में रहन्दड आसूदोमल पोहूजा जे पुट्र जे रूप में 26 अगस्त 1907 (रक्षा बंधन जे डींहुं) में थियो हो ऐं संदन नालो खैराजमल रखियो वियो हो।
खैराजमल जे स्कूली पढ़ायी जे दौरान संदस चौथें दरिजे में हुजण वक़त चक इलाके में चेचक जी बीमारी फैलिजी वयी। इन बीमारी जो शिकार बणी खैराजमल अखियुन जी रोशनी विंञाये वेठो। इलाज कन्दड़ डॉक्टरन जो चवण हो त अखियुन जी रोशनी वापस अचण जो को इलाज कोन आहे। पिता आसूदोमल बालक खैराजमल खे सिंध जे मशहूर संत साईं हरचुराम साहिब वटि शाहपुर थलहो वठी आयो। संतन खे बालक जी अखियुन जी रोशनी बाबत अरजु कियायीं ऐं बालक खे उते रही संत जी सेवा करण वासिते चयायीं। ट्रिन सालन खां पोय आसूदोमल वापस संतन वटि आयो ऐं हिकु भेरो वरी अरजु कियायीं हिन भेरे साईं हरचुराम जवाब डीन्दे चयो “बालक जी अखियुन जी रोशनी जी चिंता न कर हीउ वडो थी हज़ारे लखन खे रुहानी राह डेखारीन्दड थींदो ऐं सिंध जे मशहूर संतन में शुमारियो वेन्दो। ” अजु साईं हरचुराम जा अखर हिक हकीकत आहिन छो जो इहो बालक वडो थी स्वामी शान्ती प्रकाश बणियो।
स्वामी टेऊँराम सां मुलाकात थियण ते खैराजमल गुरु मंत्र डियण वासिते वेनंती कयी तहिं ते स्वामी जन हिन खे पाण सां टंडो आदम जे अमरापुर आश्रम में वठी आया। आश्रम में रहन्दे हू न सिर्फ स्वामी जन जी पर साधु संतन महात्माउन ऐं रुहानी शकतिन जे मालिक सूफिन, जेके वक़त बि वक़त आश्रम में पिया अीन्दा हुआ, जी पिणु सेवा करण लगो। हिन जी सेवा सां खुश थी स्वामी जन हिन खे नवों नालो शान्ती प्रकाश डिनो ऐं संदस धार्मिक सिखिया ते खास धियान डियण लगा।
अटकल ट्रे साल हरिद्वार में रही शासितरनि ऐं उपनिषदन जो अभियास ज करण खां पोय शान्तीप्रकाश जन श्री गुरु ग्रन्थ साहिब जो अभियासु करण वासिते अमृतसर आया। हिते स्वामी जन खे गुरबाणी जी सिखिया डीन्दड ज्ञानी हमीर सिंह बि हिनन जी यादगिरी जो कायिल थी पयो। सिर्फ हिकु भेरो ई बुधण सां स्वामी जन खे गुरबाणी शबद, सलोक ऐं उन्हन जो अरथु यादि थी पियो वंञे। धर्म ग्रन्थन जी सिखियाउन जो ज्ञान हासिल करे स्वामी जन वापस टंडो आदम आश्रम आया। स्वामी टेऊँराम ऐं संत उद्धव दास सां गडु हाणे उहे बि सिंध जे अलग अलग शहरन गोठन में सतसंग वासिते दोरा करण लगा।
विरहांङें खां पोय स्वामी जन भारत अची उल्हासनगर तोड़े महाराष्ट्र खे पहिंजी कर्म भूमी बणायो। सिंगापूर वेन्दे 15 अगस्त 1992 ते हवाई जहाज़ में अमृत वेले असुर जे 4 बजे स्वामी जन जो सुरगवासु थियो। चाहे जिसमानी तोर सुवामी जन अजु असां सा गडु न आहिन पर संदन सिखिया ऐं इंसानियत जी सेवा जा कयल कम जुगन तायीं राह रहबरी कंदा रहन्दा। आम तौर स्वामी जन श्रद्धालुन सां गालिहाईंदे ऐं आसीस तौर “सतनाम साखी” ऐं “जय श्रीकृष्ण ” इन्हन लफजन जो वधीक इस्तेमाल कन्दा हुआ।
सुवामी शान्ती प्रकाश - इंसानियत जी सेवा
देश जे विरहांङें खां पोय स्वामी शान्ती प्रकाश उल्हासनगर खे पहिंजी धर्मिक तोड़े सामाजिक मशगूलिन वासिते चूंडियो। उते स्वामी टेऊँराम प्रेम प्रकाश आश्रम बरपा कियो। थोरे ई वक़त में आश्रम देश विदेश जे हज़ारें श्रद्धालुन वास्ते हिकु तीरथु स्थान बणिजी पियो ऐं अजु बि तीरथु स्थान आहे। विरहांङें सबब सिंधी कौम अलग अलग केतिरिन ई किसमन जे दुख दर्द ऐं तक़लीफ़ुन खे मुहं डयी रही हुयी इन करें स्वामी जन समाज सुधार जे कमन वासिते जनता जनार्दन परिषद हिकु सामाजिक ट्रस्ट बरपा करण सां गडु बुढा आश्रम, गरीब कुटुंबन खे नियाणीअ जी शादी वक़त माली मदद, एजुकेशन स्कालरशिप जहिडा केतिरा कम शुरू कया। उल्हासनगर जो प्रेम प्रकाश आश्रम सिर्फ हिक धर्मिक जगह न रही इन्हन सामाजिक कमन जो मरक़ज़ बि बणिजी पयो।
मशहूर सर्जन पदम श्री डॉ एम सी मोदी -जेको आश्रम जे अखियुन जे ऑपरेशन जे बिन कैम्प्स में अची चुको हो – जो चवण हो
“मां हिते ऑपरेशन करण न पर स्वामी शान्ती प्रकाश जी आसीस वठण वासिते अीन्दो आहियां जेको इंसानन जे दिमाग जो ऑपरेशन करे सन्दन ज़िन्दगीअ में रुहानी रोशनी जगाये दिलिन खे इन्सानियित जी सेवा करण जी भावना सां भरे छड़े थो। स्वामी जन मुखां बि वडा सर्जन आहिन छो जो मां ऑपरेशन वसीले इंसान खे सिर्फ डिसण जी सलाहियत डियण जी कोशिश कियां थो पर स्वामी जन त इन सलाहियत जो हकीकी ऐं सचो उपयोग करण सेखारिन था। “
स्वामी जन बियन केतिरन संतन वांगुर सिर्फ आध्यात्मिक गुरु न पर समाज सुधारक पिण हुआ। उल्हासनगर में स्वामी सर्वानंद हॉस्पिटल, नारी शाला ऐं बाल मंदिर हलायिण वारी संस्था सुंदर सेवक सभा जो अध्यक्ष हुअण सां गडु स्वामी जन श्री राधेश्याम गो शाला ऐं सुरग धाम शमशान भूमी जा बि अध्यक्ष हुआ।
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.